¹ Tjinavirale nnha tjithunnha, Yesu aahowa thootho waamwithutjihi opahari yo Teberiades; Tjoo yena taawalyawe: ² Simau Pedro aari ni Tome, eehaniya Didimo, owannhawe o Cana yo Galileia, asaana a Zebedeu, ni amwithutji akina eeli a Yesu. ³ Simau Pedro aaheerelatja: "Kinrwaa otonta". Ni ayena yaahomwirelatja: Nihinnhaani ninrwaa wamotja niwee". Ayena yaahorwaatja ni yaahokelatja nkalawani; massi yoole ohiyuule kayaaphwanhale ethu. ⁴ Wasalyaaya, Yesu aari opharyaa, massi amwiithutji kayaatjuwela wira aari Yesu.. ⁵ Vano Yesu aaherela: "Amwaavano n-haana ethu yoophela olya?". Ayena yaahakula: "Mena". ⁶ Ni yena aaherela: "N-rihele mnthavi mphanthi wonlopwana wo kalawa, ni nnaahala ophwanha". Ayena yaahorihelatja nthavinne, mpaka kayaakwitinri opurula nlathu wowintjiva ehopannho. ⁷ Vano ole mwithutji anfentaawe Yesu aahomwirela Pedro: "TaaPwiya". Simau Pedro winwaalyawe wira yaari Apwiya, aahowara ekuwotjawe, maana aari pwitipwiti, ni aaherihela mpahari ni amwiithutji akina yaahowa nkalawani (maana yaari ⁸ wakiviru niithaya, hataa eminha piili tjeethalivelo), yapurulatjaka nthavi nootjara ehopa. ⁹ Wakhuruwatjalyaaya, yaahonatja vale nkathe ni ehopa wamooroni. ¹⁰ Yesu aahelatja: "Nwaanatje ehopa nvaratjalennhu nanaano". ¹¹ Simau Pedro aahowela nkalawani ni aahopurula nthavi, tjinatjanre ehopa eminha wo hansiini na thaaru tjuulupaleru; tjanookhalaru tjintji katjaapwesale nthavinno. ¹² Yesu aaherelatja: "Nwaatje mwalyatje".Kaavo mwiithutji mmotja ankohale wira: We tipani? yatjuwelaka wira yaari Apwiya, ¹³ Yesu aahathamela, aahokusa nkathe ni aahavahatja; ni aahopanka enanna emotja niihipannho. ¹⁴ Ela yaari ekwaha yoneeraru Yesu wawenlyaawe amwiithutjyaawe onavuwenlale eriyari ya athu ookhwa. ¹⁵ Vano ayena walyaatjalyaya, Yesu aahomwirela Simau Pedro: "Simau, mwaana a Juwau, we onaakifenta woovirikana ala akinaala? Pedro aahomwaakula: "aayo, Pwiiya, nhu nnatjuwela wira kinawufentani". Yesu aahomwiirela: Olihe epwithipwithitjaka". ¹⁶ Ahonkoha ekwaha yonayeeli: Simau, mwaana a Juwau, we onakifenta?". Pedro aahakula: Aayo, Pwiiya, nhuu nnatjuwela wira kinawufentani". Yesu aahomwirela: Ohakele epwithipwithitjaka. ¹⁷ Aahomwirela ekwaha yonathaaru: Simau, mwaana a Juwau, we onaakifenta? Pedro aahotjukula nlathu wookohiya ekwaha yoneeraru amwiirelaka: We onakifenta? Ni aahomwiirela: Pwiiya, nhuu nnatjuwela tjithu tjooteene; Nhuu nnaatjuwela wira kinawuufentani, aahomwiirela Yesu: Olihe epwithipwithitjaka. ¹⁸ Weekhweli, weekhweli kinawuhimeera wira okati waaryaa mwaavano, we waawara ni weetha ntokoo tjapheela; massi wuuluvanlyaa, onarwaa othaphula matataa ni nkina onrwaa wowariha, onrwaa woorwaana opuro ohinthunaa orwaa". ¹⁹ Yesu aahimyaale eyo apheelaka on-himeera manannani nookhwa aarwawe Pedro onvuwiha Muluku. Onuulumale eyo, yena aahomwirela Pedro: "Okithare". ²⁰ Ni arukunuwaka Pedro, aahomoona mwiithutji anfentesaawe Yesu, yooyo anrupenle wakhakhaatjaniwawe okati waaliya nkathe waapwiya, eeraka: Pwiiya, tipani onrwaa woovarihani? ²¹ Pedro wamonalyaawe yooyo, aahomwirela Yesu: Pwiiya, vano ola, esiyani enrwaa onkumenla? ²² Yesu aahomwaakhula: "Minnhaano kapheela wira yena akhale mpaka wanwaaka, enuutjukuliha esiyani?, Okithare we". ²³ Vano yaahomwareela ela ehapariila eriyari yaasunna, wira ole mwiithyule kaahala okhwa. Massi, Yesu kaamwiirenle Pedro wira mwiithutji nkinoole kaahala okhwa, massi eerale: "Minnhaano kapheela wira akhale mpaka wanwaaka , enuutjukuliha esiyani? ²⁴ Ola timwiithutji onvaha osaahiti wo tjennha tjithunnha, ni anthikhale, ni hinnhaano ninaatjuwela wira osaahityaawe tiweekhweli. ²⁵ Tjihaavo tjitjommo tjithu tjikina tjipankalyaawe Yesu. Yiiriyaka tjaahanthikiya wo kula ethu, kinawoona ntoko hataa etuniya kayaahala okwitiri osunka epuukhu tjaarwaa wanthikhiya.