¹ Yahavo amuinthutjihi ni maprofeta ekeretja yo Wantioquia. aari Bernabe, Simao, ihaniyaka Niger, Lucio o Cirene, Manaem, mwamun'nawe akhalaniya ni n'khulupale Herodes, ni Saulo. ² Wankokhorelaya Pwiya ni yanathuka, N'nepa Nttakattifu wahira: "Mwakawanihe Barnabe ni Saulo yavare n'teko owihanen'liaka". ³ N'nathukale, mwavekelele ni n'watalele matata alopwanala ayena yaharuma. ⁴ Vano, Barnabe ni Saulo yahin'wen'la N'nepa N'ttakattifu, yahokhuruwela o Saleucia; vavale yahorwa ethiki yo Chipre. ⁵ Wariaya epoma yo Salamina, yanalaleya nulumo na Muluku n'sinagoga yo majudeu. Yahana Joao Marcos n'toko n'khaviheroaya. ⁶ Walapuwen'liaya mphntti otene wo Pafos, yahonphwanha n'lavilavi m'motja, profeta owotha o Judeu ihaniya Barjesus. ⁷ Yola n'lavilaviula ari ninkhulupale Sergio Paulo, yoyo ari n'lopwana otjuwelatja. Yola ahoruma wihaniya Barnabe ni Saulo, kontha aphela win'wa Nulumo na Muluku. ⁸ Vano, Elimas, "n'lavilavi" (pintaphulelaya ntjinan'no), amananiha on'hapussa n'khulupaleole waminiwawen'wo. ⁹ Massi Saulo, ihaniaka Paulo, otjaria N'nepa N'ttakattifu, ahonweha m'methoniwawe, ¹⁰ ni hira: "We, mwana a Ntjassera,ori otjaria tjo nhala. We onmwanani ossariya. Khunun'nhela otharathara mittala tja Pwiya? ¹¹ Ni vano, ntata na Pwiya ninahala wuttarussa, ni kun'hala woona, kun'hala woon'na ntjuwa owakathi vakani. Ni owakathi yoyo Elimas ahona ewiriphi, ni yena, ettakatjaka ninkuruku, amphelatjaka nthu wira amwettihere anvarenlaka ntata. ¹² Vano nkhulupalioole, wonaliawe yiraniaale, ahothuna, atikhinatjaka ekettelo tja Pwiya. ¹³ Nakhumale o Pafo, Paulo ni yarinawe yahorwa o Perges, epoma yo Panfilia. Massi Joao, amwalan'naka, ahohokolela o Jerusalem. ¹⁴ Ni ayena, anaviralene o Perges, yahowa Wantiquia, epoma yo Pisidia; ni wakelaya nsinagoga nihuku no sabado, yahonkomatja. ¹⁵ Ni enassomiya yo kettelo ni maprofeta, aholeli onsinagoga yahomuirela, yiraka: Alopwana, eriyariwinhu akhalaka wira havo rina nulumo nowalipihera athu, ahimie. ¹⁶ Ni Paulo, ahemela athonhatjaka ni matata, ahira: Alopwana mesraelita, ni nhu n'nomoova Muluku, mwiwe: ¹⁷ Muluku athuaala owisrael hathanla an'napapehu, ni howun'nuwiha wathuaala, anarieene anan'wa ethaya yo Egito, ni matata ovussiya, ni yena ahakumiha. ¹⁸ Ni nuwakathi wo mwakha arupaini, yena havilela ekhapilatjaya muthakoni. ¹⁹ Ni nakwanhulaleene elapo saapa ethaya yo Canaa, ahowuntela ethayeele nu tjaliya. ²⁰ Tjotenen'nho Tjiraniaale muakha eminha tjesse wo hanssini, yena hattarussa, mpaka profeta Samuel. ²¹ Ni yahonlepela Mwene, ni yena ahava Saul, mwana aa Quis, nlopwana aa nikhito na Benjamim, mwakhatjene arupaini. ²² Ni wankumihaliawe ole, ahonvussatho mwene Davi, ahonkalela ossahiti, ni ahira: Mi kihomphwanha Davi, mwana a Jesse, nlopwana onayeli wa nrimaka, nkela opanka othunawaka. ²³ Wa nikhoto nen'na, ntoko okhulivelihiya, Muluku hon'wana moopoli Wisrael, Yesu; ²⁴ Napatjenre Joao, hinaya owa, alaliaaka mpattisso wo wituthuwawa athu o Wisrael. ²⁵ Massi Joao ahovara ntekoaawe, hira: N'nupuwela wira mi kipani? Mi akinakhala Kristu, piyole n'hala owa oholowaka, mi akimphwanela otaphula mikhoyui tjo sapathotjawe. ²⁶ Assun'naka, assaana oo nikhoto na Abraao, ni yale anomoova Muluku, n'howaneliya nulumo wowoopoa won'no. ²⁷ Kontha yale ankhala o Jerusalem, aholeliaaya, ahintjuwelelaka yooyo, wanthukelaaya, ahovara nteko ntjuu no maprofeta, ansomiya khuta esabado. ²⁸ ahimphwanhanale ethu yophela omotheria aphelaka omwinva, ahonlepela Pilatos wira ahana inviyaka. ²⁹ Wamalihenriaya tjithu tjotene tjantikhiye mwaha wawe, yahonkumiha wansalapani, yahon'hela m'mahiye. ³⁰ Massi honvussa n'nookhwani. ³¹ Ahoniya mahuku mentji yale yanvelelale okuma Ogalileya, phari namona waathu. ³² Ni hivano niholaleriani ehapari yokhuluvelihiya yapankiyeliye an'napapehu; Muluku ahonvarela natiriuule, assanaaya, avunsaka Yesu. ³³ Ntoko tjantikhiyaaya elivuru ya salmo onapili: We omwanaka, elelo kihoyara. ³⁴ Ni phiyeyo Muluku nvussaliaawe n'nokhwani, wira ohihokoleletho eruthu otheka, phiraliaya tjoo: Mi kinamuvahani mareriho orera ankhuluvelihaliaaka Davi. ³⁵ Thimana hata esalmo ekhuawe ehira: Ohinthunihe ttakattifuaa hana athekaka. ³⁶ Kontha wekhweli, Davi nettihenre ekano tja Muluku, hokhwa, ahossikhia nkhayi nan'napapaawe, ni hotheka. ³⁷ Massi yole Muluku nvussaliawe khamphwanhanale etampi. ³⁸ N'haana ntjuwelaka, assun'naka, wa yola n'nahimeriya eketto tjotampi. ³⁹ Ni tjotene wo kettelo tja Moises yahapeliye ohimiakatjiya, wa yole nkela onthuna hana ahimiakatjiyaka. ⁴⁰ Vano moone, wira ohoweleni yele yantikhiye elivuru yo maprofeta. ⁴¹ Nhu anamatanhifu, moone ni ntikinihiye, ni nkhwatje; kontha mi kin'novara nteko mahukuaala, nteko ohinthunen'nhu, n'nthu ohimerikani. ⁴² Ni wakhumaya nsinagoga, yahonlepela wira essabado ekhwaweahimerietho yaayo molumoaayo. ⁴³ Wamalaliaaya nkuthano nsinagoga, ma Judeu, ni anatiini athu yarukunussale nrima ahiri majudeu, yahonthara Paulo ni Barnabe; ni yaala, yahomeriaka, yanonilipihera okhala wa mahala a Muluku. ⁴⁴ Ni esabado ekinaku yahothukuma epoma yotene wo wira yinwe nulumo na Muluku. ⁴⁵ Massi ma Judeu, wawonaliaya athuaale, yaho tjarana nttima, yahantja onvanhiha Paulo yele yahimiawe, anvanhihaka ni antarawaka. ⁴⁶ Massi Paulo ni Barnabe, yulumaka ni ehovaka, ahiratja: Wanaphwanela ohimeriya tokoni nulumo na Muluku, massi okhala wira n'nakhotta, khan'nophwanela ophwanha okumi wohimala, n'nonoona nirwaka wa malapo. ⁴⁷ Kontha tjo a Pwiya ahoniruma, yiraka: Mi kihoheka ntoko nthuko wa malapo, wira we okhale ntoko woopoa mpaka etuniya yotene. ⁴⁸ Ni amalapo, win'waliaya, yahotteliya, ni yanonttottopela Pwiya; ni yahothuna otene yari othanleliya okumi wohimala. ⁴⁹ Ni nulumo na Pwiya nera nihimiyaka nttethe wotene. ⁵⁰ Massi ma Judeu yahalipihera athiyana akina ohissima ni ottithimihiya, ni aholeli opoma, yahantja womolanihiya an'na Paulo, ni yahowomolatja mpaka nkerekhere epoma. ⁵¹ Massi ayena, yahotathela nthupi no mettoniwaya, yahowa mpaka Iconio. ⁵² Ni awinthutji yahokhalana otteeliya ni N'nepe Nttakattifu.