¹ Waviralyaaya tjitthun'nha, owakathi waahoolela Artaxerxes, mwene oPersia, Esdras aahowa oBabilonia. Esdras aari mwaana aSeraias, mwaana Azarias, mwaana Hilquias, ² mwaana Salum, mwaana Zadoque, mwaana Aitube, ³ mwaana Amarias, mwaana Azarias, mwaana Meraiote, ⁴ mwaana Zeraias, mwaana Uzi, mwaana Buqui, ⁵ mwaana Abisua, mwaana Fineias, mwaana Eleazar, mwaana Arao, nkhulupale aanankuttho. ⁶ Esdras aahowa oBabilonia ni yena aari mayowantikha nketteloni mwa Moises Apwiya, Nluku owiisrael tjanvahalyaaya. Mwene aahophwanha tjooteene tjaalepelalyaawe, kontha ntata naaPwiya naari niyena. ⁷ Yaattharenla aakhwaawe owiisrael naanankuttho, alevita, anamwiipa onkapela, oweemela wankhora niyaale yaathanliye wiira avare nteko nkapela yaahorwaa oJerusalem mwaakha wonasaapa wamwene Artaxerxes. ⁸ Esdras aahophiya oJerusalem mweeri woneethanu womwaakha yoole. ⁹ Yena aahokhuma oBabilonia nihuku noopatjera womweeri woopatjera. Naari nihuku noopatjera womweeri woneethanu waaphiyalyaawe oJerusalem, kontha ntata nooreera naNluku naari niyena. ¹⁰ Esdras wanrimaniwawe aahohiya ossoma, attharaka noossomiha tjowantikhiya niissariya tjokettelo tjaaPwiya. ¹¹ Phinikhanta mwene Artaxerxes nanvahalyaawe Esdras, nankuttho nimayowantikha aassoma tjoorumiya ni tjoweettiheriya naaPwiya ni aassomiha atthu owiisrael: ¹² Mwene aamamwene Artaxerxes wa nankuttho Esdras, mayowantikha yoketteloyaNluku owiirimu: ¹³ Kinaahimyatja wiira khula ntthu owiisrael nkhala moomweneniwaka, vamotja naanankutthwaawe ni alevita, an'hala opheela orwaa oJerusalem, n'hala orwaa niwe. ¹⁴ Mi, mwene, naanamalakalakaaka saapa, kinawooveleelihano ooteenetjinhu, mwawehawehe oJuda ni oJerusalem mwaha wokettelo tjaNluku, tjiri nmatataniwinhu. ¹⁵ Ohaana okussaka eparatha niiwooru anamalakalaka tjinvahalyaaya Nluku owiisrael, kontha onkhaliya oJerusalem. ¹⁶ Ewooru niiparatha tjin'haalaa waakhenla epooma yooBabilonia, nitjoovahiya tjootthunela tjaatthu ni tjaanankuttho npaani mwaNluku, oJerusalem. ¹⁷ Ninteko yoola, onaahala othuma emope, ni wakhula enan'na yonama ni tjoovahiya tjonipha. Nvahe waltaare ari nkapela waNlukweenhu, oJerusalem. ¹⁸ Opanke yoohala tjoparatha ni yowooru en'halaa woonela naassihimaa, nootthuna waNlukweenhu. ¹⁹ Mwavahe, ohoolo waNluku oJerusalem, tjitthu tjaavahatjiyeenhu wonteko wokapela yanlukweenhu. ²⁰ Wakhula etthu en'hala okhalela nkapela aNlukweenhu, enáleenhu otthuna, enaahala oliviya nin'hakhu wokhweeli. ²¹ Mi, mwene Artaxerxes, kinaapanka nlamulo waanamassunka ooteene opooma ohiya emuro Eufrates, ovirikana wokhula etthu Esdras en'halaawe woovahani, ²² npaka emiya tjoparatha, niimiya tjomihakhu thikhaawe, itiita emiya tjonipha nimitiita emiya tjomakhura, nimaakha. ²³ Tjooteene tjin'hala ohimya Nluku owiirimu, en'hala opnkiya ninttittimiho nkapelawawe. Waahala okhuruwelani orussiyawinhu woomweneniwaka ni naassaanaaka? ²⁴ Nihiiwa mwaha wawinhu wiira khan'noliva nssokho wala khula etthu waanankuttho, alevita, anamwiipa, ankhalenla mikhora wala naatthu yaathanliye woopheela ovara nteko nkapela naananteko onkapela. ²⁵ Esdras, nootjuwelatja Nluku wanvahalyaawe, wantikhe atthu ni aphuki wiira yaavarele nteko atthu ooteene ohiya emuro Eufrates, eyo phiiyo, ooteene yaale antjuwela ekettelo tjaNlukweenhu. Ni mwaassomihe ahintjuwela. ²⁶ Wayoole hinkootthuna ekettelo yanlukweenhu wala yamwene attarussiye wala akhwe, wala okussiya, nookussiya mihakhutjawe, wala otthukeliya. ²⁷ Esdras aahovekela iiraka: Ooreeriya tiPwiya, Nluku aatthweehu okhalayi, ahelale wanrimaniwaya otthunela woottittimiha ekapela yaaPwiya, oJerusalem, ²⁸ kitaphulelale waataanawawe, ohoolo wamwene, waanamalakalakaawe naakhulupalyaawe ooteene ooweryessa. Kinaalipiheriyaka nimatata aaPwiya, Nlukwaaka, ni waathukumanihe ahooleli owiisrael waahokolyaane.