¹ Apwiya yaahomwiirela Moises ni Arao: ² N'na nlamulo ninoohimeeryaakani. Mwaahimeerye assaana owiisrael wiira awaane enama yankaani yoosseerya, yoohirakala, yoohiireetthu. ³ Enama yankaaniiyo en'hala ovahiya nankuttho Eleazar, en'laawe okussa wiira yiiviye ota wonupa yonthukumano. ⁴ Eleazar, nankuttho, naahala okussa ephome vakaani, ninikokhonawe, emaara saapa, arwaaka omakhumenloni woheema wonthukumano. ⁵ Nankuttho nkwaawe n'hala opaha enameeyo: ⁶ Nankuttho naahala nri nmotja, ni naahala orihela wamooroni, enameeyo weeraaya epahiyaka. ⁷ Vano, yana naahala okussa ekuwotjawe ni naahala orapa. Tjitjon'mo, naahala okela nipuro nonthukumano, on'halaawe okhala oohivara nteko npaka wiila. ⁸ Ni yoole pahale enama, naahala okattha ekuwotjawe nookattha, massi yena n'hala wiileliya hivarakeetthu. ⁹ Ntthu n'hala okhala ooreera, naahala okhupa ettuura yonama ni nkoweesa npaani wonthukumano, nipuro nooreera. En'hala wiinssaathiya naatthu owiisrael wiira atthonkomanihiye maatji ooreeriha, kontha ettuureeyo enama wayoovahiya wotampi. ¹⁰ Yoole khupale ettuura yonama, haana akatthaka ekuwotjawe, ni yena n'hala okhala oohiloka npaka wiila. Nin'hala okhala nlamulo naasaana owiisrael naanan'mwa ankhala naayenatja. ¹¹ Yoole n'hala onkwanha ntthu ookwa, n'hala okhala oohilokaloka womahuku saapa. ¹² Yoola haana wiivoniha, nihuku noneeraru ni nihuku nonasaapa, vano phun'halaawe okhala ooreera. Vano, eehiivonihe nihuku noneeraru, khan'hala okhala ooreera nihuku nonasaapa. ¹³ Wakhula ntthu n'hala ohiivoniha, naahala opiiha owerenhawawe npaani wanluku. Yooyo ntthuuyo haana afutjiyaka wiisrael, kontha maatji ooreeriha khakwanhale. Yena n'hala okhala ontuniyani ni ohilokawawe on'hala okhala niyenani. ¹⁴ N'na nlamulo nantthu akhwaka n'heemani. Oooteene yoole n'hala okhala n'heemani, ni en'hala onphwanha, n'hala okhala mahuku saapa. ¹⁵ Wakhula mwaapu woohinkhuneelo, khun'hala olokaloka. ¹⁶ Weenan'na yeeyo, akhalaka ntthu ota woheema, ankwanhaka ntthu ookwa niikatana, wala khula etthu yookhwa, wala nikhuva nantthu, oyo ntthuuyo n'hala okhala oohilokaloka womahuku saapa. ¹⁷ Woopheela ovonihiya ntthu oohiloka, nkusse ettuura wayoovahiya yoopahiya yotanpi, nootakanihera maatji. ¹⁸ Ntthu ooreera, n'hala ouruwyaa Hissopo nmaatjini noorweeha n'heemani, nimyaapu tjooteene, naahala waamwaressela atthu an'hala okhala npaani, ni yoole n'hala onkwanha ntthu ookhwa, wala nikhuva, wala etthu ekhwaawe yookhwa. ¹⁹ Nihuku noneeraru ninihuku nonasaapa, yoole n'hala okhala ooreera, n'hala onttikitthela ntthu hinavona. Nihuku nonasaapa, ntthu hinavona haana wiivoniha, ni naahala okattha ekuwotjawe noorapa. Yootjootjilo naahala ovona. ²⁰ Massi ntthu ooteene n'hala okhotta wiivoniha naahala ofutjiya naatthu, kontha naahala ophwanhiha enupa yomavekelo yaPwiya. Kontha maatji ooreeriha khamwaresseliye, n'hala okhala tjitjon'mo. ²¹ N''na nlamulo noohimala: Yoole n'hala okela nmaatjini ooreeriha, naahala okattha ekuwotjawe, ni naahala okhala ooreera yootjootjilo. ²² Wakhuleetthu en'halaawe okwanha, khan'hala olokaloka.