¹ Pwiya aahomwiirelatho Moises: ² Opanke mapalapatta meeli oparatha. Ni yaayo mapalapattaayo oopheela owiihana atthu wiira akhume nmakatjalyaaya. ³ Anankuttho anaahala woopa mapalapatta wiira yaatakanihe atthu ooteene ohoolowaa, onkhumenliya heema wonthukumano. ⁴ Anankuttho yoopa nipalapatta nimotja, vano ahooleli, naahooleli omaloko owiisrael, ahaana atakaneelaka. ⁵ Woopaka nipalapatta, atthu amakatjale nphantte wonkerekhere onkhuma ntjuwa ahaana akhumatjaka. ⁶ Woopakavale wemaara yowaakulela, atthu amakatjale nphantte woohitto, ahaana akhumatjaka. Ayenatja ahaana orumiha ventji wiira yiiwe atthu owiisrael. ⁷ Atthwaayo yathukumanakavale, woopeke nipalapatta, massi kahi ventji. ⁸ Assaana aArao, anankuttho, ahaana woopa nipalapatta. Yeela phin'hala okhala piikettelo yomakhoto ooteene. ⁹ Mwarwaaka okhottoni wan'wananiinhu owoohuvihatjani, vano n'naahala woopa nipalapatta. Mi, Pwiya, mulukweenhu, kinaahala owuupuwelatjani ni kinaahala owoopolatjani mwaawananiinhu. ¹⁰ Mahuku ootthapenla, wala essukuhuulutjinhu, woopatjeroni mweeri, n'naahala woopa nipalapatta wohissima watjoovahatjinhu tjoopahiya ni mwaha wookuttho watjoovahatjinhu tjowaataana. Yeela en'hala okhala okuupuwelawinhu, mulukweenhu. MikiPwiya, mulukweenhu. ¹¹ Mwaakha wonayeeli, mweeri wonayeeli, mahuku yeettaka ssiriini womweeri yooyo, nihutte naahovussiya npaani mwanluku mwaha wokettelo wonivuku. ¹² Atthu owiisrael, yaahokhuma moothakoni wooSinai mwaatthwaaya. Nihutte neemelale othako wooPara. ¹³ Ayenatja yaahopankatua ekwahaaya yowantjera, atthara mweettihero waPwiya waavahiyaawe Moises. ¹⁴ Nikhoto naJuda phinantjerale okhuma, naanakhottwaaya. Nasom, mwaana Aminadabe, pheettihera anakhotto aJuda. ¹⁵ Netanel, mwaana Zuar, pheettihera anakhotto nonloko nonikhoto na Issacar. ¹⁶ Eliabe, mwaana Helom, pheettihera anakhotto nonloko nonikhoto naZebulom. ¹⁷ Nikhoto naGerson ni Merari, yaakhalenla enupa yanluku, yaahokwanhulatja enupa yanluku ni yaaheetta ekwahaaya. ¹⁸ Anakhotto aRuben, yaahorwaa ekhayaaya. Elizur, mwaana Sedeur, aahoolela anakhotto aRuben. ¹⁹ Selumiel, mwaana Zurisadai, aahoolela anakhotto nonloko wonikhoto na Simeao. ²⁰ Eliasafe, mwaana Deuel, aahoolela anakhotto nonloko wonikhoto na Gade. ²¹ Macoatita yaahorwaatja. Ayenatja yaahokussatja tjitthu tjooteene tjonpaani mwanluku. Akhwaawe yeera yeemessaka enupa yanluku, macoatita ahinaphiyatja. ²² Anakhotto aEfraim, yaahokhumatja. Elisama, mwaana Amiude, aweettihera anakhotto aEfraim. ²³ Gamaliel, mwaana Pedazur, aweettihera anakhotto aManasses. ²⁴ Abida, mwaana Gideoni, aaweettihera anakhotto aBenjamim. ²⁵ Anakhotto aDa phayaamalihenre okhuma. Aiezer, mwaana Amisadai, aaweettihera anakhotto aDa. ²⁶ Pegiel, mwaana aOcra, aweettihera anakhotto aAser. ²⁷ Aira, mwaana Ena, aaweettihera anakhotto aNaftali. ²⁸ Ala phamanan'na aanakhotto aatthu owiisrael, tjaakhumalyaaya ekwahaaya. ²⁹ Moises aahuuluma ni Hobabe, mwaana aReuel, n'midianita. Reuel yaari athumwaane amwaara aMoises. Moises aahuuluma ni Habobe ni aahiira: Hiivano ninrwaa nipuro Pwiya nihimyalyaawe. Pwiya aahiira: Mikinaahala woovahatjani nipuro. N'nitthare ninaahala woopankani ratta. Pwiya aahaakhuluveliha waapanaka ratta atthu owiisrael. ³⁰ Massi Hobabe aahomwiirela Moises: Khaninrwa nkhayi. Kinrwaa elapwaaka. ³¹ Vano Moises aahaakhula: Sontte, n'hinihiye. Nhu n'naatjuwela tjinkhaliya moothakoni. N'naahala onikhaliha ratta. ³² Mwarwaaka nihi, ninawoopankani ratta toko Pwiya tjin'halaawe onipanka. ³³ Ayenatja yaahopankatja ekwaha yowamwaako waPwiya womahuku mararu' Nivuku nowaataana naPwiya naahorwaa ohoolowayatja womahuku mararu, woopheela ophwanha nipuro noopheela omumula. ³⁴ Nihutte naPwiya naari naayenatja, nihuku nooteene weeraaya yeettaka. ³⁵ Nivuku owakathi phuuwakathi waakhumaaya, Moises iiratjo: Nvuwe Pwiya. Mwaawaresse awananiinhu. Mwaatthawihe yaale anoothanhani. ³⁶ Nivuku neemelaka, Moises iiratjo: N'hokolyee Pwiya, waatthweenhu entji owiisrael.