¹ Ohotakhaliya we, namatankula ohinatankuliya! Ohotakhaliya we, nawootha ohinaaya othepiya! Wun'nheela otankula, onaahala otankuliya. Wun'nheela wootha onaahala, othepiya. ² Apwiya, nkhale nihi; ninaawanriihani! Nkhale moonueehu khula owitjissu, nkhale woopwaawihu okathi womahuviho. ³ Ninrunkulu muulupale atthu anaatthawa; mwiivuwaka, atthu anaavavaryaa. ⁴ Tjoohalatjinhu tjin'hephiya phanka etjoroope tjin'hephaaya; atthu anaatupha phanka etjoroope tjintuphaaya. ⁵ Apwiya phari oottottopeliya. Ayena ankhala wiirimu. Ayena anaahala otjariha essaria nin'nema oSiao. ⁶ Ayena phan'hala okhala, Siao, nlipihero won'mattaniwinhu, woopwaa mwintji, otjuwelatja nootjuwela; owoovawinhu Apwiya phinikhupininhu. ⁷ Nkawehani, yaarumaleenhu ankhuwela n'mittalani; anamavahatjera yanriiha nrettele, an'nunla tjinene. ⁸ Eparapaara tjiri tjowoonyaa, khaavotho ankhuma woorwaa ottayi. Mavuku anaapwessakatjiya, anamoona anaatanhifwiya naatthu khan'hissimwiya. ⁹ Elapo enaattettemela; naatthu anawoona ehaaya; Sarom nkhala phanka othako; Basa ni Carmelo tjinaahaleela mataakhurwaaya. ¹⁰ Vano, kinaahala ovuwa, Apwiya phaneera; Vano kinaahala ottottopeliya! Kinaahala ovuwihiya! ¹¹ N'norupala nooyara tjitthu tjoohikhala; ephumutjinhu mooro on'hala woopahani. ¹² Atthu ankoopahiya phanka tjinpahiyaaya makhuva, phanka mitathi tjinthikiliyaaya tjipahiyaka. ¹³ Nhu n'nokhala ottayi, mwiiwe epankalyaaka; ni nhu nri wakhiviru, muupuwele oweryawaka. ¹⁴ Anatanpi oSiao an'noova; atthu omwiipiphini an'noova. Tupani wahi nkookhala nimooro woopaha. Tupani wahi nkookhala nimalimi omooro oohimala. ¹⁵ Yoole neetta nssariyani ni uulumaka ekhweeli, yoole nkhotta tjoophwanha tjowaakuvyaa, yoole nkhotta nimatataawe tjitthu tjonpuho, nttiyenla manharwaawe wiira hiiwe tjootakhala tjoomwaressa ephome, ni ntthuka meethwaawe wiira hoone yootakhala. ¹⁶ Yooyo n'hala okhala wiirimu; mapurwaawe onkhavihero ankookhala mwala woolipessa; eyoolyaaya nimaatjyaaya ankookhala oohimala. ¹⁷ Meethweenhu anaahala omoona mweene oreerawawe, niilapo yooteene. ¹⁸ Nrimeenhu onaahala wuupuwela woopopihiyawinhu. Mayowantikha rivayi, yoole aaphimatja nssurukhu. Rivayi yoole aalikela. ¹⁹ Khan'nohalatho woona atthu yaale yoopatjapatjani, atthu oluuka tjoovirikana, ahin'wiiweenhu. ²⁰ Nkanwehe Siao, epooma tjossukuhuulutjinhu; meethweenhu anaahala omoona Jerusalem phanka nipuro noomalelyaa, phanka heema miritjaya tjihinkumihiya wala mikhoyitjaya tjihinkwattuwa: heema hin'hala okumihiya. ²¹ Ohiyavaa, Apwiya, ahaana oweryawaya, an'hala okhala nihiivano nipuro nomwaamuro tjuulupale, mon'mo ekalawa tjihin'halaaya weetta wala naviyu okhotto n'hinhalaawe weetta. ²² Kontha Apwiya nphukiihu, Apwiya nkhaviherweehu, Apwiya phaamweneehu; Ayena anaahala onoopola. ²³ Mikhoyitjaya tjiri tjoohilipa; khatjinlipiha mapurwaaya. Tjarwaa tjakawaniyaka tjoohala, hata naatthu ooheetta anaahala okussa nphanttyaaya. ²⁴ Atthu khan'hala wiira: Kinaawereiya, kontha atthu ankhala vale an'hala okhalana tjoovaratjaya tjoolevenliya.