¹ Paulo, nrumwa aa Yesu Kristo, woothuna wa Muluku, ni Timoteo, mun'nihu, ² wo attakattiifu ni amwaamini assun'na mwa Kristo ari ocolosso. Mahala wa nhuuva, ni nrettele wo mphantti wa Muluku paapeehu. ³ Ninanvaha mahala Muluku, paapaawe Pwiyeehu Yesu Kristo, ni kuta nihuku ninawuuvekelelani ⁴ Hi nihin'wa waamini winhu mwa Kristo Yesu ni wo nifento orineen'nhu wa attakattiifu ooteene aa Muluku, ⁵ mwaha woo wehenra winsaathiye paara nhuuva wiirimu.Wopatjera n'hin'wa owehenran'no N'nuulumoni neekhueeli, Ehapari, ⁶ ehoophuanhani nhuuva, ni oneera ovahaka on'hokorokho ni wun'nuwaka etuniya yooteene, wolikana ni nhuuva, okhuma nihuku win'walen'nhu ni ntjuwenlen'nhu mahala aa Muluku weekhueeli. ⁷ Eela Piihapari mwintjutjalen'nhu ni Epafras, mun'nihu nkhuiihu, yoola mwaamini ni nanteko aa Kristo, mwa nkhaviheroeehu. ⁸ Yena honihimeeria mwaha wo nifento ninhu muu N'nepani. ⁹ Wo yeela essariya yeela, ni hi tjiitjam'mo, okhuma nihuku nimwin'waleehu, khanihiyenrale ovekela ni lepelaka wo wiira nkhale otjari nuutjuwelatja woothuna wawe, nuutjuwelatja wawe wooteene ni otjuwela wo muu N'nepani. ¹⁰ Hi ninaavekela wo wiira mweette wooreera mwa Pwiya, wo tjiveliya waya wooteene, mun'nuwihaka miteko tjinhu tjooreera ni mun'nuwaka muu tjuwelatja wa Muluku. ¹¹ Ninaavekela wo wiira nkhale olipiheriya ni ekuru tjooteene, wo nayeeli ekuru wo waaria waya, mowiisunkani ni muuvilelani. ¹² Ninaavekela wo wiira muaavahe mahala aPaapa nuutteeliya, winthutjihaleni wo wiira mwaakhenle mphantti m'motja yoohalana tjaattakattiifu mwinthukoni. ¹³ Yena honoopola wa ekuru yo muiipiphini ni honikussa Muumweneni wa Mwanawe ofentiya. ¹⁴ Oyoyo orineehu woopoliya, onari, olevenliya wootampi. ¹⁵ Yena enatarato ya Muluku ohooniya, oopatjeriya wa ekhiyumpi yooteene. ¹⁶ Kontha, Mwa Yena, tjithu tjooteene phipankiyaaya, okhuma wiirimu mpaka vathi vaa, tjowoonia ni tjoohonia; okhuma ehitje mpaka othema, walaani akhulupale wala anawooriti, tjithu tjooteene tjipankiye ni Yena ni paara Yena. ¹⁷ Yena phiri oopatjera tjihinaaya tjithu tjooteene, tjithu tjooteene tjinkhuma wa Yena. ¹⁸ Yena phimuru oruthu, enari ekeretja. Yena phoopatjera, opatjeriya eriyari ya anankhui; phiimana, Yena haana nipuro noopatjer mwa tjithu tjootene. ¹⁹ Nantjivelihale Muluku oweria wawe wooteene, Mwa Yena, akhale, ²⁰ nawiihale nrettele nlatto wo phomeaawe wa nsalapani, nlatto wa yenani, naatane ni yena hata ni tjithu tjooteene, okhuma ntuniyani, mpaka wiirimu. ²¹ Hata ni nhuuva, khalayi, khamwaatjuweliya ni Muluku ni Awananiaawe m'muupuwelelo winhu ni miteko tjinhu tjoohiloka. ²² Massi, n'nava, howaatanihani mwiiruthuni wo namaawe, nlatto wookhua wawe, wo wiira othoonhereni attakattifu, ohotheriatjiya ethu ni ohivaanhihatjiya ohoolo Wawe, ²³ mwakhalelaka mowaaminini, nlipiheriya saana, n'hikumihiyaka muuwehenrani wo Ehapari mwin'walen'nhu, elalen'ye wa ekhiyumpi yooteene vathi waya erimu. Ehapari yeele miivano, Paulo, kikhanliaaka nanteko. ²⁴ Vano vaa, kinaatteliya m'mahuvihoni waka wa nhuuva, ni kinaamalihera, mwiiruthuni waka, enuuluma wa mahuviho a Kristo nlatto wo ruthuaawe, enari ekeretja. ²⁵ Eela phikeretja eriaaka nanteko, wonayeeli ovahatjeriyaaka ni Muluku, ekhuluveliaaya nlatto wawinhu, wo wiira mweettele Nuulumo na Muluku. ²⁶ Phiisiri evithiye vokhalayeene ni makhoto, massi ehothoonheriya wa attakattiifu aya, ²⁷ wo yeele Muluku etjuwelihaliaawe mihakhu wo Waria wawe essiiri eriyari waamalaponi, Kristo wa nhuuva, owehenra wo waaria. ²⁸ Phi Kristo hivano non'himieehu. Hiivano ninawuuhimeeriani, ossomihiya wootjuwelatja wooteene; wo wiira nuuthoonhereni wa Kristo. ²⁹ Phimaana, kin'nomananiha, wo nayeeli ekuru tjawe tjen'ye tjinvara nteko ni miivano ni kuru.