¹ Mahumu makhwaawe owIsrael yaahowa wookoma waryaaka. ² Nuulumo naApwiya naahokiweela niiraka: ³ Mwaana antthu, atthwaala anoovahenra mirimatjaya waamuluku eethiru ni owiithowaya tjin'noonyaa tjoovaratjaya. Kaahala okhala ookohenriya naayena. ⁴ Phimaana, waattonkelatje: Apwiya Muluku aniira tjo: Wavirenle ntthu owIsrael, nkowiipharaphariha amuluku eethiru wanrimaniwawe, wala tjootakhala ohoolowawe, awaaka waakohakoha arumeyi, Mi, Apwiya, kin'hala owaakhula phanka tjiryaaya amuluku eethiru. ⁵ Kin'hala opanka tjon'mo wiira kihokolosse mirima tjaattthu owIsrael, akihuluwale, mwaha waamulukwaaya eethiru. ⁶ Phimaana, wahimye ntthoko naIsrael: Apwiya Muluku aniira tjo: Mwiituthuwe ni mwaahiye amulukweenhu eethiru! N'huluwe tjoovaratjinhu tjooteene. ⁷ Atthu ooteene ankhala wIsrael, ankitthawa, yaassunkaka amulukwaaya eethiru wanrimani avaraka tjootakhala ohoolowaya, vano phun'waaya omuulumana nrumeyi, Mi kimwaneene, Pwiya, kinaahala waakhulatja. ⁸ Kinaahala waarukunussela ekhovyaaka yaayo atthwaayo, kin'hala waapwetessa eriyari yaatthwaaka ninhu n'naahala otjuwela wiira KaApwiya. ⁹ Nrumeyi akhala oothepiya ni khuuluma nuulumo, vano, Mi, Apwiya, kinaahala onthepya yoola nrumeyuula; kinaahala ontaphulela ntatanaka ni kinaahala onkwanhulatja eriyari yaatthwaaka. ¹⁰ Ayena anaahala okussa tjoovaratjaya; ni yoovara yanrumeyi en'hala okhala emotjaaru nuule namakohenra. ¹¹ Wowiira ntthoko naIsrael nihihiye okitthara wala tjinphwanhe tjoovara. Ayena an'hala okhala atthwaaka naayena kin'hala okhala Mulukwaaya, n'na nuulumo naApwiya Muluku. ¹² Nuulumo nApwiya naahokiweelatho, niiraka: ¹³ Mwaana antthu, ntthu akikosseravale, apankaka tjuulupaleru, Kinaahala ontaphulela ntatanaka ni kinaahala othikila muupuwelelwaawe, kinkurusselaka etala yena niinamatjawe, wuumaleloni elapo; ¹⁴ ni hata atthu ararwaala Noe, Daniel ni Jo anari vaava, yaahala woopola ekumitjaya, mwaha wosariyaaya, n'na nuulumo naApwiya. ¹⁵ Kakurussela enama tjon'mwiini nlaponi ni tjimwareelaka, ni etthayeeyo ekhala yoohiruweriya mwaha wonama, ¹⁶ hata atthu ararwaala akhalaka mon'mo tjitjon'mo phanka tjinkhalaaka, Apwiya phaniira ayena khayaahala woopola ekumi tjaassaanaaya; ekumitjaya phaahala okhikitjeriya niitthayeeyo yaanaahala omwareeiya. ¹⁷ Wala kawiiha ekatana elapweele ni kiiraka: Ekatana, ovire elapo yovathi waamalihe atthu niinama tjinkhala mon'mo, ¹⁸ hata atthu ararwaala akhalaka mon'mo, tjitjon'mo phanka tjinkhalaaka, Apwiya phaniira ayenatja khayaahala woopola assaanaaya; ekumitjaya phaahala woopoliya. ¹⁹ Wala, kakurussa enama yuulupale wiira emwaressele orussiyawaka noomwaressatja ephome, wiira yaamalihe atthu niinama, ²⁰ hata Noe, Daniel ni Jo anari nlaponi mon'mo tjitjon'mo phanka tjinkhalaaka, Apwiya Muluku phanuulumatja ayena khayaahala owoopola assaanaaya; tjaahala woopoliya ekumitjaya, mwaha woossariyaaya. ²¹ Kontha Apwiya Muluku aniira tjo: Weekhweeli, kinaahala otepihatja tjookhuma oJerusalem nimittarussotjaka mitjesse etala, ekatana, enama tjontakhwani ni nkeenameeyo wiira yamalamalihe atthu niinama. ²² Massi, yakhumenla oohala ankowaakussa assaana yahiin'ye opooma, yawa npakha wariinhu, n'naahala woona mittalatjinhu nimitekotjinhu; ni n'nohala okhala omaalihiya munttarussoni oveleelihalyaaka oJerusalem ni tjooteene tjiveleelihalyaaka. ²³ Ankoohalaayo anaahala woomaalihani mwawehaka mittalatjinhu nimitekotjinhu, ni n'naahala otjuwela wiira akipankale mahala n'na nlamulo naApwiya Muluku.