¹ Vano, naahokiweela nuulumo naApwiya niiraka: ² Mwaana antthu, waahimeerye atthu ooJerusalem mwaha wotjitthu tjinvaraaya ³ ni waakhuwele: Wohissima yooJerusalem Apwiya Muluku aniira tjo: Makhalelwaa ni mayareliyo ankhuma elapo yomacananeu; athumwana yaari amoreu ni anumwana yaari, heteia. ⁴ Nihuku niyariyaa, anumwana khaathikilale ntokhwaa, wala khawaarapihiye nimaatji, wiira oreerihiye, wala khawaattikittheliye maakha; wala khawaavilikenlatjiye ekuwo. ⁵ Khanivo niitho nimotja naaweheehale ovara tjen'nho tjitthun'nho, massi mwaha wawa, waahoriheliya n'mattani. ⁶ Massi kaahovira warya, kaahowoona oorakala nphomeniwaa, vano kaahowiirela: Okhale! Kaahowiirela wiiraaya nanlelo yoomwaryaaka ephome, okhale! ⁷ Kaahowuunuwiha phanka nri wowaaliya. Waahoyaranatja ni waahiitjuunuwiha okhalaka phanka yowaarya watjowaarya. Eponinponitjaa tjaari tjoweemela ni ekhararitja tjaahuunuwa, massi we waari matamata ni oohiyara. ⁸ Kaahoviratho waaryaa. Nkaweha! Okathi wonfento waahooweela, vano, kaahotaphula ekuwaaka ni kaahokhuneela ohaayaniwa. Vano kaahuphela ni kaahopanka waataana niwe n'na nuulumo naApwiya ni ohokhala awaka. ⁹ Vano, kihoorapiha nimaatji, kihovunla ephomyaa ni kihootthapela nimakhura. ¹⁰ Kihoowariha ekuwo tjoophwanela, kihoowariha essantaalya tjooreera. Kaahoovilikenla ekuwo yooreera niwookhuneela. ¹¹ Tjowaarya kaahoowariha, ¹² kaahoowariha ekhaankaani n'moononiwa ninkufu nssikohiwa. Kaahoowariha ekharawa nphulaniwa, epirinku n'maaruniwa niikorowa yooreera n'muruniwa. ¹³ Tjitjon'mo opankiye niwooru niiparatha; ni owarihiye ekuwo yooreera, ekuwo tjooreeressa; olyaka eyoolya yooreera, oravo nimakhura; waari ooreera ventji ni waahokhala pwiyamwene. ¹⁴ Ni otjuwanyawaa waahokhala nlaponi mwaha wooreerawa, kontha waari oophwanela mwaha wonttittimiho noovahalyaaka Apwiya Muluku phiniiraaya. ¹⁵ Massi okhuluvelale otjuwanyawaa ni okhanle phanka nooluva mwaha wootjuwanyaawaa, oluvaka naatthu ooteene yaarinaa ni oreerawaa waari naayena. ¹⁶ Waahokhaliha ekuwotjaa ni, tjen'nho, waahokhaliha ekoore tjintji, mapuro oorekama wiikhalihale phanka nooluva. Eyo khayaahala wiiranyaa. Wala yeeyo etthwiiyo khayaahala okhala. ¹⁷ Waahokussa ewooru niiparatha tjoovahalyaaka; waahopanka elatarato tjaatthu ni waaholuva phanka tjaapheelaa. ¹⁸ Waahokussa ekuwotja tjooreeressa ni waahokhuneela; waaheessa ohoolowaya, makhuraaka ni tjoonukhela. ¹⁹ Nkatthyaaka woovalyaaka woopankiya nootthu wooreera, makhura nooravo waaheessa ohoolo waamuluku eethiru phanka etthu yoonukhela, eyo phiiranyaale n'na nuulumo naApwiya Muluku. ²⁰ Ohiyavaa, waahaakussa assaanaa akiyarenlyaa ni waahaavaha okuttho nlataratoni wiira akhuuriye phanka eyoolya. Waanootepessa oyeva otjuwanyaawaa wooluva, ²¹ waawiivakatja assaanaaka ni waavahaka phanka yoovahiya yoopahiya. ²² Watjoovaratja tjooteene tjooluva, khawuupuwenle mahuku eemwaavanuaa, waaryaa tjiitjo ni oohiyara, okhalaka nphomeniwa. ²³ Ohotakhaliya we! n'na nuulumo naApwiya Muluku ohoolo wayookossa yooteene, ²⁴ ohoteka nipuro nomavekelo ni altaare mapuro owintjiviya ooteene. ²⁵ Niwantjerawinhu n'horehenrya nipuroninhu noorekama ni mwaahotankula oreerawa, n'hovaha erutthweenhu waatthu ooteene yaavira ni waahuunuwiha oraruwawaa. ²⁶ Ohuupuwela phanka namararuwa naatthu owiigiipitu, naamwaattamanuaa niirutthu tjootakhala, ni mwaahoraruwatja ventji, nkipatjapatjaka. ²⁷ Nkaweha! Kinaahala wookwanhula nimmatataaka ni kinaahala okussa yawaa. Kinaahala ovaha ekumyaa waananyaa, assaana omafilisteu, yaayo yoonale ehaaya mwaha womakhalelweenhu. ²⁸ Naatthu oossiria waakhanle phanka namararuwa, kontha khawootossa. ²⁹ Waakhanle phanka namararuwa, ni hata tjitjon'mo, khawootossale. Waaholuva tjinene elapo yaananakosso, ni hata tjitjo'mo khawootossale. ³⁰ Nrimaa phuwootteetthyaa tjinene Apwiya Muluku phiniiraaya tiwe onpanka tjitthun'nha woohihaaya. ³¹ Khula nttala ohoteka oluvaa, niohaapanka altaare khula nttala; khawaakhanle namararuwa, kontha ohokhotta oliviyawaa. ³² We, nthiyana ooluva, nipuro naawanuwaa ohaakupaleela atthu oohikhala. ³³ Alopwana anawaaliva anooluva ooteene, massi we onawaavaha yooliviya anoopheela ooteene wiira weettane oluva. ³⁴ Vano, ohaavo ovirikana naathiyana ooteene, kontha khaavo nlopwana nkoolepela wiira orupe niyena. Ohiyava, onvara woovirikana, phiwe onaalivatho. Khaavo nooloiva. ³⁵ Phimaana, we namararuwa, wiiwe ratta nuulumo naApwiya. ³⁶ Apwiya Muluku aniira: Essiyani omwaressatjaka ephomyaa ni wiitjoonatjihaka naassilopwana naamulukwaa eethiru, mwaha wophome yaassaanaa yaavahalyaa; ³⁷ wotjitjon'mo, Kinaahala waathukumaniha assilopwanaa ooteene yaatjuwelalyaa, yaarupan'nyaa ooteene kinaahala woowiihera ooteene, vamotja naale yahaatthunaa, Kinaahala waatakaniha ooteene womiphantte tjooteene. Kinaahala woorulatja ohoolowaya , wiira awoonatje. ³⁸ Kinaahala woottarussa mwaha wooluva ni mwaha woomwaressatja ephome ni kinaahala wookurussela omwaryaa wophome mwaha woorussiyawaka. ³⁹ Ni kinaahala woovahenra n'matatani mwaawananyaa ni yaayo anaahala okwanhla mapuro omavekelwaa waamuluku eethiru ni anaahala waamoriha altaare, anaahala orulatja ekuwotjaa, anaahala okussa tjitthutjaa tjooreera tjooteene, yoohiyaka tjiitjo. ⁴⁰ Vano, anaahala wookhumenla atthu entji, anaahala woohomakatja niikatanatjaya. ⁴¹ Anaahala opahakatja enupatjaa, anaahala ophuka milattutjaa ohoolo waathiyana entji; kinaahala omalamaliha oraruwawa ni khun'halatho waaliva assilopwanaa. ⁴² Vano, kinaahala omaala orussiyawaka; orussiyawaka onaahala woohuluwa, kinaahala weemessera akin'hala opankatho etthu. ⁴³ Kontha khawuupuwelale okathi weenanttonpyaa ni waahokipatjapatja mwaha wotjitthutja tjooteene, phimaana, ratta! Kinaahala woottarussa mwaha watjooteene tjivaralyaa n'na nuulumo naApwiya Muluku. Khawintjenrale watjitthutjaa tjooteene tjivaralyaa tjoohikhala. ⁴⁴ Wayaale ooteene anuulumela mitekotjaa anaahala wiira: Tjiryaaya anumwane, mwaana phiryaawe. ⁴⁵ We omwaana anumwanaa, aatanhifu awanuwawe naassaanawe, we omuulupale aassihimaa, aatanhifu awanuwawe naassaanaawe. Anumwanaa yaari oheteia naathumwanaa amoreu. ⁴⁶ Muulupalyaa ntjinanawe iihaniya Samaria ni assaanaa yaakhala okhopela; ni mwaamun'naa akhala oSodoma naassaanaawe. ⁴⁷ We khaweetta n'mittalaniwaya, phanka tjeettaa ovaraka mitekotjaa, massi, womittalatjaa tjooteene waahotepiha waavikana ayena. ⁴⁸ Tjitjon'mo phanka tjinkhalaaka Apwiya phaniira mwaamun'naa Sodoma naassaanaawe khapankale phanka tjinpakalyaa naassaanaa tjinpakalyaaya. ⁴⁹ Yeela phaari yoottheka yamwaamun'na Sodoma: yena khiivo yaapheelaawe, khaakuthakuthyaa wakhula etthu. Yena akhaleru khanavaha etthwaawe wantthu oohikhalana. ⁵⁰ Yena khiivo yaapheelaawe ni aavara tjitthu tjoohikhala wameethoniwaka, Mi kihokumiha wanipuriniwawe phanka yjoonalyaa. ⁵¹ Hata Samaria khavarale tjivaralyaa: we ovarale tjitthu tjootakhala woovirikana yena ni waahaathoonhera wiira phaari oophwanela woovirikana weeyova, mwaha wotjitthu tjivaralyaa! ⁵² Ni we, onaathoonhera ehaayaa; weenan'na yeeyo, onaathoonheraka wiira assihimaa phaari oophwanela woovirikana niwe, mwaha wotanpi tjipankalyaa n'mittalanimwaa mooteene. Assihimaa ahuupuwela ratta; massi we, onaathoonhera ehaayaa, weenan'na yeeyo, wan'noonyaa wiira assihimaa an'nokhala ratta woovirikana niwe. ⁵³ Kinaahala okumiha eparakha ya Sodoma eparakha ya Sodoma naassaanaa; eparakha ya Samaria naassaawe; niiparakheeyo enkookhala naayena. ⁵⁴ Ni, mwaha wotjen'nha tjitthun'nha, onaahala woonihatjiya ehaaya mwaha wotjitthu tjooteene tjipankalyaa niiyo enkookhala nlipiherwaaya. ⁵⁵ Muulupalyaaa Sodoma naassaanaawe naahala okumihiya, phanka Samaria naassaanaawe tjin'halaawe okumihiya mapurwaawe. Tjitjon'mo phanka we naassaanaa tjin'halaa okumihiya mapurwaa okhalayi. ⁵⁶ Sodoma, muulupalyaa, khawaalikelenliye, mahuku yiittottopaa, ⁵⁷ okwanhuwatjawaa ohinawehiya. Massi, n'navaa ontthu ootanhifwyaa naassaana aEdom nimafilisteu ooteene , ooteene anawootanhifu. ⁵⁸ We onaaha woonihatjiya ehaaya mwaha womitekotjaa Apwiya phaniiraaya. ⁵⁹ Apwiya muluku aniira tjo: Kin'hala woopanka tjinoophwanela, kontha ohotanhifu oluphelawaa okwanhulaka waataana. ⁶⁰ Mi, watjooteene, Kinaahala wuupuwela waataana wookhalenlyaaka, mahuku eenanttopyaa, kinaahala woovaha waatanawaka woohimala. ⁶¹ Vano, onaahala wuupuwela mittalatjaa ni onaahala wiitjoonihatja ehaaya, wawaakhenla assuulupalyaa naassihimaa, kontha kin'hala woovaha phanka assaanaa, massi khunakhala mwaha wowaataanawa. ⁶² Mi kinaahala owaataaniha ni we onaahala otjuwela wiira kaApwiya. ⁶³ Wotjitjon'mo, onaahala wuupuwela ni on'hala okhala niihaaya: khun'halatho otthukula malakwaa mwaha wohaaya, koolevenla watjooteene tjipankalyaa Apwiya Muluku phiniiraaya.