¹ Massi, nihuku nopatjera nosumana, mapinkossa, ayenatja yahoruatja omahiye, yahokussa tjorereela tjathenkatjaliaya. ² Ayenatja yahophuanha nluku ninakumihiye wamahiye; ³ massi, wakelaliaaya, khaphuanhale eruthu ya Pwiya Yesu. ⁴ Ni yahokhumenla wira ayenatja yaritji ossankatja wayele yakhumenlale. Vano, yahokhumenla alopwana eli yawarale ekuwo tjowaaria. ⁵ Athianaale yahokhala owovatja ni, yahowehiha ekhoviaaya vathi, ayenatja ahowirelatja athianaale: "N'naarwelelani wanokhua ole ori nkumi? ⁶ Yena khavo, hovuweenla! Mupuwele ntoko yena tjohimeraliaaweni, owakathi wariaawe oGalileia, ⁷ iraka wira Mwana Anthu ahana avahenriyaka m'matatani wanamatheka ni akhomeliyaka ni, nihuku noneeraru, hana avuwenlaka. ⁸ Athiyanaale yahupuwela molumwaawe. ⁹ Ni, ahokoliaka omahiye, yahahimeria tjotene n'nha tjithun'nha wakhumi nam'motja ni yale akinakuale otene. ¹⁰ Maria Madalena, Joana ni Maria, anumwaane Tiago, ni assikinaku yaritji na yenatjayahahimeria arum'mwe tjithun'nha. ¹¹ Massi arum'mwe khayakupalale athianaale, molumwaala yakhalela ntoko elewelewe. ¹² Pedro, ahovuwa ni ahothiawa arwaka omahiye. Arukunuwaka ni awehaka n'hinam'mwe, onale mikhumin'nhe tjinari tjo linho. Ahohokolela owani otteliya wa yele yakhumenlale. ¹³ Nihuku nen'no, eli wayaale yarwa ntjoko wihaniayaka Emaus, milantji sithini yettalivelo wo Jerusalem. ¹⁴ Ni yarwa ewatjihanaka mwaha wotjithu tjoteene tjakhumenlale. ¹⁵ Wahirania, weraya ewatjihanaka, Yesu mwaanene ahomwattamenla ni ahantjera wetta na yenatja. ¹⁶ Massi methoaaya yahokhala owimpithihiya wira ahintjuwelele. ¹⁷ Ahaakoha Yesu: "Mwaha essiani n'nowatjihanen'nhu?". Ni yahemela otjukuleene. ¹⁸ M'motja wayale, ihaniaka Cleopas ahakhula: "Thi we owettetta ohintjuwela tjithu tjikhumenlale oJerusalem mahukuaala?". ¹⁹ Yena ahowirela: "Tjithuni?". Ayentja yahakhulatja: "Tjinon'himia Yesu oNazare. Yoole ari profeta okuru om'mitekoni ni omolumo, eriyri ya Muluku ni athu otene, ²⁰ ni ntoko akhulupale anamukutho ni aholeliihu ahovahiiha wira inviiye ni Ahonkhomela. ²¹ Hi nanwehenra wira Yena n'hala wathukula an'na Israel. Ohiyeeyo, elelo nihuku noneraru tjakhumenleru tjithun'nha. ²² Phikhweli athiyaneehu eriyariwihu ahonitutusera, anarwalene mapinkossaru omahiye. ²³ Ni ahiphuanhaka eruthu ya Yesu, yahohokoliatja yiratjaka ahokhala yonaka malaikha, yaayo yahowirelatja wira Yena haavo. ²⁴ Akinaku yari nihivano yahorwa omahiye ni yahophwanha ntoko tjihimaliaaya athianaale; massi khayonale ²⁵ Yesu, vano, ahowirela: "Alopwana olipa winwa ni olipiha nrima wophela othuna wa tjen'nhe ma profeta tjihimialiaaya! ²⁶ Khawaphuanela wira Cristu ahaawe n'nha tjithun'na ni akele mumweneni wawe?". ²⁷ Vano, nipatjeraka ni Moises ni erwaka wo ma profeta, ahataphulela, ni mowantikhiyani motene, attonkatja mwaha Wawe. ²⁸ Wattamelaliaaya mwinttethenin'mwe, wenwe waruaaya, Yesu apankale ntoko nthu norwa ottai. ²⁹ Massi ayenatja yahonlepela Yenan iraka: "Okhale niihi, kontha ohinla ni nihuku nihanle omala". Ni ahokela wo wira akhale na yenatja. ³⁰ Ni, narieene na yenatja wa metja, ahokussa ephau, ahoreriha, ahomia ni ahavaha. ³¹ Vano, menthoaaya yahokhala ohulia, ayenatja yahontjuwelela, ni Yena aholakatjiaa owintho waya. ³² Ayenatja yahantjera wirelana nthu ninkhuaawe: "Khapaha nrimeehu, Yena wanihimeriaawe mphironi ni ananihimeria tjowantikhiya?". ³³ Owakathi yole, ahovuwatja ni ahohokolelatja oJerusalem. Ayenatja yahaphuanhatja okhumi nam'motja othukumaneene ni yale yari nayenatja, ³⁴ yeratjaka: "Wekhueli a Pwiya ahovuwenla ni ahonkhumenla Simao". ³⁵ Vano, ahottonkatja tjithu tjiraniaale mphironi ni ntoko tjiwaliaawe Yesu antjuwelelaka nayenatja wamialiawe ephau. ³⁶ Weraaya ettonkatja tjithun'nha, Yesu ahakhumenla wariayariwaya ni ahowirela: "Nrettele okhale ni nhu!". ³⁷ Ni yahohala otuthuwatja nu woova, yupuwela wira yona n'nepa. ³⁸ Massi Yesu ahira: "Essiyani nkhalaka okutakuthia? Essiyani nkhalaka nurikarikiya wamirimaniwinhu? ³⁹ Moone Etatatjaka ni Enhatjaka, Thimiivano! Nkakikuanheni ni moone. N'nepa khunkhala enama walani makhuva ntoko nhu tjinonen'nhu wira Mi kihana. ⁴⁰ Wamalihaliaawe wuluma, ahathonhihera etatatjaawe ni enhatjaawe. ⁴¹ Ni, okhala wira ayenatja khayalamuliya ocupali, mwaha wotteliya ni atjiveliyaka, Yesu ahowirela: "Nhu n'hana ethu yophela olia?". ⁴² Ahovahiya epedaso yo hopa yowoosiya. ⁴³ Yesu ahokusa ni ahokhura ohoolowaya. ⁴⁴ Yena ahowirela: "Owakathi wariaka ni nhu, kanawuhimeeriani: wanaphuanela wira yiranie tjotene tjankhanle tjowantikhiya mwaha Wawaka nketteloni tja Moises, wa maprofeta ni wa Salmos". ⁴⁵ Vano, ahahula mupuwelelo wo wira atjuwelele Tjowantikhiya. ⁴⁶ Ni ahowirela: "Tjihantikhiya wira Cristo ahana ahaawaka ni avuwenlaka wanookhu nihuku noneeraru. ⁴⁷ Ni wira, mwa Ntjinanawe, wahana olalenyaka wituthuwa ni olevenliya wo tampi etunia yotene, opatjeriyaka oJerusalem. ⁴⁸ Nhuuva enamoona wo tjen'nha tjithun'nha. ⁴⁹ Ni Mi kinahala wuwanelani ekuluveliho ya Thumwanaka; massi mwanriihe opooma mpaka wan'halen'nhu owariheliya ekuru tjowiirimu". ⁵⁰ Vano, Yesu ahakusa mpaka oota wakhiviru nu Betania. Ni, ahovussa Etatatjawe, ahareeriha. ⁵¹ Wahirania, okathi warerihawe, ahahuluwa ni ahokusiya wiirimu. ⁵² Vano, ayenatja Yanankokhorela ni yahohokolela oJerusalem nutteeliya tjinene. ⁵³ Ayenatja yakhala othukumana nkeretja, anttithimihaka Muluku.