^{1 2 3 4} Emara emottja entji amananihaliya othenkatja yohimiya mwaha tjitho tjokhumenla tjirayale wa hii. N'toko tjihimeriyehu naale apatjenre nen'ne ohomwerela namona vakhiviru ni anan'teko ohapari, vano kituwelela wokhala sana, kupuwelelaka worathavenla enan'na tjotjithu tjootene okhumela wopatjera, ni watikhatjana ni nan'naya wothenkatjaya sana Teofilo, ⁴ wera otjuwele sanasana eliyeli mwa tjithu tjisomihiya wopatjera. ⁵ Mahiku a Herodes, mwene otjudeiya, ahavona n'kutho n'motja, yihaniya Zacarias, onikhotto na Abias. Amuarawe yari nikhotto na Arao ni yihaniya Isabel. ⁶ Oyeli yari anasariya oholo wa N'luku, yethaka wenan'na yohimamatjiya. ⁷ Masi ayenani khayarina asana, kontha Isabel ari epupa, ni yari oyeli owuluvalatja tjinene yoyo owakathiyo. ⁸ Yakhumenlale wera Zacarias ari oholo wa N'luku, avaraka mitekotjawe tje nankutho, n'toko nikhottonawe, ⁹ Vano yena anothaliya motjaliyani, wonayeli elamalelo wa n'teko tjenan'kutho, wera akele enupa ya Pwiya ni opaha elunpani. ¹⁰ Athu otene yanasuwali n'phanthi wota owakathi wapahiyaya elunpani. ¹¹ Vano n'laikha nimotja nahomwela, nemelale, n'phathi werlopwana wowaltar wapahiya elunpani. ¹² Owakathi Zacarias wonaliyawe, ahokhala olakatjatja ni ahokhalana wova. ¹³ Masi n'laikhan'no nahira: "Ohoove Zacarias, kontha mavekelowa ahin'wiya amwara, Isabel, anahala on'yara mwana, niwe onhala omwihana Joao. ¹⁴ Wde on'hala okhala otheliya ni nukhala sana, ni athu entji anahala otheliya owariyawawe. ¹⁵ Mana yena n'kokhala mulupale n'menthoni mwa Pwiya, khan'hala ovuriya nipha, ni tjovuriya tjowawa, ni n'mirimani wanumwanawe, yena n'kokhala otjariya n'nepa n'thakathifu. ¹⁶ Entji wayayo athu owisrael anahala wahokolela Apwiya, N'lukuya. ¹⁷ Yena nahala orwa oholo wa Pwiya mwin'nepani ni ekuru tja Elias, wera ahokolose mirima tjan'na papa wa sanaya, ni wasariya athu ohin'wenla yethaka wo wathama nutjuwelatja wanasariya. Yena n'kopanka tjon'mo mo wera atheke athu nu wathenkatja mwa Pwiya". ¹⁸ Zacarias ahirela n'laikha: "kinkokhalana okupali tjani? Kontha mi kinlopwana owuluvala ni amwaraka eyakhatjaya tjorwa oholo". ¹⁹ N'laikha nahomwirela: "Mi ki Gabriel, kinhala eriyari ya N'luku ni kinorumiya wera kulume niwe ni wera kuwanele nyiya tjonanano tjorera. ²⁰ Ni onahala okhala ohulumatja ni khun'rwa wuluma n'paka nihuku nihalaya okhumenla n'ya, kontha kukupalale molumwaka, an'hala wiraniya owakathi waphiya". ²¹ Vano arhuwayo amwarihakan'no Zacarias, ayenani yanakawanatja kontha esiyani eriyawe owakathi mwintji n'keretja? ²² Vano wakhumaliyawe, yena khakwittinri wuluma nayenatja, thimana ahinyenyiha matata mo wera amananihe wahimwerya ethu yakhumenlale. Vano yowona wera yena ehavo yathonyeriyawe owakathi wariyawe n'pani. ²³ Yakhumen'lale tjo, owakathi mahuku wamalaliya n'tekwawe, yena ahohokolela owanyawe. ²⁴ Anavirale yayo mahukwayo, amwarawe nari Isarel ahokhalana erukulo ni yahivitha mweri mithano, iraka: ²⁵ "Ila Apwiya thipankaliya wa mii owakathi ayena wakonalyaya mo wera akumihe ehayatjaya oholo wathu". ²⁶ Mo mweri sitta woholela, n'laykha Gabriel nahorumiya ni N'luku epoma emotja yo Galileia, yihaniyaka Nazare, ²⁷ mwa eharusi emotja yari yapuleliya ni n'lopwana n'motja ihaniyaka Jose. Jose ari n'loko na Davi, ni eharusiyo yihaniya Maria. ²⁸ N'laykhan'no nahon'khumenla ni nahira: "Salama, we ori oreriya tjinene! Apwiya ari ni we!" ²⁹ Masi yena ahokhala owova tjinene mwaha ayo molumwayo ni ahokoha enan'nanila yosenlihiyela. ³⁰ Ni n'laykha nahomwerela: "Ohove Maria, kontha ohorerihiya ni N'luku. ³¹ Kontha onahala orupala erukulu ni onahala onyara mwana we onhala onvaha n'tjina na Yesu. ³² Yena n'kokhala mulupale, n'hala wihaniya mwana owirimo. Apwiya N'luku anahala onvava ehitje ya paapwe, Davi, ³³ Yena anhaal okhala mwe enupa ya Jaco mahuku ottene, ni omweniyawe khuhaal omalatho. ³⁴ Maria ahirela n'laykha: "Iyo iraniyale tjani, mii kinari eharusi?" ³⁵ N'laykha nahomwakhula ni eraka: "N'nepa N'ttakathifu ninawuwela, ni ekuru tjo wirimo tjinahala wuwara, thimana, ole ri thakathifu nahala oyariya ni nahala wihaniya mwana a N'luku. ³⁶ Vano Isabel, n'motja, tjitjan'mo hon'yara mwana nuluvanle. Yena ireliya epupa hana mweri sita nayarale. ³⁷ Kontha khivo yonrikela N'luku". ³⁸ Maria ahira: "kiti va mii nanteko Apwiya. Eyo yiranye wa mii n'toko nulumo ninyu". Ni n'laykha nahon'hiya. ³⁹ Yale mahukuwale, Maria ahokhuma arwaka mithethe tjo mwako, arwaka epoma yo Judeiya. ⁴⁰ Ni yena ahokela enupa ya Zacarias ni ahonseliha Isabel. ⁴¹ Owakathi ekhumenlaliya eyo, in'waka Isabel osenlihiya wa Maria, arii n'mirimani wawe ahuttupha, i Isabel ahotjariya ni N'nepa N'thakathifu. ⁴² Yena ahokhuwela ahimitjaka eraka: "We ori oreriya wa thiyana otene, ni woreriya ori n'hokorokhowo n'mirimaniwa. ⁴³ Onkhumenla tjani anumwanawe Pwiyaka owa okottola? ⁴⁴ Winwaliyaka osenliha wa mwana ri n'mirimaniwaka hotupha wotteliya. ⁴⁵ Ni oreriya thule rupalale kontha tjinawiranya n'toko tjithu tjotene tjahimiye na Pwiya. ⁴⁶ Maria ahira: "erowuaka enawathothopela Apwiya, ⁴⁷ Ni n'nepaka onatheliya tjinene na N'luku, mopoliyaka. ⁴⁸ Kontha yena hova wiyevihawaka wenan'na ye nan'teko, okhumela n'nava, makhotto otene an'hala okihana oreriya, ⁴⁹ Kontha ole ri okuru honpanka tjithu wa mi n'tjinanawe Ttakathifu. ⁵⁰ Ekiriritjawe tjinakhala tjinapuwa makhoto ni makhoto wa yale anomova. ⁵¹ Yena hothonyera owerwa nin'tatanawe. Hamwarisa ale ari owikukhuliha n'mupuweleloni waya ni n'mirimani waya. ⁵² Hakwanyula aholeli wahitjeni ni hun'nuwiha athu owiyeviha. ⁵³ Harupaliha anatala ni homola athatjiri wohavaha ethu. ⁵⁴ Hon'khavihera Israel, nan'tekwawe, upuwelelaka ekiriritjawe. ⁵⁵ N'toko yena tjeraliyawe owakathi wan'napapehu n'latto wa Abraao ni nikhottonawe mahuku otene!" ⁵⁶ Maria ahokhala ni Isabel mweri miraru nuhoolo tahokolelaliyawe owanyawe. ⁵⁷ Owakathi ophiyaliya wera Isabel an'yare mwana, yena ahon'yara mwan'lopwana. ⁵⁸ Amwathamananawe ni amutjiwe yahin'wa wera Apwiya yayintjenra ekiriritjaya mwaha wawawe ni yahothapa ni yena. ⁵⁹ Vano yakhumen'lale tjo: yettaka mahuku nane, ayenani yahorwa omuliha mwana. Ayenani yaphelatja omwihana Zacarias, n'toko apapawe. ⁶⁰ Masi anumwanawe yahuluma yiraka: "Mena, n'hala wihaniya Joao". ⁶¹ Yahireliya: "Khavo tjiritjihuva nihaneliya nen'no n'tjinan'no". ⁶² Ayenatja yahokoha apapa mowera atjuwela tjaphelelaya wera yena ihaniye. ⁶³ Apapawe yaholepela etharwa ni yahantikha: "N'tjinanawe Joao". Otene yahotikinihiya ni yeyo ethuwiyo. ⁶⁴ Yowakuviyatja, malakwawe yahotapuwa n'liminawe nahothukuwa, ni yena ahantja wulumatja, attottopelaka N'luku. ⁶⁵ Vano wahowa wova wathu otene yamwathamanane wakhalawe, ni otene yakhumen'lale yahomwarela n'thethe wonphantti wotjudeya. ⁶⁶ Otene ale yinwela iyo, yahokhala otikinihiya wa n'mirimaniwaya yiraka: "N'kokhala esiyani olamwanola? Manaa n'tata na Pwiya niri ni yena. ⁶⁷ Apapawe, Zacarias, yari otjariya ni n'nepa n'thakattifu ni yahohimiya yiraka: ⁶⁸ Attottopeliwe Apwiya, N'luku owisrael, kontha ahottola ni ahataphula athuwaya. ⁶⁹ Yena honivusera enyaka yowopola enupa ya Davi, nan'tekwawe. ⁷⁰ N'toko tjakhuluvelihaliyaya owakathi wokhalay, mwaha wayale arumeyawe athakathifu. ⁷¹ Yena nahala oniwanela wopoliya mwawananehu ni matata wayale otene aninttanyifu. ⁷² opankale iyo wera athonyere ekikiritjawe nanapapehu ni nupuwelelaka watana wethakathifu. ⁷³ N'no watanan'no ori olapha wawawe opankaliyawe Abraao, papehu, ⁷⁴ Wera aniaphule n'matatani wawananihu niwera nivarele n'teko wohova, ⁷⁵ Mwettakathifu ni esariya, eriyariyawe, mahuku otene. ⁷⁶ Ayo, ni we, mwanhima on'hala wihaniya n'rumeyi Owirimo, kontha we onhala orwa oholo wa Pwiya, weera wathenkatje athuwayo mwaha owawawe,, ⁷⁷ Ni opanka otjuweliya wopwa athuawe mwaha wolevenla tjothekatjaya. ⁷⁸ Nyo tjin'hala weranya mwaha wo kiriritjawe tjohimala wa N'lukukwehu, mwaha wayoyo thiri n'thuko wowirimo onawa n'paka eriyarihum. ⁷⁹ Wera arwee mwa yale ari n'piphini ni ari mwithutjini onokwa; yena n'kopanka iyo mo wera aniholele n'mwettani yo phiro yon'rethele". ⁸⁰ Vano mwanoyo hun'nuwa ni holipa mwinepani. Yena hokhala muthakoni, n'paka ahokhumela wowonya wathu owisrael.