¹ Mwene naahala ohoolele nin'nema, ni akhulupale anaahala ohoolela niissariya. ² Khula ntthu nkookhala phanka nikhuku nophyoo ni ntthawenlo woluuvi, phanka nphwinko womaatji nipuro nowuuma ni phanka ntthuutji womala muulupale. ³ Vano, meetho aatthu ahinoona khan'hala oripeleliya ni maaru aatthu ahinoona an'hala okhala owiiweeha. ⁴ Ntthu oohitjuwelatja naahala okhalana otjuwelatja nintthu ookokomelatja naahala wuulumatja ratta. ⁵ Nlolo khan'hala ottittimihiya, owootha khan'hala ohissimwiya. ⁶ Kontha nlolo nuuluma tjoololo, wanrimaniwawe, nvara tjoonhala ni nawaahanhuriha Apwiya. Yena nan'hiya natala niitala ni nantthona. ⁷ Tjoovara tjantthu owootha tjinkhala tjootakhala; yena nvara tjootakhala wiira an'morihe massikhini niwootha, hata yoolepela yamassikhini ekhale yossariya. ⁸ Massi ntthu oophwanela nuupuwela tjitthu tjoophwanela mwaha watjoovaratjawe, yena naahala ottottopeliya. ⁹ N'vuwe, athiyana oohikutakuthyaa, mwiiwe ntjuunaka; ni nhu, assaana oohiwatjawatja etthu, nkiviriyane. ¹⁰ Ohinamala mwaakha, nhu athiyana oohiikhikitjera, okhuluvelawinhu onaahala okwanhuliya, ohepha khunkhala, ni khun'hala okhala nthanlo. ¹¹ Mooveke, athiyana; nkutakuthyeeke, nhu n'nokhala ookhuluvelessa; n'hiye owara ekuwo tjooyevatja ni n'ware etjaakho n'yuununimwinhu. ¹² N'nohala weetta n'mamattani nimapuro ooruweriya. ¹³ Elapo yaatthwaaka enaahala otjara tjitthu tjooreeraru, niitthoko tjooteene nootteeliya, elapo yooreeressa. ¹⁴ Kontha enupa yuulupale enaahala othamiya, elapo enkookhala othako; mwaako ni mapuro makhwaawe ankookhala makhuku oohimala, enama tjontakhwani phun'halaaya okhala, ¹⁵ n'nepa wowiirimu npaka wan'nikhuruwelaaya, ni othakooyo okhale nipuro noonaanela, ni nipuro noonaanela nikhale nowintjiva. ¹⁶ Vano, essariya enkookhala moothakoni, nin'nema ninkookhala mooteene. ¹⁷ N'hokorokho non'nema ninkookhala nrettele, efayitaaya essariya onkookhala omumula ninkhuuvelo, woohimala. ¹⁸ Atthwaaka ankookhala ninrettele, mapuro ookhukuvelyaa nimapuro oolipessa. ¹⁹ Hata wanrupaaya epula yomaluku, ekwanhulaka epooma yooteene, ²⁰ n'naahala oreerihiya, nhu n'naala, ni n'nohiya enama tjilyaaka.