¹ Apwiya anaahala omoonela ekiriri Jaco; Ayena anaahala onthanla tootho Israel ni anaahala onreerihela owanuwawe. Atthu oottayi anaahala waataana ni ankookhala nphantte wontthoko naJaco. ² Elapo tjinaahala waahokolossa atthu wonipuronaya. Ntthoko naIsrael an'hala waakhaliha anantekwaaya elapo yaApwiya. Ayentja an'hala waatthukela yaale yaavaralyaaya, ni anaahala waahoolela. ³ Nihuku Apwiya ninkowoomumulihaaya ohuva, ninteko onkhanhenriyeenhu ovara, ⁴ onaahala onttonkela mwene ooBabilonia ntjipo nomaveehon'na: Phanka tjiphiyalyaaya onkhitja tjoovaratjinhu. ⁵ Apwiya ahuntakatja nkopo weetakhali, owerya waahooleli, noorussiya ohaarakaliha atthu ni tjooweryaa, ⁶ noorussiya, yaanohoolela elapo yaawananaka woohaahiyenra. ⁷ Elapo yooteene enaamumula noomaalelyaa; ooteene antthapenla niitjipo. ⁸ Hata nimiri tjinawootthapelani; tjinaakhuwela: Mwamoreru, khaavo nakhuni n'mwa oniithikila. ⁹ Ekhapure enaawanriiha vathi. Mwaha wawaa, mamwene olapo yovathi akhwale, ni ohaavussatja n'hitjeniwaya yaari mamwene onlaponi. ¹⁰ Ooteene anaahala wuuluma: We ohotteetthyaa phanka hiivano. We ohokhala phanka hiivano. ¹¹ Eyuulupalyaa ehriheliya nkhapure nintju notjitthutjaa tjooruma. Nrepa niri vathiwaa, niikuwo tjihookhuneela. ¹² Phanka tjimoraleenhu wiirimu, etthonttwaa yonihuku, mwaana oowitjissu! Phanka tjiriheliyeenhu vathi, phinhu nphwanhale elapo! ¹³ N'huulumatja wanrimaniwinhu: Kinaahala owela wiirimu, kinaahala ottottopela ehitjaaka watjulu etthonttwa tjaNluku ni kinaahala wookoma omwaako wonthukumano womapuro oottaliva. ¹⁴ Kinaahala owela n'mahutteni; kinaahala wiikhaliha phanka Nluku owiirimu. ¹⁵ Phimaana, n'naahala okela nkhapure, ottayi niwiirimu. ¹⁶ Yaale an'hala owoonani anaahala wooweheehani. Ayenatja anaahala wiira: Phiyoola nlopwanoola aathukumeliha etthaya, malihatjale omwene, ¹⁷ khalihale othako olumwenku, kwanhulatjale epooma ni khaatthunihale atthu ootthukeliya ohokoleela n'mawanuwaya. ¹⁸ Ooteenetjaya, anrupa wonttittimiho, khula ntthu nipuronawe. ¹⁹ Massi nhu khanssikhiye mwaariheliye ota phanka etthu yoohiloka. Atthu ookhwa anookhuneelani phanka yoowariya, owiiviya niikatana, ari n'makhapureni. Nhu mwaari phanka nrutthu noonhakelatjiya. ²⁰ Khan'nohala otakaneela naayena n'khapure, kontha n'hokwanhulatja elapo ni n'hiiva atthu. Assaana aatakhali khankowiihaniyatho. ²¹ Waatthonkomanihere yootakhala assaanaawe! Mwaha watjoovara aassimutjaawe, wiira ahiikussenratje elapo woopheela otjariha olumwenku epooma. ²² Kinaahala waakhumenla n'na nuulumo naApwiya. Kinaahala okhweliha ntjina nooBabilonia, n'na nuulumo naApwiya. ²³ Kinaahala okhaliha nipuro nookhala enama tjontakhwani; kinaahala okwetja nin'melo wookwanhuwatja, n'na nuulumo naApwiya. ²⁴ Apwiya aholuphela: Weekhweeli, elkenlyaaka, enaahala wiiranyaa; tjinuupuwelaaka, onaahala wiiranyaa: ²⁵ Atthu oossiria kinaahala waakumiha nlaponiwaka ni, n'mamwaakoniwaka, kinaahaa waanhakeltja niinhaatjaka. Tjoovaratjaya tjinaahala orweeheliya ottayi, nimirinttitjaya ottayi waayena. ²⁶ Phinlamulo nilakeliye elapo yooteene, nin'na phintata nivusseriye elapo tjooteene. ²⁷ Kontha Apwiya phalakenle. Tupani n'hala winkittha. Ntatanaya ahovussa. Tupani n'hala waahiiha. ²⁸ Nlamulon'na niwaale mwaakha okhwalyaawe mwene Acaz: ²⁹ Filistia, ohitthape, kontha nkopo waawaatta ohuntyaakatja. Kontha ntithaari wonuaa onaahala otathuwa evili, nin'hokorokhwaaya on'hala okhala enuaa yoovava. ³⁰ Owantjera oyariya aamassikhini ankooliha enamatjaya n'mattanimwaka, naatthu oohuwa an'hala okhala oolipiheriya. Kinaahala wiiva etala ntithaaryaaya ni yeeyo enaahala owiiva ankoohala ooteene. ³¹ Nhu atthu onpooma munle, ooteenetjinhu n'nokookhala oothuluwa, Filistia; ninaawa nihutte nomwiissi, ni khuuvo othako woopheela otthawela. ³² Yowaakhuliyani ankoovaviyaaya arumeyi olapweele. Mwaahimeerye wiira Apwiya ahunpa Siao, ni mon'mo amassikhini anaahala ophwanha ntthawelo.