¹ Apwiya yaahomwiirela Arao: We, naasaanaa, ni nihimo naatthwaa okhalayi n'nohaka okhala ahooleli wotanpi tjooteene tjiphwanhiye nipuro nooreerihiya. Massi we naasaanaa on'hala ovahatjeriya wotanpi tjooteene tjiphwanhiye ni wakhula nankuttho. ² Ni atthu onihimo na Levi, nihimo naatthweenhu okhalayi, onaahala waawaana nkhayi, wiira nvaratje nteko nkhayi ohoolo woheema womalamulo owaataana. ³ An'hala woovarela nteko ni heema ooteene. Nen'navaa, ayenatja khan'hala waattamenla nipuro ttakattiifu waltaare, kontha n'nohala okhwa. ⁴ N'nohala okhalatja wamotja wiira munkhikitjeratje heema wonthukumano, wonteko wooteene won'heemani. Nan'mwa khan'hala owaattamenla. ⁵ On'hala okhalenla nipuro ttakattiifu ni waltaare, wowiira orussiyawaka ohaaweele atthu owiisrael. ⁶ Kihothanla nikhoto nowiisrael naassun'naa, alevita. Ayenatja yoovahiya waaPwiya, wowiira avaratje nteko n'heemani wonthukumano. ⁷ Massi we naasaanaa on'hala ohoolela tjooteene tjiri walataare ni n'hina wokortiina. Kinawoovahatjani okuttho toko yoovahiya, ni wakhula nan'mwa n'hala waattamenla naahala okhwa. ⁸ Vano, Apwiya yaahomwiirela Arao: Kinaahala woovahenrani ovussa tjoovahiyatjaka, ni tjoovahiya tjooteene ttakattiifu atthu owiisrael tjin'halaaya okivaha, tjinoovahessaakani naasaaneenhu phanka yoohimala. ⁹ Wotjitthu tjoottakattifihiya, ahivirale wamooroni, tjin'hala okhala tjawaa, tjoovahatjaya tjooteene, ni tjoovaha mwaha wotanpi. ¹⁰ Tjen'nha tjoovahiyan''ya, khula ntthu haana olya, kontha phitjooreerihiya. ¹¹ Tjin'hala okhala tjawaa. Tjoovahiya tjooteene tjiwaaniye naasaana owiisrael. Kihoovaha tjooteene, naasaana, tjoohimala. Atthu ooteene omoomutjini ari ooreera ahaana olya watjen'nho tjoovahiyan'nho. ¹² Makhura ooreeressa, nipha nooreeressa, ni tjowantjera ohephiya tjaatthu tjin'halaaya okivaha, kinaahala woovaha. ¹³ Mihokorokho tjowantjera tjovathi, tjin'halaaka owaaneliya, tjin'hala okhala tjawaa. Atthu ooteene omoomutjiniwaa ari ooreera anaahala olya. ¹⁴ Tjitthu tjooteene tjooreerihiya wiisrael tjin'hala okhala tjawa. ¹⁵ Ooteene yaale an'hala wantjera oyariya, akhale ntthu, ekhale enama, atthu en'halaaya waavaha Apwiya, tjin'halaokhala tjawa. Maana, atthu anaahala waakussa ooteene owantjera oyariya wonama yoohiireera. ¹⁶ Yaale an'hala okussiya waatthu, an'hala okussiya anapiihale mweeri n'motja weeyareelo. Tjitjon'mo, atthu anaahala waakussa weephimelo thanu tjoparatha, wonayeeli weelemelelo wonipuro ttakattiifu. ¹⁷ Emope yowantjera oyariya, epwittipwitthi, wala epuri, khatjin'halatho othumiya, tjawaka. N'nohala omwaressela ephomyaaya waltaare noopaha ethayi phanka yoovahiya yowaatjivela Apwiya. ¹⁸ Enameeyo en'hala okhala yawaa, tjitjon'mo toko ekhakaatja wayoovahiya wonphantte weelopwana, enama tjin'hala okhala tjawaa. ¹⁹ Tjoovahiya tjooteene aathhu owiisrael tjin'halaaya ovaha waaPwiya, kinaahala woovaha, naasaanaa toko yoohiyeriya yoohimala. N'no waataana woohimala womaakha, waataana owaaniye woohimala naaPwiya wawaa ni nikhotonaa. ²⁰ Apwiya yaahomwiirela Arao: Khun'hala okhalana yoohalana weelapo yaatthu, wala khun'hala okhalana nipuro noopheela olima. Thimi kiri nipuronaa ni yoohiyeriya waatthu owiisrael. ²¹ Wonikhoto na Levi, kaahaavaha yooreerela yooteene wiisrael toko yoohiyeriya mwaha wonteko waavaralyaaya n'heemani wonthukumano. ²² Okhuma olelo woorwaa ohoolo, atthu owiisrael khan'halatho waattamenla n'heemani wonthukumano, wala n'nohala ohiyeratjiya tjoottheka ni n'naahala okhwatja. ²³ Alevita anaahala ovara nteko n'heemani wonthukumano. Anaahala ovhatjeriya wakhula etanpi. Nin'hala okhala nlamulo omakhotweenhu ooteene. Ayenatja khan'hala phwanhatja yoohiyeriya waatthu owiisrael. ²⁴ Kontha mwaavulo waatthu owiisrael, waakivahatjalyaaya, kaavahale alevita. Phimaana, waahimeeryatje: Khan'hala okhalana yoohiyeriya waatthu owiisrael. ²⁵ Apwiya yaahomwiirela Moises: ²⁶ Wiirelatje alevita: Mwawaakhenla atthu owiisrael mwaavulo Apwiya woovahalyaayani toko yoohiyeriya, n'nohala waavaha Apwiya, mwaavulo tjomwaavulo. ²⁷ Ntjankweenhuuyo on'halaokhala wonphantte wonakhuumi. ²⁸ Tjitjon'mo ninhuuvaatja, n'nohala othoonhera yoovaha waaPwiya ni mwaavulo tjooteene tjaakhelaleenhu waatthu owiisrael. Tjen'nho n'nohala onrweehela Arao, nankuttho. ²⁹ Watjoovahiya tjooteene tjin'haleenhu waakhela, n'nohala waavaha aPwiya. Kin'hala opanka tjoovahiya toko tjoovahalyaakani, kithanlaka yootepessa oreera, ninphantte yoottakattiifu. ³⁰ Vano, n'nohala owiirelatja: Mwarweehaka yooreera ovikana yaakhelaleenhu, yoohala watjoovahatjinhu tjin'hala okhala naalevita epyoo yo Eira ni epyoo yo Lagar. ³¹ N'nowala olya wakhula nipuro, naassimutjeenhu, kontha etthuvweenhu wonteko wooteene waavariya n'heemani wonthukumano. ³² Khan'nohala wootheriya mwaha woolya wala ovurya, mwaarweehelaka Apwiya yooreera woovirikana yaakhelaleenhu. N'hinanarihe yoottakattifihiya naatthu owiisrael, wala n'naahala okhwa.