¹ Eyaakha talathiini, mweeri wo tjesse, nihuku noneethanu wo mweeri yooyo, keera kikhalaka wananthukiya, muro wo Quebar. Erimu ehohulya kahaana nttora na Muluku. ² Nihuku noneethanu wo mweeri yooyo - wari mwaakha wo neethanu wa mwene Joaquim, ³ nuulumo na Muluku nahon'weela Ezequiel, muaana aa Buzi, namukutho, nttethe wo macaldeu, wakhiviru wo muro Quebar, ni ntata na Muluku naari nipuro nen'no. ⁴ Kihoona ephyo yuulupale ekhuma mphantti onkela ntjuwa, nihutte nuulupale ni mooro woopharela n'hinawaya, waaryaka nkerekhere ni n'hinawaya; moorooyo waari wokoore yo safarawu n'hinawaya nihutte n'ne. ⁵ Wariyari vale, yaahaavo tjoolikaanatja ekhiyumpi tjesse. Olikana wayan'wo yaari tjo: yoolikana ni nlopwana; ⁶ wakuta nthu ahaana ekhove tjesse ni wakuta ekhiyumpi yahaana mapupha matjesse. ⁷ Mwetto tjaya tjaari tjo wookua, enyan'yo tjaari toko tjo puri tjaarya toko ebronze yoreerihiya. ⁸ Ohiya tho vaa, yahaana etata tjepinaatamu vathi waya mapupha ale ephantti tjo tjeese; ekhove ni mapupha otjesse yaari tjo: ⁹ mapupha ayo yanaakwanya mapupha ankhuaaya yamwattaman'nalyaaya ni khayaarukunuwa yiweettaka; ohiya tho voo wakuta nthu eetta akelelaka ohoolo. ¹⁰ Ekhove tjaya tjaar toko tjaapinaatamu. Atjesse ayo yaarina ekhove tjo kharamu mphantti weelopwana, atjesse ayo yaarina ekhove tjo mope mpantti wethiyana. Atjesse ayo yaarina tho ekhove tja assaaka. ¹¹ Ekhove tjaya tjaari tjo ni mapupha ayayaari otaphuwa wo manan'na wa khunla ahaana mapupha yaakwanya mapupha wa ekhiyumpi ekina ni mapupha makhuaawe yaakhuneela eruthu aya. ¹² Wakhula yaarwa ohoolo, won'wo N'nepa warwaaya, ni yaayo yeetta wo hirukunuwatja. ¹³ Ekhiyumpi n'ye alikan'ne ni makhala opharela, yaari toko mwenke, mooro wapharela ni weetteetta wariyari wa apinaatamu ni yaahaavo woonieela wo verunya. ¹⁴ Ekhumpi n'ye weetteetta waya waari wowaakuva erwaaka ohoolo ni ekelelaka ottuli ni yaalikan'ne toko overunya! ¹⁵ Ni, kahoweha tho ekhiyumpi n'ye; waahaavo mwala vathi vaa, mphantti wa ekhiyumpi n'ye. ¹⁶ Makhalelo aya yaari tjo ni yun'nuwelo wo rotha: wakhuta erotha yaari toko nluku no waarya otjeece yaarina makhalelo mamotjaaru; olikana waya ni mun'nuwelo aya yaari toko nrootha nooluttaana ni nikhuaaya. ¹⁷ Okathi erotha n'ye weettaaya, yeera erwaka mipantti tjaya tjo tjeece, wo hirukunuwa weeraaya erwaaka. ¹⁸ Aro aaya yaayo, yaari orekamatja ni owoopiha, kontha aro aayo yaari otjarya mentho enkerekhere waya. ¹⁹ Wakhunla okathi ekhiyumpi n'ye weettaaya, erootha n'ye tjeetta ni yaayo. Ekhiyumpi yooromelaaya vathi erotha n'yo tjanawooroma. ²⁰ Won'wo N'nepa wakelelaaya, ayena yaarwa won'wo, ni erotha tjanakhoroma ni ayena, kontha N'nepa wa ekhiyumpi waari n'roothani m'mwe. ²¹ Okathi ekhiyumpi weettaya, erotha n'ye tjanaweetta; ni, okathi weemelaaya, erotha n'yo tjana weemela; okathi ekhiyumpi wooromeelaaya vathi, erotha n'yo tjana wooroma naayena, kontha N'nepa wa ekhiyumpi n'ye waari n'roothani. ²² Vatjulu wamuru tjaatthu akumi yaahaavo etthu yaalikana niirimu, yaatutha phanka essupelyu, yowaatalyaa wamuruwaya. ²³ Vathi weerimu, khula nkumi aanotaphulela otjulu mapuphaawe meeli, khula nimotja nikumaanaka ninipupha nankhwaawe. Khula ntthu aaniikhuneela erutthwaawe nimapupha meeli. ²⁴ Vano, kaahiiwa ntju nomapupha phanka onhakula womaatji; ntjuu noolikana naMuluku oowerya tjooteene, owakathi weenheenhaaya; waakhala phanka nphwinko waanakhotto. Owakathi onhakula waamaalaaya, mapuphaaya yaanaakhuna. ²⁵ Ntjuu naakhuma wiirimu, watjuluwaya, onhakula omaalaka mapuphaaya yaanaakhuna. ²⁶ Vatjulu erimu yaari vatjuluwaya, yaahaavo etthu yaalikana niihitje yaalikana ninluku nowaarya, ni, wahitjeni vaava, aahaavo aalikana nintthu. ²⁷ Ntthuyooyo, n'yuununi woorwaa ntjulu, aalikana niitthu yowaarya yootjara mooro ni, n'yuuununi woorwaa vathi, kaahoona mooro wonrukureerya. ²⁸ Akhala phanka nikhwi n'mahutteni nihuku nopula, waari nthoonhero wonthuko wanrukureerya. Waari waarya waApwiya. Woonalyaaka eyo, kaahooromeliha ekhove vathi ni kaahiiwa ntjuu nuuluma.