¹ Paulo, Silvano ni Timoteo wa Ekeretja yoo Tessaloonica wa Muluku Paapa, ni wa Pwiya Yesu Kristo. Mahala ni nrettele wa nhuuva. ² Hiivano ninansukhuru Muluku wa nhuuva ooteene, nuhimiakani m'mavkeloni winhu. ³ Niwuupuwelakani woohootjia, eriyari wa Muluku ehu ni paapa, wa miteko wo wamini winhu, ni nteko wo nfento ninhu ni wossunka owehenra winhu mwa Pwiya Yesu Kristo. ⁴ Assun'naka ofentiya ni Muluku, nihotjuwela wiira Yena hoothanlani, ⁵ kontha Ehapariihu khiphiyale mpaka eriyari n'nhu paassi wo nulumo, massi ni kuru wo N'nepa Nttakattiifu ni wokupali wooteene. Vano, ninaahala otjuwela naari athuni waarihu eriyari in'nhu, nipankaka paara makhalelo en'nhu oreera. ⁶ Nhuuva n'hokhala athu oonitakiha ni aa Pwiya, mwaakhenlaka Nuulumo nuutteliya wo N'nepa Nttakattiifu, onookhalaru ohawatja. ⁷ Phimaana n'hokhala nthoonhero wa mwaamini ooteene oo Macedonia ni oo Acaia. ⁸ Eriyari in'nhu, Nuulumo naa Pwiya nihomwarieela, kahi paahi oo Macedonia ni wAcaia. Massi wakuta nipuro, waaminiwinhu mwa Muluku ehohimiakatjiya. Phimaana khaninoona ethu yoohimia. ⁹ Yenatja phinttonkatja enan'nani ewakhenlaleehuni ni m'mwaakenlale tjani Muluku, mwaahiaka amuluku oohikhala paara onvarela nteko Muluku nkumi ni eekhueeli, ¹⁰ m'mwaariihaka Mwanawe, awaaka wiirimu, vuwenlale muukhuani. Oyo phi Yesu, nonithukula wa oviruwa on'wa.