¹ Nuulumo nooDamaco. Damasco naahala ohiya okhala epooma ninkookhala nipuro notjitthu tjootakhala. ² Epooma tja Aroer tjinaahala othamiya. Ankookhala mapuro oopheela okhala enama ni khaaavo nkowoopopiha. ³ Mapuro oolipessa anaahala orimeela oEfraim, omwene wooDamasco naatthu oSiria; ayenatja ankookhala phanka waarya waatthu owiisrael. N'na nuulumo naApwiya. ⁴ Nen'ne nihukun'ne, waarya waJaco onaahala omala ni naahala wootta. ⁵ On'hala okhala phanka ntthu ootthukumaniha epyoo ni ahephaka mitathi nimoonuaawe. Phanka ntthu n'hepha mitathi n'mwaamuro Refaim. ⁶ Phimaana, mitathi tjikhwaawe tjinaahala ohin'ya, phanka tjinpankiyaaya tjikhwaawe tjitathiyaka tjimoraka: tjin'nokhalaka piili wala tthaaru woomaleloni, tjesse wala thanu n'mirittani tjoorekama wonri wowiima n'na nuulumo naApwiya, Nluku oIsrael. ⁷ Nen'ne nihukun'ne atthu anaahala waattehatteha awunpale ni meethwaaya an'hala oweha wanttakattiifu oIsrael. ⁸ Ayenatja khan'hala oweha waltaare, nteko waon'matataniwaya, wala khan'hala oweha matataaya evaralyaaya, mapotto aattontto wala ethoonhero yontjuwa. ⁹ Nen'ne nihukun'ne, mapurwaaya oolipa anaahala othamiya phanka mapuro makhwaawe, yaathamiye mwaha waassaana oIsrael. Tji'naha okhala woohinteko. ¹⁰ Kontha n'honliyala Nluku owoopwaawinhu ni n'hokhotta mwala wayoole ori nlipiherweenhu. Vano, hata wanaaleenhu tjitthu tjooreera ni nruweryaka tjuulupaleru, ¹¹ mwaalavale, nkhikitjeraka noorattavenla, tjinaahala wuunuwa, massi khun'hala okhumenla ohepha nihuku noohanriiha. ¹² Mwiiwe! N'no onhakula waatthu entji, an'nhakula phanka onhakula wopahari, othukumela wolapo, on'nhakula phanka maatji! ¹³ Elapo tjintji tjinaahala onhakula phanka onhakula womaatji. Nluku naahala waatthukela ni anaahala otthawela ottayi; an'hala oveverussiya niiphyoo phanka mikhutta n'mamyaakoni, phanka etakhwa yowuuma niiphyoo yuulupale. ¹⁴ Wiilavale, ntakhali naahala owa! Wahinaaya ossa anaahaala orwaa. Nphantte waatthu an'nihuviha, omalela wantthu n'niyera.