¹ Vano wahimiyaya wira nihana nirwaka Witalia, yahon'vaha Paulo ni anan'thukiya akhuawe, n'khulupale anakhotto, ihaniyaka Julio, okathi wa Augustino. ² Ni nahon'kela paketi adramatino, nettakan'no mapuro owattamela Wasia, vano nahorwa opahari, ahavo arrivo nihivano Aristarco, M'macedonio o Tessalonika. ³ Nihuku nikhuawe, nahophiya o Sidom; ni Julio, antafitiki Paulo wo manan'na orera, ahon'hiya orwa wassipathaniawe, wira akhaviheriye. ⁴ Wakhumaliawe vale, nahorwa m'paka o Chipre, kon'tha ephiowele yanotepa ottikhiya tjinene. ⁵ Nahovira m'phan'thi wo Cilicia ni o Panfilia, nahowa m'paka Mira o Licia. ⁶ Vano n'holeli anakhotoole, nam'phwanhale vavale paketi o Walexandria, arua m'paka Witalia, nahon'kela yole. ⁷ Nettakan'no vakani vakani mahuku mentji, nahophiya ni marikoriko oholo wa Cnido, Ephioele kayanithunihale ovira nttala yole, nahovira m'pantti wo Creta, oholo wa Salmone. ⁸ Ninaviralene ni marikoriko m'panttiuule, nahophiya nipuro nimotja, nihaniya Bons Portos, wattamelale epoma yo Laseia. ⁹ Onavirale owakathi muin'tji, ni ekwahele yahonopiha, kon'tha wahovira owakathi wothuka wo majudeu, Paulo anawalipihera, ¹⁰ Awirelaka: Alopwana, mi kinamona wira ekwahela enarwa orikarika, kahi pahi ekaruma wala paketi, hata ekumitjihun'nho. ¹¹ Vano n'holeli anakhottoole anviriyana tjinene capitao ni mwanene paketiuule ohiya tjithu tja himiawe Paulo. ¹² Okhala wira kawari okathi woririya, athu entji ahophela okhuma vavale, wona wira anaphiya Ofenix, enari eportu yo Kreta, ahokolelaka m'phan'tti wo phiyo wo sudoeste nu noroeste. ¹³ Vano wattikhiyaya ephyoeele tjinene ekhumaka ohitto, yona wira ahophwanha yaphelaya; vano ayena yahokhula n'thitterio yahattamela o Creta. ¹⁴ Massi, wanavirale owakathi vakani, yahowa ephio ylupale yihaniyaka Euroaquilao yahan'tjera onikhunela. ¹⁵ Ephio yele yahon'phuanha paketi, khanakhuitin'ri wikhikitjera, nahihiyen'ra okussiya ni phio. ¹⁶ Nahovira m'phan'tti wakhikitjerie ni thiki yihaniaka Clauda, nimarikoriko nihana nivareen'laka ebote enopola-ekumi. ¹⁷ Vano ayena, wavussaliaya ekalawa, yahokussa mikhoi othuka paketi. Yanamovatja orwa m'phan'tti orri m'pussu, ayena yahohiyatja n'thitterio yahan'tjera wettihiya. ¹⁸ Ninahuviye ni phio, nihuku nikinakun'ne tjahan'tjeriya orihelia ekaruman'nhe otawawe paketi. ¹⁹ Nihuku no neeraru, ekaruman'nhe nahan'tjera orihelatja otawawe paketi nimatatehu. ²⁰ Nihinathi okhuma n'tjua ni thon'tto wo mahuku men'tji, nihuvihiyakan'no ni phio yulupale, khanawehen'ra wira nanahala wopwa. ²¹ Anakhalale mahuku men'tji wohilha, vano Paulo, ahemela eriyariaaya, hira: Alopwana, mwahala okiviriya mi, khamwahala okhuma o Kreta, ni tjon'mo wira nikhikitjere mahuvihoaala nu pweten'ya. ²² Massi vano kinawuhimeriani wira n'khalane wamini; kon'tha n'kela okhuwa, massi paketi phin'hala opwetia. ²³ Kon'tha ohiyu yola kari ni n'laikha na Muluku, yole non'varelaka n'teko; ²⁴ Iraka: Ohove, Paulo; onaphwanela we othonheriawa Cesar; kon'tha Muluku havaha ekumi wa yale wakuamanalia ekwuheha. ²⁵ Phimana, alopwana, n'khalane wamini; kon'tha kinan'thuna Muluku ohala okhala tjo, ntoko tjihimiaya. ²⁶ Massi ninapwanela oriheliya othikini. ²⁷ wawaaliaya ohiyu wona khumi na tjesse, wakussiyehu n'phantti n'khuawe wo phareia Adriatico, wariaya ohiyu eriyari yamwettiha paketiaale yoniha n'toko yera yattamelaka ethaiya yorera. ²⁸ Yahorihela eprumu, yahophwanha ebraça cirini; yahorihelatho eprumu, yahophwanha ebraça khumi na thanu. ²⁹ Ni yanamova ophiyatja mapuro omaluku, yahorihela mithitterio tjesse, ephelaka wira onassale. ³⁰ Aphelatjaka othiawa yale An'mwettiha paketial, anakurussen'lene ekalawa enopola ekumi m'pareia, aphelaka ohiya mithitterio, ³¹ Paulo ahomwirela n'khulupale anakhotto ni anakhottoaale: Ala yahikhale m'paketinimu, khan'nohala wopoatja. ³² Vano anakhottoale yahokuattula mikhoyi tjo kalawan'nhe, yahahiya emoraka. ³³ Ophela ossa, Paulo anawalipihera oteneaale wera epatjere, iraka: Elelo nihuku no nakhumi na tjesse, n'narihani, n'khalaka wohilha, n'hittehattehaka ethu. ³⁴ Phimana kinawuhmeriani wira n'hana n'liaka ethu, eyo phiyorera mwikuminiwinhu; kon'tha ekhararitjinhu khatjin'hala omora m'muruwinhu. ³⁵ Wahimaliawe, ni aklussaka ephau, yena ahon'sukhuru Muluku eriyariwaya, ni ahomia, ahan'tja okhura. ³⁶ Otene, anariene olipiheriya, yahokussa ethu wira elhe. ³⁷ Nahavo eminha piili wo sapini na sitaathuene m'paketini. ³⁸ Anarupalatjalene, ayena yahon'vukula olemeliyawawe paketiule, arihela etiruku m'phareia ³⁹ Wassaliaya, khayatjuwelea ethayele; yona ephareya, yahupuwela, on'kussa paketi. ⁴⁰ Yahokwattula mithitteriotjawe, yahon'hiya erwaka ni phareya, yahothukula mikhoyi tjo leme, ni ahovussa evela yo phioni, yahoruatja ophareya. ⁴¹ Yahophiyatja nipuro nakumanatjaia ephareia, paketi ahattamela n'kherekhere ephareia, ahokhala vavale, massi epopa yera ekwanhuliyaka ni mawin'pi. ⁴² Vano anakhotto yahupuwela owinvakatja ana'thukiyaale wira hikhale ophela othiawa. ⁴³ Massi n'khulupale anakhottoole, aphelaka omopola Paulo, ahowateliha, ahoruma wira yole opatjera on'ram'pa itupelihe m'matjini ni aphiye wam'pussuni. ⁴⁴ Vano akhwawaale yahana yatharenlaka, akinaku ni thapwa, akinakuayo ni patassu tjo paketi. yahirania, otene yahopwa.