¹ Vano, arumeyi Ageu ni Zacarias, mwaana Ido, nrumeyi, yaaholalyaa mwaantjina naNluku owiisrael waatthu ooJuda ni Jerusalem. ² Zorobabel, mwaana Sealtiel ni Jesua, mwaana Josadaque, yaahantjera oateka enupa yaNluku oJerusalem, naarumeyi yaalipiheraka. ³ Vano, Tatenai, nkhulupale opooma nphantte Eufrates,Setar-Bozenai naahoolelyaawe yaahowa ni yaahowiirela: Tupani wiirelatjale wiira atekatje enupa noomalihatja eluwani? ⁴ Naayenatja yaahiiratja: Matjinaaya phaapani alopwana an'malihatja enupeeyo? ⁵ Massi meetho Nluku yaari nimahumu aajudeu, ni awananyaaya khaaweemessale. Ayenatja yaanriihatja nikhanta oveleelihiya wa mwene Dario ni waakhuliya mwaha woyeeyo. ⁶ Ela phiiwarakha Tatenai, nkhulupale oopooma ohiya Eufrates, ni Setar-Bozenai naahoolelyaawe, opooma ohiya Eufrates, yaahoveleeliha wa mwene Dario. ⁷ Ayenatja yaahoveleeliya yowaakhuliya wa mwene Dario: Nrettele wooteene okhale ninhu. ⁸ Amwene atjuwele wiira naahorwaa oJuda, enupa yaNluku yuulupale. Entekiya nimaluku moolupale, ni essiri eheemela. Ntekooyo onvariya nimatataaya. ⁹ Nihaakoha mahumwaayo: Tupani wiirelatjaleni wiira ntekatje enupeela? ¹⁰ Nihaakoha matjinaaya wiira mwaatjuwele phaapani yaayo. ¹¹ Ayenatja yaahaakhulatja yiiraka: Naananteko Ayoole riNluku owiirimu ni ovathi ni ninteka enupeela etekiy khalayi, owakathi mwene muulupale owiisrael wamaliheralyaawe. ¹² Amutjiihu okhalayi yaahonrissiha Nluku owiirimu, ayena yaahaavahenra nmatatani mwa Nabucodonosor, mwene oBabilonia, aakwanhulale enupeela akussaka atthu, oBabilonia. ¹³ Phimaana, mweeri woopatjera waCiro phanka mwene ooBabilonia, Ciro aahokumiha nlamulo woopheela otekiya enupa yaNluku. ¹⁴ Mwene Ciro aahohokolossa tjitthu tjowooru ni tjoparatha tjaari tjonpaani mwaNluku, Nabucodonosor tjaakussalyaawe npaani oJerusalem, arweehaka enupa yooBabilonia. Yena aahon'hokolossera Sesbazar, ankhalihalyaawe nkhulupale. ¹⁵ Yena aahomwiirela: Okusseke tjitthun'nha. Orwee ni weesse npaani, oJerusalem. Wahiihe otekiya enupa yaNluku. ¹⁶ Sesbazar aahovaha nlamulo nowantjeriya otekiya enupa yaNluku oJerusalem; ni yaahantjera otekiya, massi ehinamalihiya. ¹⁷ Vano, amwene yoona wiira etthu yooreera, tjirweeliye tjowantikhatjiya oBabilonia wiira noone wakhala wiira ehaavo yowantikhiya ni mwene Ciro mwaha wootekiya enupa yaNluku oJerusalem. Vano mwene naahala waaveleelihatja mwaha woyeeyo.