¹ Mwaaveleelihe atthu wankhulupale onlaponi, okhuma Sela, woothakoni, npaka mwaako wa mwaana Siao. ² Phanka assaanuni oohikhala ninipuro, tjitjin'mo athiyana ooMoabe ankootthawela moro Arnom. ³ Mwaamaaliheke! Ayena anawunla. Mwaathoonhere essariya; mwaavaheke ntthuutji phanka ohiyu onookhalaru othana; mwaassunkeke ootthawa ekhotto. ⁴ Ootthawa ekhotto oMoabe akhaleke ninhu; nkhaleke ntthawenlwaaya wantthu naakwanhula. Kontha okwanhuwatja wamala, ni yakhuma nlaponi yaale anaahuviha, ⁵ ehitje enaahala okhumenla yowaataana; ntthu akhumaka n'heemani mwaDavi naahala wookoma ninkhuluvelo. Yena naahala olamula arweelaka essariya ni avaraka yooreera. ⁶ Nin'niiwaka tjoovara tjaMoabe. Phimaana ntekwaawe moolumo oohiitthu. ⁷ Tjitjon'mo, atthu ooMoabe anamunla tjinene mwaha weetthu ekhumenlale nlaponimwaya. Nhu, nkhanle oovavaryaatja oomalela, munlele atthu oQuir-Haresete. ⁸ Mathala oHesbom ahuuma, niiritta tjoSibma. Ahooleli onlaponi ahonhakelatja eritta tjoothanliya, tjaarihiya ni Jazer ni tjaamwareela npaka moothakoni. Ni tjaanaamwareela npaka opahari. ⁹ Weekhweeli, kinaahala wunla ni Jazer mwaha womatta yaSibma. Kinaahala woomitjerani nimeethoryaaka, Hesbom ni Eleale. Kontha n'mamattaniwinhu mooteene mwaaruweryeenhu kihomaliha okhuwela woohakalala. ¹⁰ Otthapa noohakalala ohorimeela, nin'mamattani khuuvotho ohakalala. Khaavotho npheela onhakelatja. Yaayo atthu yaanhakelatjaayo ohaamalela okhuwela wootteeliya. ¹¹ Nrimaaka on'notjukula mwaha waMoabe, nin'mirimanimwaka, mwaha wa Quir-Heres. ¹² Moabe iithoonhera wootjyaa nipuro noorekama, ni akelaka npaani woopheela ovekela, mavekelwaaya khan'hala wiiwanyaa. ¹³ N'na phinuulumo Apwiya nuulumalyaaya, khalayi, mwaha waMoabe. ¹⁴ Apwiya, ahuulumatjatho: N'hina woyaakha tthaaru, waarya waMoabe onaahla orimeela; mwaha waatthu entji, ankoohala ankookhala vakaani ni oohivara nteko.