¹ Tjinamalale nnya tjithunnya, Yesu ahoorwaa mphanthe nkina woo pahari yo Galileia, wiihaniyaka tjitjommo epahari yo Tiberiades. ² Athu entji yeera entharaka, kontha ayena yaanonatja mithoonyero tjapankaawe Yesu eriyari waale yawerennya. ³ Yesu ahoowela wa mwaakoni ni wonwo ahookoma narumeyaawe. ⁴ Epascoa, esukuhulu yo ma Judeu ,yahaathamela, ⁵ Yesu wawehalyaawe ni oonaka athu entji anweelaka ohoolowawe, ahoomwirela Filipe: '' Ninrwaa othuma vayi mikathe wira ala athwala alyatje?'' ⁶ Yesu oluumale eyo apheelaka othehatheha Filipe, kontha yena antjuwela ethu yaapheelawe opanka. ⁷ Filipe ahoomwakula: ''Mikathe eminya piili katjaahala otosa wo wira wokula nthu aphwanya vakaani''. ⁸ Nrumeyi mmotja, Andre, munnaawe Simao Pedro, ahoomwirela Yesu: ⁹ ''Ohaawo vaa nsilopwana mmotja orina mikathe mithanu ni ehopa piili; masi esiyani ela wa athu entjyaala. ¹⁰ Yesu ahaakula: ''Owonkomihe athwaayo''. Yahaavo athu entji ole opurole, vano athwayo yahonkomatja, ni yaari athu ekonto thanu. ¹¹ Vano Yesu ahokusa mikathennyo ni, onavahale mahala, ahaavahatja ale yonkomatjale. Enanna emotja ahoopanka niihopannyo, tjintji ntoko tjaaphelaya. ¹² Vano athwaale wavonalyaaya, Yesu ahoowiirela arumeyaawe: Nkupelelatje tjoohalahala tjootene wo wira nihihaleele hata ethu. ¹³ Vano,arumeyi yahoothukumaniha ni yahootjarihatja ethuthu kuumi na piili tjoohalahalannye tjaari tjo mikathe mithanunnye, tjohiinya nnye tjaakuralyayannye, ¹⁴ athwaale woonalyaya nthoonyero Yesu wapankaalyawe, yaheeratja: ''Ola ti namaloha eekhweeli aahala owa wa tuniyani''. ¹⁵ Vano Yesu woonalyawe wira ayena yaaphela onweela onvara ni makutje wiira ampanke mpewe, aahokuma veekawe thotho arwaaka omwakoni. ¹⁶ Waphiyalyaya ohiyu, arumeyaawe yaahorwaatja onrathani. ¹⁷ Ni anakelatjale nkalawani, yaheethatja niipahari erwaatjaka o Cafarnaum. Waahoripela yooyo okatyuyo, ni Yesu aari ohinawa waaphwanyatja. ¹⁸ Ni nlathu wo pyoo yulupale yaavutjelela, epharyaa yaahokala niinkitho ¹⁹ Vano amwiithutjaale weethalyaya wookhalaka shiriini na thanu walaani talathiini tjeethalivelo, yahoomonatja Yeesu eethaka watjulu epahari awaaka wowaathamela ekalawa, ni yahoovatja. ²⁰ Masi Yeesu aheerelatja: Ti minnyaano! mwiikale nuwoova''. ²¹ Vano, ayena yahoomwakelela nkalawani, ni wowaakuvyaatjeene ekalawa yaahophiya waarwaya. ²² Nihuku nowaakulela, athu yaari mpanthe nkanaku woo pahari yahoonatja wiira kiyaariwo ekalawa ekina wonwo, ohiya emotja yahaakelalyaawe Yesu naarumeyaawe, masi arumeyaawe yarwaalyaaya veekaya. ²³ Masi tjihaavo ekalawa tjaakuma o Tiberiades wathamela opuro ayena waakuralyaya nkathe okati apwiya waavahalyaya mahala. ²⁴ Vano athwaale wonaalyaya wira hata Yeesu hataa amwiithutjaawe kayaariwo wonwo, yahookelatja mmakalawani ni yahoorwatja mpaka o Cafanaum ampheelatja yena. ²⁵ Ni anamphwanyale mpanthe nkina woopahari, ni yahoomwirela: ''Rabi, mphiyalee yaakani nno?''. ^{26 27} Yesu ahoowakula, eeraka: ''Weekhweli, weekhweli, nyuu mwinkipheelatja, kahii nlathu wowoona mithoonyero, masi nlathu mookuratja mikathe ni moorupalatja. Mwiivare nteko mwaha wo yoolya emmala, masi mwaha wo yoolya enkaliha okumi woohimala, yeeyo mwana a nthu onrwaawe woovahani, kontha Nluku, Paapa, ohonthitheerya. ²⁸ Vano, ayena yaheeratja: ''Nipankeke esiyani wo wira nivaree miteko tja Nluku?''. ²⁹ Yesu ahaakula: ''Ola ti nteko wa Nluku: Wo wira mwinkupali ole yena onrumalyaawe. ³⁰ Vano, ayena yaahomirelatja: ''nthonyeeroni onpankaa, wo wira noone ni nuukupali wee? Onpanka esiyani? ³¹ asipapeehu aholyaatja nkathe wuuthakoni, ntoko tjilepiyaya: 'Yena ohaava olyatja nkathe wo wiirimu'''. ³² Vano, Yesu ahoowakulatja: ''Weekhweli, weekhweli, kinawuuhimerani wiira kahiena Mose oovahaleni nkathe wo wiiimu, masi ta papaaka anuvahani nkathe weekhweli wa Nluku. ³³ Kontha nkathe wa Nluku tuule onkuma wiirimu ni onvaha ekumi watuniyani''. ³⁴ Vano ayena yahoomwiirelatja Yesu: ''Pwiiya nnivahe nanlelo yooyo nkathyooyo''. ³⁵ Yesu aheerelatja: ''Minnyaano ti nkathe weekumi, ole onkiweela mi konrwaa okalana etala, ni ole okikupali mi kanrwaa okalana nthona. ³⁶ Masi, minnyaano kowiirelani wira mookona, masi nanlelo kamkupanli. ³⁷ Otheene yoole apaapa ankivahaaya onaarwaa okiweela mi, ni ole onkiweela mi , minnyaano nkinrwaa onrihela ota. ³⁸ Kontha kinkuma wiirimu, kahii wo wira kipanke enthuunaka, masi othuna wa yoole okirumale. ³⁹ Ni nno tuuthuna wa yoole okirumale, wo wiira kihin'halele hata mmotja wo yaale otheene okivahalyawe, masi wo wira awuunwelelihe nihuku noomalela''. ⁴⁰ Kontha nno tuuthuna wa papaaka, wira othene onmoona mwaana ni yena akupali, okalane okumi woohimala; ni Minnyaano kinaarwaa omunweleliha nihuku noomalela''. ⁴¹ Vano, ma Judeu yammwaapa yena kotha anoomwira: ''Minnyaano ti nkathe okuruwale wiirimu''. ⁴² Ayena yeeratja: ''Kahiyena yoola Yesu, mwaana a Jose, yooyo apapaawe ni amaamawe ninaatjuwelehu? Vano oneera toko tjani wira: Minnyaano kikuruwale wiirimu?''. ⁴³ Yeesu ahoowakulatja: ''Muhaapatje yayooru. ⁴⁴ Kaavo nthu mmotja onkitiri okiweela mi, woohiwaaniya naapaapa akirumale, ni mi kinaahala omunwenliha nihuku noomalela ⁴⁵ .Ni woolepiya mwaanamaloha: Yaayo othene anrwaa osomihiya ni Nluku. Othene aneera yinwaka ni yithutjaka wa apaapa ankiweela mi.' ⁴⁶ Kahii wira ohaavo otokale owoona apaapa, waahukala ole onkuma wa Nluku; Yooyo ohowoona Apaapa. ⁴⁷ Niikhweli, niikhweli, kinawuhimerani wira ole onkupali ohaana okumu woohimala ⁴⁸ Minnyaano kinkathee weekumi. ⁴⁹ Asipaapennyu aholyatja nkathe wuuthakoni, ni aakhwatja. ⁵⁰ Oyoyo ti nkathe okhumale wiirimu, wo wiira ole onrwaa olya ohikhwe. ⁵¹ Minnyaano ti nkathe nkumi okhuruwale wiirimu. Ole onrwaa olya yoola nkathyoola,onahala okhala mahuku mentji. Nkathe kinrwaaka onvaha minnyaano tiiruthwaaka yeekumi yowatuniyani. ⁵² Ma judeu yaahorusatjiya yaayoru, ni yahoopatjera okohatja yiiratjaka: ''Ola onhala onivaha tjani eruthwaawe hinnyaano olya?''. ⁵³ Yesu, vano, aheerelatja: ''Weekhweli, weekhweli, kinawuhimerani wira mwaahilye eruthu ya mwaana a nthu, ni owurya ephomyaawe, mwaiinkalana okumi wo nyennyuva. ⁵⁴ Ole onlya ruthwaaka ni onwuurya ephomyaaka ohaana ekumi yoohimala, ni mi kinamunwenliha nihuku noomalela. ⁵⁵ Kotha eruthwaaka tiyoolya yeekhweli, ni ephomyaaka tiyowuuriya yeekhweli. ⁵⁶ Ole onlyaa eruthwaaka ni onwurya ephomyaaka onkala nimii, nimi ni yena. ⁵⁷ Tjitjommo ntoko apaapa tjikirumalyaya, ni ntoko kinkaalaka nlathu wa paapa, Ole onlyaa nlathu wawaka tjitjommo nlathu wawaka onaahala okala. ⁵⁸ Ola ti nkathe okuruwale wiirimu kahiyena ntoko ole sipaapennyu alyatjalyaya , ni akhwatjaka. Ole onrwaa olya ola nkathyoola onaha okala womahuku oothene''. ⁵⁹ Yesu oluumale nnya tjithunnya o Sinagoga, okati waasomiha o Cafarnaum. ⁶⁰ Vano, arumeyaawe entji, winwalyaya eyo, yaheera: Noolipa nna nuulumonna; tipani onrwaa winwa? . ⁶¹ Masi Yesu, atjuwela veekawe wira arumeyaawe yanaapatja nlathu wo yooyo mwahooyo, aheerelatja: ''Ela enawuuthekihani? ⁶² Ni mwamoona mwaana a nthu awelaka waaryawe ekalayi? ⁶³ Ti nnepa nthakathifu onvaha okumi. Eruthu kinwaana efaita. Moolumo kinuuhimeryakani ankala nnepa ni ekumi. ⁶⁴ Nanlelo ahaavo eriyarinnyu ahinkupali''. Kontha Yesu antjuwela ekumelo alee yahankupali ni ole arwaa onvariiha. ⁶⁵ Yena aheera: ''Pimaana kiiraka wira kaavo onkitiri okiweela, ahiikela wira ovahiyee napaapa''. ⁶⁶ Enavirale eyo, arumeyaawe entji yahohokolyaatja ni kayeethale tho ni Yena. ⁶⁷ Vano Yesu, aheerela kuumi neelyaale: ''Niyuu mwimpheela okumatja tjitjommo?'' ⁶⁸ Simao Pedro ahaakula: ''Pwiiya,ninhala orwaa wapani hin? maana ti nyu nrina moolumo eekumi yoohimala, ⁶⁹ ni hinnyaano ninaakupali, ni niwilee nitjuweka wira mwaa thakathifu a Nluku''. ⁷⁰ Yesu ahaakula: Minnyaano akuthanlaleni nyu, okuumi neeli, mothenmo mmotja ohokale sotwani''. ⁷¹ Yena amuulumela Judas, mwaana a Iscariotes, maana ahala okala yena muhina wookumi neeli, arwaa onvariiha.