¹ Ni waahiiranyaa wiiconio, anaarwaatjale nkeretja mwaajudeu, ninyuulumaka manan'na yaayo yaahaamini atthu entji, majudeu nimagrego. ² Massi majudeu oohiiwelela yaahaathuperyatja ni yaahaanhoonhihatja otteeliya waamalapo mwaha waassn'naya. ³ Vano ayenatja yaahokhala vale owakathi mwintji, yuulumaka naapwiya, yooyo anvaha namoona wonuulumo nomahalaawe, iiraka wiira mithoonhero nimiiriirya tjakhale tjoopankiya n'matataniwawe. ⁴ Naatthu onpooma yaahokawanyaatja, naatthu akhwaawe yaari nimajudeu, ni akhwaawe yaari naakhulupale. ⁵ Ni avraka tjoohikhala, majudeu naamalapo, vamotja ni mahoolelyaaya, wiira yuulume yootakhala waayenatja, ni yaahomakatje. ⁶ Ni ayenatja tjuwelaka eyo, yaahotthyawa arwaaka epooma yo Licaonia, yiihaniyaka Listra ni Derbe, elapo yooteene. ⁷ Naayenatja yaaholalyaa ehapari yooreera. ⁸ Nlopwana n'motja o Listra nookomale, aahaana mikatjamiho mettotjawe, oopahuwa nen'ne n'mirimani mwaanumwaane, aari hineetta. ⁹ Yoola aahomwiiwa Paulo uulumaka, yooyo, an'wehaka ratta, awehaka wiira yena ahaana waamini woophela ovonihiya. ¹⁰ Aahokhuwela ventji: Ovuwe nimettotja. Yena aahotupha ni aheetta. ¹¹ Atthu entji, woonalyaaya Paulo yaavaralyaawe, yaahokhuwatja ventji, yiiraka niiluuka yyoolicaonia: Amuluku ahiikhaliha toko apinaatamu, ni ahoniiweela. ¹² Ni amwiihanale Bernabe JupIter, ni Paulo, Mercuurio, kontha wuulumawawe ari n'hooleli. ¹³ Nankuttho ojupiter, aari ohoolo wopoomaaya, awaanaka akhwaawe ni tjooreerela nkhora onkeliya, yena, naatthu yan'veleela, yaapheela waavahatja okuttho. ¹⁴ Massi arumeyi Paulo ni Bernabe, wiiwalyaaya tjo, yaahaahulatja ekuwotjaya, ni yahaatupha atthu, akhuwelaka. ¹⁵ Ni yiiraka: Nhu mwaatthuvaa, n'nopankelani tjitthun'nha? Nihi naatthu toko nhu, tjinuupuweleenhu nihi tjitjon'mo, nihoolaleerani ehapari yooreera wiira mwiivahenre n'huluwaka tjitthu tjoohikhala nrwaaka wamuluku nkumi. ¹⁶ Yooyo makhoto avirale haahiya amalapo attaraka ephirotjaya. ¹⁷ Watjooteene, khanoohiyani woohinamoona, apankaka yooreera nen'nenen'ne wiirimu, anivahaka epula, ni owakathi womihokorokho, atjalihaka mirimatjihu eyoolya nuutteeliya. ¹⁸ Nahimyaleene eyo, atthu yaahoonela wiira ahipanke okuttho waayenatja. ¹⁹ Massi yaahowa majudeu akhwaawe akhumaka wantiquia, ni wiiconio, yaahaakhumelela atthu, an'homakatjaka Paulo, yaahon'rweehatja ota wopooma, yoonaka toko yena hokhwa. ²⁰ Massi, arumeyi anan'rukureeryale, aahovuwa, ni aahoraw opooma, orupossenliya aahokhuma ni Bernabe arwaaka wa Derbe. ²¹ Waalalyaalyaawe ehapari yooreera epoomeele, ni yaapankalyaawe arumeyi, ayenatja yaahohokoleela wa Listra, ni Iconio, ni wantioquia. ²² Awehaka mirima tjaarumeyi, ni aalipiheraka wiira akhale mowaaminini, ni onaapwanela hii okela muumweneni mwamuluku mwaha womahuviho mentji. ²³ Ananthanliye mahumu wakhula ekeretja, avekelaka nuutthuka, ayenatja yaahoveleelihiya waapwiya, yooyo antthunalyaaya. ²⁴ Waaviralyaaya elapo yo Pisidia, yaahorwaa npaka elapo yo Panfilia. ²⁵ Wuulumalyaaya nuulumo Operges, yaahokhuruwela wa Atalia. ²⁶ Wakhumalyaaya vale yaahorwaa npaka wantioquia, waavahiyaaya mahala amuluku wanteko waavaratjalyaaya. ²⁷ Waphiyalyaaya, athukumanaka niikeretja, yaahuulumela tjitthu tjaapankiyaaya ni muluku, ni tjaatthukulalyaawe nkhora wowaamini waamalapo. ²⁸ Ni yaahohalatja vale owakathi mwntji naarumeyi.