¹ Wamalalyaaya enhakunhaku, Paulo aahowiihana arumeyi, ni aahaaleeha, arwaaka Omacedonia. ² Waaviraawe tjen'nhe mittetthen'nhe, aalipiheraka ni moolumo mentji, yena aahorwaa Ogrecia. ³ Wakhalalyaawe myeeri miraru, majudeu akhwaawe yaahonfitina owakathi waapheelaawe ophiya Ossiiria, yena aaholakela ohokoleela Omacedonia. ⁴ Waaveleeliyaawe npaka waasiya, Sopeter mwaana a Bereia, Aristarco ni secundo, ni Gaio mwaana a Derbe, Timoteo, npaka Tiquico ni Trofino owaasiya. ⁵ Mooteenen'mo yaayo atthwaayo yaahaavo oopatjera okhuma ni yaahonanriiha Otroade. ⁶ Anavirale mahuku ossukuhuulu o phaawu yoohimiropo, naahorwaa Ofilipos, anavirale mahuku mathanu naahohokoleela Otroade, waakhalaleehu mahuku saapa. ⁷ Nihuku noopatjera nossumana, arumeyi anookomatjale wiira amyee ephaawu, Paulo aahowaateelihatja, apheelaka omyaa nihuku nikhwaawe; Ni aaholalyaa npaka ohiyu eriyari. ⁸ Ni tjaahaavo mithuko tjintji nipuro nookomatjalyaaya. ⁹ Ni aahaavo mwanlopwana n'motja iihaniya Eutco, ookomale watjanelani ni aahorupa, Paulo uulumaka owakathi mwintji, Eutico niikhove tjaarinaawe, aahomora ntjulu amorelaka vathi, ni aahokhwa. ¹⁰ Massi Paulo, aahokhuruwa, ni aahomooromela, ni aahonkapatta, iiraka: N'hikuthakuthyaatje, kontha nrimaawe nanlelo ori ni yena. ¹¹ AAhowelatho, ni amyaaka ephaawu, yena aahuuluma owakathi mwintji; Tjitjon'mo aahorwaa. ¹² Ni mwanlopwanooyo aahohokolossiya nari nkumi, ni yaaholipiheriya ventji. ¹³ Nihii, nirwaaka n'naviyu, naarwaale npaka elapo yiihaniya Assos, waarweehu omwaakhenla Paulo, kontha, kontha yena aanoohimya, ni yena aarwaa mwentta vathi. ¹⁴ Wakumaanatjaleehu elapo yiihaniya Assos, hii naahonkussa, ni naahorwaa elapo yiihaniya Mitilene. ¹⁵ Vano waakhumeehu, nihuku nowaakulela naahophiya Oquios; Nihuku nikhwaawe naaho phiya Ossamos; Ninahan'le Otrogilio, nihuku nikhwaawe naahophiya Omileto. ¹⁶ Kontha Paulo aaholakela orwaa woohivira weefeso, wiira hikusse owakathi mwintji waasiya; Kontha akuvatjera Ojerusalem nihuku nopentekoste. ni waahiiranyaa. ¹⁷ Massi yena aahovahenra moolumo waaryaawe Omileto npaka Wefeso, awiihanaka mahumu onkeretja. ¹⁸ Wawaatjalyaaya wa Paulo, yena aahowiirelatja: N'naatjuwelatja wiira okhuma nihuku niwaalyaaka waasia, tjaaryaaka owakathi wooteene ninhu. ¹⁹ Kaavarelaka nteko apwiya niwiiyeviha wooteene, meethori mentji, nuuttehattehiya, ni tjaahokipwanha efitina tjomajudeu. ²⁰ Ekoonanaleenhu mi akihiyale woohimeeryatjani, kissomihaka mwaatthuni ni n'manupani. ²¹ Kinvahaka namoona, omajudeu tjitjon'mo omagrego, wowiituthuwa wiira yiivahenre wamuluku, niwaamini waapwiyehu yesu kristu. ²² Niivano kinaryeene nin'nepa, kinrwaa Ojerusalem, kihitjuwelaka en'hala okiiraneela; ²³ Ohikhalaka wakhula epooma n'nepa nttakattifu onkivahaaya namoona, wiiraka ekhattyaa nimahuviho anaakiwehenra. ²⁴ Massi khiivo watjen'nha tjitthun'nha tjinkihela essukhuli, wala ekumyaaka kinakhala yooreeressa, wiira nuutteeliya kimalihere ntekwaaka, ninteko waakhenlyaaka naapwiya yesu, phiwon'vaha namoona olalyaa womahala wamuluku. ²⁵ Vano kinaatjuwela wiira khaavo wanhu, iiwale kilalyaaka omwene wamuluku, khan'hala okiwehatho. ²⁶ Phimaana mi kinoovahani namoonaaka wiira kiri ooreera nphomeniwinhu. ²⁷ Kontha akihiyale woohimeeryani ekettelo tjamuluku. ²⁸ Phimaana mwiitjiinanele mwaassineene, naatthu ooteene avahiyeenhu nin'nepa nttakattiifu, wiira nkhale ahakheli, ookeretja yamuluku, mpwanhalyaawe eriyari wophomyaawe. ²⁹ Kinaatjuwela wiira kakhumavale, tjinawoopwanhani elapwa tjuulupale, tjihn'hala olevenla enamatjinhu. ³⁰ Ni nheenhuru anaahala okhumenla atthu yuulumaka tjitthu tjoovirikana, wiira aahapusse arumeyi. ³¹ Phimaana nwehawehe, muupuwelaka wiira myeeri miraru, othana nuuhiyu akihiyale woohimeeryani ni meethori wakhula ntthu wanhu. ³² Vano, assun'na, kinoovahenrani wamuluku, ni moolumo omahalaawe; Yena phiri ooweryessa wiira oolipihatjeni mwa oottakattifihiya ooteene. ³³ Ehootjiveleni eprata, wala ewooru, wala ekuwo. ³⁴ Ni nheenhuru ntjuwele wiira, tjootthunatjaka ni yaari nimi, matataaka anaahala okikhavihera. ³⁵ Watjooteene mi kaanoothoonherani wiira kivarakatjo, waanopwanela waavilela aretta; Ni muupuwelaka moolumo aapwiya yesu, yiirale: Massi ooreeriya phuule n'vaha woovirikanoole naakhenla. ³⁶ Wamalalyaawe wuuluma, aahokhoroma avekelaka naayenatja ooteene. ³⁷ Ni yaahunlatja ooteene, ankapattaka Paulo, yaanon'vaha etjwaatjwa; ³⁸ Atjukulatjaka ventji, wootepessa nuulumo nuulumlyaawe, wiira khayoonatho ekhovyaawe; anveleelatjaka npaka waari navio.