¹ Wopatjeroni nari nulumo, ni nulumo nari ni Muluku, ni nulumo ari Muluku. ² Yena ahavo nen'ne nen'ne ni Muluku. ³ Tjithu tjotene tjapakiye ni Yena, ni wohikhala Yena khivo epan'kiye yowipaka. ⁴ Wa Yena yahavo ekumi, ni ekumiiyo wari n'thuko wa pinatamo. ⁵ Ni n'thukoyo onamwalela n'piphini; ni epiphiyo khin'tjuwelale. ⁶ Ahavo n'lopwana arumiye ni Muluku, n'tjinanawe ari Joao. ⁷ Yena wale n'toko namona, wera ahimiakatje mwaha wo n'thuko, wira otena wa yenani athune. ⁸ Yena khari n'thuko; massi anorumiya wira ihimiakatje n'thuko. ⁹ Wari n'thuko we khweli, wanawamwalela apinatamu otene am'mwa n'tuniyani. ¹⁰ Yena ari n'tuniyani, ni etuniyeyo epakiye ni yenani; ni etuniyeyo khin'tjuwelale. ¹¹ Awelale eri Yawawe, ni awaweiayo khamwakhen'lale. ¹² Massi otene yale Amwakhen'lale, ni ethunaka n'tjinanawe, haava ekuru wokhala assana a Muluku. ¹³ Yayo khayariye m'phomeni, wala wothuna wo ruthu, hata othuna wa pinatamu,massi wa Muluku. ¹⁴ Ni nulumon'ne nihipan'ka eruthu, ni nihokhala ni hivano; (ni nihona wariawawe, n'toko opatjeria wa papawe) otjaria mahala ni khweli. ¹⁵ Ni Joao nan'himiakatja Yena, ni nakhuwela iraka: Ola phiyole an'himiakole: Nowa ottiliwaka phiri mulupale okivikana mi; kontha phiri opatjera. ¹⁶ Kon'tha eparakhaawe nihakhen'la otene hata mahala ni mahala. ¹⁷ Kon'tha ekettelo yahovahiya eriyari ya Mioses; massi mahala ni khueli tjiwale eriyari ya Yesu Kristu. ¹⁸ Khavo monale Muluku, opatjera, ari vamotja wa eriyari wa papawe, yena Phin'himiakatjale. ¹⁹ Ni yola phiri enamona ya Joao, okathi ma judeu warumaliaya anamukutho ni malevita o Jerusalem, wira yan'kohe: We opani?. ²⁰ Ahohimia, ni khakhottale; ahohimia: Akinakhala Kristu. ²¹ Ahokohiya: Vano opani? Weelia? Ni yena hira: Akihiyena. Ayena ahiratja: We oporofeta? Ni yena ahakhula: Akinakhala. ²² Vano yahomwirela: Wopani? Wira nawakhule yale anirumale. On'himiani omwanene? ²³ Hira: Mi kin'tju nin'khuwela muthakoni: N'lokihere ephiro ya pwiya, n'toko tjihimaliawe porofeta Isaias ²⁴ Yale yarumiye yari ma fariseu. ²⁵ Ni yahonkoha, ni yahomwirela: Vano ompattiseerani, ni we khunakhala Kristu, wala Elias, hata porofeta? ²⁶ Joao ahowakhula, iraka: Mi kimpattissa ni matji; massi eiryariwinhu, havo hinontjuweleen'nhu. ²⁷ Yoyo phin'mwa ottuliwaka, mi akinphwanela otaphula mikhoyi tjo sapatho tjawe. ²⁸ N'nha tjithun'nha tjikhumenlale o Betania, mphantti nkhwawe wo Jordao, wenwe Joao wapattissawe ²⁹ Nihuku nikhwawe Joao homona Yesu awaka, ni ahira: Ola mwa pwithi-pwithi a Muluku, nokumiha etampi ntuniyani. ³⁰ Ola phiyole an'himiakoole: Ottuliwaka nawa nlopwana yoyo ahavo mi kihinaya okhala; kon'tha phipatjenre kihinakhala. ³¹ Mi akantjuwela; massi wira atjuweliye Wisraeli, phimana kawa kipattissaka ni matji. ³² Ni Joao honvahera namona, iraka: Mi kihona N'nepa ntoko ekhuntta ekhuruwaka wirimu, yahom'morela. ³³ Ni mi akantjuwela, yole kirumale opattissa ni matji, yoyo hokirela: Yole n'halaa omona onkhuruwelaka N'nepa, ni om'morelaka, yoyo phi mpattissa ni N'nepa Nttakattifu. ³⁴ Mi kihona ni kihinvaha namona, wira Yena Mwana a Muluku. ³⁵ Nihuku nikhwawe Joao ahokhalatho wen'we ni awinthutjiawe eeli. ³⁶ Ni amonaka Yesu aviraka, ahira: Ole mwa pwitti-pwithi a Muluku. ³⁷ Awinthutjiawe eliaale yahin'wa yele Joao yahimaliameele, ni yahon'thara Yesu. ³⁸ Ni Yesu, ahorukunuwa, ahowona an'tharaka, howirela: N'nophelani? Ni ayena ahomwirela: Mwinthutjihi n'nokhala vaii? ³⁹ Ahowirela: Nkawani, moone; Yahorwa, ni yahona nipuro nakhalawe, yahokhala ni yena nen'no nihukun'no; kontha wahattamela ewora yo na khumi. ⁴⁰ Ari Andre, n'himawe Simao Pedro, ari wa yole yamwinwale Joao ulumaka, yantharale Yesu. ⁴¹ Yena ahomphwanha mulupaliawe Simao, ahomwirela: Nihophwanha Messias. ⁴² Ahonkussa wa Yesu. Ni Yesu, am'mwehaka, hira: We Osimao, mwana a Joao; we o'hala wihani Cefas. (entaphulelia Pedro). ⁴³ Nihuku nikhwawe Yesu ahorwa o Galileia, ahompwanha Filipe, homwirela: Okithare. ⁴⁴ Ni Filipe ari o Betsaida, epoma ya Andre ni ya Pedro. ⁴⁵ Filipe homphwanha Natanael, homwirela: Nihomphwanha yole Moises mwantikhaliawe nketteloni, ni ma Porofeta: Yesu, mwana a Jose, oo Nazare. ⁴⁶ Natanael ahokoha: poti ehavo ethu yorera oo Nazare? Filipe homwirela: Nkawa, awoneke. ⁴⁷ Yesu homona Natanael awaka, homwirela: Khweli wisraelita, khurina ohamini! ⁴⁸ Natanael hira: Wakitjuwela vai? Yesu homwakhula, ni homwirela: Filipe hinathi owihana, mi kihowona onari m'mirihina wo mphera. ⁴⁹ Natanael hakhula, ni hira mwinthutjihi, we Omwana a Muluku, we Ompewe oo Wisrael! ⁵⁰ Yesu homwakhula, hira: Nlattu kinowirelwira kihowona m'mirihina mphera, phinthunaa? We onahala wona tjithu tjulupale tjovikana n'nha. ⁵¹ Ni homwirela: Vekhweli kinawuhimeriani wira n'nahala wona erimu enahuliale, ni malaikha a Muluku ewelaka ni ekhuruwakawa Mwana anthu.