¹ Wooniheriya wooBabilonia, Isaias, mwaana Amoz, waakhelalyaawe. ² Mweemesse nthoonhero omwaako; nkhuwele nintju nuulupale, waayena; mweemesse matata wiira akele nmikhorani mwaatthu. ³ Kihaavaha ekettelo atthu yaatthapenlyaaka, kihiihana atthwaaka oowerya atthu oomaliha orussiyawaka, yaale antthapa wookivuwiha. ⁴ Mwiiwe onhakula waatthu n'mamyaakoni, phanka waatthu entji; ntju phanka nipuro noothukumaniya! Apwiya anawaalattula anakhotto. ⁵ Ayena ankhuma elapo yoottayi. Apwiya ari niikaputthi tjoopheela okwanhula elapo yooteene. ⁶ Munleke, kontha Apwiya ari wakhiviru; oowerya tjoteene anawaana okwanhuwatja. ⁷ Phimaana, matata ooteene khan'hala okhala ninteko ni nrima wooteene onaahala othuluwa. ⁸ Anaahala okhala nimikutakutho; ekwerere nimahuviho, phanka tjinoonaay owerya athiyana yiiyaraka. Anaahala owehana ntthu ninkhwaawe niikhovetjaya tjinaahala opharela phanka mooro. ⁹ Nihuku naApwiya ankookassiriya, noorussiya tjinene, woopheela ottarussa elapo ni waakwanhula anatanpi ankhala mon'mo. ¹⁰ Etthonttwaa tjowiirimu khatjin'hala opharelatho. Ntjuwa nin'hala ottipihiya khuma nankhuma, nimweeri khun'hala woonya. ¹¹ Kinaahala ottarussa olumwenku mwaha watjoovratjaya naalolo mwaha watjoonhalatjaya. ¹² Kinaahala omaliha watjoovara tjaatthu owiikukhuliha ni waamorissa atthu oovavarya. Kinaahala onthweeha ntthu phanka owooru. ¹³ Phimaana, kinaahala othukumeliha erimu, niitthaya enaahala okumihiya nipuronaya, mwaha wookassiriya waApwiya, nihuku noorussiyawaya. ¹⁴ Phanka enama enoomolihaniya ehirina n'hakheli, tjitjon'mo khula ntthu naahala waahokoleela atthwaawe nootthawela nlaponiwaya. ¹⁵ Wayoole nkoophwanhiya naahala wiiviya, ni wayoole nkoovariya naahala wiiviya niikatana. ¹⁶ Assaanaaya anaahala othikilanihatjiya yaawehaka; enupatjaya tjinaahala ohukhatjiya naassaaraaya. ¹⁷ Kinphowaakhumenla anakhotto oMedia kaattakan'ne, yaayo ahin'hala owatjemra eparatha wala oweheeha ewooru. ¹⁸ Eyuumatjaya tjinaahala wiivakatja ananttonpe. Khan'hala owoonla othunku assaana naanamwane. ¹⁹ Babilonia, owaamweleliya mooteene, wiittottopa waaatthu, onaahala omalihiya niNluku, phanka Sodoma ni Gomora. ²⁰ Khin'hala okhaliya, makhoto ooteene. Maarabe khan'hala waateka aheemaaya, wala ahakheli khan'hala omumuliha enamatjaya. ²¹ Massi enama tjontakhwani tjomuuthakoni tjinaahala okhala vaavaa. Assaanuni oototha ohiyu anaahala okhala n'matthokoniwaya; etjankaniinama tjontakhwani. ²² Enama tjuulupale tjontakhwani tjnaahala waahuviha, n'matthokiniwaya. Owakathyaaya ori wakhiviru; mahukwaaya khan'hala opitja.