¹ Wamalalyaaya tjitthun'nho, akhulupale yaahokiirela: Atthu owiisrael, anankuttho naalevita khayaahiyale atthu olapo tjikhwaawe nimapurwaaya: macananeu, maheteu, maperizeu, mamonita, amoabita, magipcio ni mamorreu. ² Kontha ayenatja yaahaakussa assithiyana ni yaahaatakanihera atthu ttakattiifu naatthu olapo tjikhwaawe, akhulupale nimahooleli yaari oopatjera. ³ Wiiwalyaaka, kaahaahula ekuwotjaka ninlayanaka kaahokumiha nmurumwaka ekharari tjonmurumwaka niirori. Vano kaahookoma niihaaya. ⁴ Ooteene yaale yoova moolumo aNluku owiisrael mwaha woohiiwelela yaahotakaneela wookomalyaaka niihaaya npaka okuttho woothana. ⁵ Massi, owakathi wookuttho woothana, kaahovuwa niwiiyevihawaka nkuwoniwaka ninlayanaka nowaahuwa, kaahokokhora ni kaaheessa matataaka waaPwiya, Nlukwaaka. ⁶ Kaahiira: Nlukwaaka, kinoona ehaaya ovussa ekhovyaaka koowehakani, kontha tjootakhala tjinawintjenrya nmuruniwaka, ni tjoovaratjihu tjinawuunuwa npaka wiirimu. ⁷ Okhuma mahuku aatthweehu okhalyi npaka n'nava, niri ookossa. Watjoovaratjihu, mamweneehu naanankutthweehu nihovahenriya nmatatani momamwene onlaponi, niikatana, mootthukiyani, niikhove tjohaaya phanka tjiryeehu olelo. ⁸ Vano, owakathi vakaani, ekiriri tjaaPwiya, Nlukweehu, yaahowa waahiya yaahanle noonivaha opuro wooreera. Yaapankeliye wiira Nluku amwaleele meethweehu noonikumiha npiphini. ⁹ Kontha niipottha, massi Nlukweehu khaniliyalale, kontha naanitaphulelaka waataanawawe. Ayena yaapankale tjon'mo ohoolo wamwene oPersia, woonivaha ekuru tjikhwaawe, wowiira nihatjule oteka ekapela yaNluku. Ayena apankale tjon'mo woopheela ovussa eluwani yonkhavihero oJuda ni oJerusalem. ¹⁰ Vano, Nlukweehu, nin'hala ohimyani yaviraka eyo? Niholiyala tjoorumatjinhu, ¹¹ tjooruma tjaavahaleenhu anantekweenhu, arumeyi, wiiraleenhu: Elapo enpheeleenhu okeleeyo yoohiphwanela. Ehotakhalihiya naathu ankhala mon'mo ji tjitthu tjinvaraaya. Nphantte ninphantte nkhwaawe, ahotjaliha tjootakhalatjaya. ¹² Vano, n'haathelihatje assaaneenhu naassaanaaya; ni n'hintjenre nrettele nookhala ratta, wiira nkhale oolipa ni n'lyaka yooreera yovathi. Tjitjon'mo anoottharenlani anaahala okhalana elapweeyo womahuku ooteene. ¹³ Phimaana, tjinavirale tjooteene tjiniweelale mwaha watjoovaratjihu tjootakhala, wowiira Nlukweehu akhalane tjoovaratjihu ni anihiyaka okhala. ¹⁴ Naanaatankanha tjoorumatjinhu noothelanatja wootakaneela naatthu oohikhala? Khamwaatikinihiya noonimaliha wowiira hikhale n'hala, hikhalaka oopheela otthawa? ¹⁵ Apwiya, Nluku owiisrael, Nhu mwaanassariya, nikhanle phanka ookhala vakaani nihukun'na. Nkawehani! Niri ohoolowinhu, mwaha wookossawihu, ninaatjuwelaru wiira khaavo npheela okhala oohoolowinhu mwaha woyeela.