¹ Nhuuva n'natjuwela, assun'na, wiira owootalawinhu kahi woomahala. ² N'naatjuwela wiira nihotafitiya wo manan'na ohaaya oFilipo. Hata tjom'mo nihonkhuluvela Mulukueehu wo wiira nimeelane Ehapariaawe ninhuuva, pooti okhala ni marikoriko ³ Kontha olipihera wihu khunakhala woovonha, walani wootakhala, hata woothepia. ⁴ Massi, ntoko tjiwaaleehu nithanliyaka ni Muluku wo wiira Ehapari awe nikhuluveliye, ninawuuluma tjiitjan'mo, kahi woophela watjiviha apinatamu, massi woontjiviha Muluku. Yena phi Yoole nowehaweha mirima tjihu. ⁵ Phimaana khaninlamuliya okusa muulumo wo wiira nuutjiveliheni, ntoko tjintjuwelen'nhu, walani woophela owin'nherani. Muluku phi saahiti oyeeyo. ⁶ Khaninrwela nttittimiho wa pinaatamu, wala wawinhu hata waakinaku. Ntoko maapostolo aa Kristo, nanaahala wuukhanhenrihani wiira n'nipanke. ⁷ Wohikhala voo, nahokhala amalaponi wariyari winhu, ntoko namananthu tjinamaalihaawe assanaawe. ⁸ Wo manan'na yaayo, mwaha wonifento wo nifento orineehu ni nhuuva, naahokhala otteeliya woomeelana ninhuuva kahi paasi Ehapari ya Muluku, hata niikumi tjihu. Kontha n'hokhala owuuthunani ventji. ⁹ Assun'naka, woohanhihera muupuwele miteko tjihu ni ohuva. Nihovara nteko ohiyu ni othana wo wiira nihoolemeliheni. Okhuma yoole owakathiuule, wuulaleranihu Ehapari ya Muluku. ¹⁰ Nhuuva nkha enamoona, ntoko Muluku, ntoko tjikhanlehu wo makhalelo ettakattiifu, wosariya ni ohivanhihatjiya ninhuuva, nthunale. ¹¹ Wo manan'na yaayo, n'natjuwela wiira nihontafiti wa kuta nthu ntoko paapa tjinatafitiaawe asaanaawe, ¹² nulipiherakani, ni nhuukhanhen'rihakani wo wiira nkhale wo manan'na oreera aa Muluku, nowiihanani paara wuumweneni wawe ni waaria. ¹³ Phimaana nihiivano ninansukhuru Muluku wakhula ewoora. Kontha, wakhenlalen'nhu nihuvano Nuulumo nin'walen'nhu, khankupalale ntoko nuulumo naapinatamu, ntoko manan'na tjiriaaya, Nuulumo naa Muluku. N'na phi Nuulumo ninoovarelani nteko, wiira nthune. ¹⁴ Kontha nhuuva, assun'naka, n'hokhala athu otakiha okeretja tja Muluku tjiri oJudeia, mwa Kristo Yesu. Kontha n'hohaawela tjen'yo tjithu n'yo tja sun'ninhu, ntoko ayen tjihawelaliaaya tjo maJudeu. ¹⁵ Akhanle maJudeu pha muinvale Pwiya Yesu hata ni porofeeta. Yaayo phinoomolale. Ayenatja khaan'ntjiveliha Muluku yaayo awanani aathu oteene, ¹⁶ ni ananaateliha wiira nihaahimeerie amalaponi paara woopoa waya. Wo manan'na yaala, anintjenra etampi tjaya. Nttarusso niwaale paara ayena woo himalatho. ¹⁷ Hivano, assun'na, khanikhanle vamotja ni nhuuva owakthi vakaani, niwehenraka, kahi ni wanrimani, nin'nokutakuthia woopheela owoonani tootho. ¹⁸ Kontha ninaapheela owootolani. Mi,Paulo, kihomananiha owootolani tootho, massi sotuani ohikhikhitjera. ¹⁹ Kontha, aPwiya Yesu yahokolia, tipani nkela okhala oholo wihu, otteliya ni nthuvo wootteeliya eriyari Awe? Walani khanri ntoko akianku ayo? ²⁰ Kontha nhuuva nttittimiho nihu ni otteeliya wihu.