¹ Awananyaawe Juda ni Benjamim wiiwalyaaya wira atthu ahohokolyaa ni yeera atekaka enupa yaaPwiya, Nluku owiisrael, ² yaahorwaa omuulumana Zorobabel naahooleli aamutji aatthu okhalayi, ni yaahiiratja: N'nitthunihe wiira nookhavihatjereni oteka enupa yaaPwiya, kontha phanka nhuuvatja, nihon'rweela Nlukweenhu ni ninaavahaka tjoovaha okhuma nihuku niwaaniyeehu nipuron'na ni Esar-Hadom, mwene oAssiria. ³ Zorobabel, Jesua nimahumu akhwaawe aamutji owiisrael yaahowaakhulatja: Khan'nakhalatja, massi hi ninaateka enupa yaNlukweehu. Tjiriihuva ninawaatekela Apwiya, Nluku owiisrael, tjitjon'mo phanka Ciro, mwene oPersia, tjiniirelalyaawe. ⁴ Vano atthu olapweele khayaatjiveliha atthu ooJuda ni ajudeu yaahoova wiira ahiteke. ⁵ Ayenatja tootho yaahaahanhurihatja anamalakalaka wiira yaarussihe nimuupuwenlwaaya. Yaahopanka tjon'mo omwene wooteene waCiro npaka mahuku oohoolela Dario, mwene oPersia. ⁶ Tjitjon'mo, woopatjeroni woomwene wa Xerxes, ayenatja yaahantikhatja tjoowootherya atthu ooJuda ni oJerusalem. ⁷ Waaro omwene waArtaxerxes wiira Bislao, Mitredate, Tabeel naahooleelyaawe akhwaawe yaahomwantikhatja. Nikhantan'no nantikhiye niiluuka yeeramaico, nootaphuleliya. ⁸ Reum, nkhulupale, ni Sinsai, mayowantikha, yaahomwantikhela Artaxeres oJerusalem. ⁹ Reum, Sinsai naahoolelyaawe, yaari aphuki, waahiya akhulupale akhwaawe oPersia, oEreque, oBabilonia ni oSusa, oElam, yaahantikha nikhanta nimotja; ¹⁰ ni yaayotja yaahaathukumaniha atthu yaari vamotja npooma okhuma nphantte womuro Eufrates. ¹¹ Phinikhanta naaveleelihiye wa Artaxerxes: Anantekwaawe, alopwana npooma okhuma nphantte womuro Eufrates, phantikhale tjo: ¹² Atjuwele amwene wiira ajudeu ahotakaneela nihi oJerusalem ni anrehenryatja epooma yootakhala. Ayenatja anrehenryatja eluwani ni awehaka makhalelwaaya. ¹³ Amwene atjuwele wiira, epoomeela yamalihiya niiluwani yamalihiya, ayenatja khan'hala oliva tjooliva, missokho ni tjitthu tjikhwaawe, ni tjitjon'mo anaahala waakutakutheeha amwene. ¹⁴ Onawoonya wiira ninkhala mwaha woopalaaciu, khawanphwanela waaweha amwene woohittimihiya. Phimaana phinaalipihereehu amwene ¹⁵ wiira nrweele nliivuruni tjowantikhiya tjan'nathumwaninhu, ni n'naahala otjuwela wiira epoomeeyo phiyoohitthuneetthu, ankumihatja enhakunhaku momamwene ni nmapooma; khalayi khalayi naari nipuro noohiphwanela. Phimaana waakwanhuliyaaya epoomeeyo. ¹⁶ Ninaahimeerya amwenyaayo wiira, tjatekatjiya eluwani niipooma, khiivo en'hala ohala yawinhu okhuma nphantte womuro Eufrates. ¹⁷ Vano amwene yaahoveleeliha yootjipwiya wa Reum, wa Sinsai naahoolelyaawe yaakhala oSamaria ni opooma ohiya emuro Eufrates: Nrettele okhale ninhu. ¹⁸ Nikhanta niveleelihaleenhu nihotaphuleliya noossomiya ohoolowaka. ¹⁹ Kaahorumiha owehawehiya ni kaahoona wiira, okhuma khalayi, epoomeela yaari atakhali ni khayaawiiwenla mamwene. ²⁰ Jerusalem aahooleliya nimamwene ooupale yaarina owerya epooma yooteene ohiya muro Eufrates, ni yaanolivatja nssokho. ²¹ Phimaana, mwiirele atthwaayo wiira ahiye oteka epoomeeyo npaka wankumihaaka nuulumo. ²² Phimaana mwiirattavenle mwaha woyeeyo. Essiyani otthunihaka wiira tjowoopopiha tjuunuwe ni tjikutakutheehe tjootthunela? ²³ Owakathi nlamulo nissomiyaaya na Artaxerxes ohoolo wa Reum, Sinsai naahoolelyaawe, yaahorwaatja wowaakuvyaatja oJerusalem ni yaahowiirela ajudeu wiira ahiye oteka. ²⁴ Tjitjon'mo, tjootekiya npaani mwanLuku oJerusalem yaaheemelela npaka mwaakha wonayeeli wa Dario, mwene oPersia.