¹ Mwene David ahiira nthukumano wootene: "Salomao, mwaamwaka, wa yoole Muluku nthanlalyaawe, nanlelo mwankaani ni khanaaya otjuwela ethu, ni entokooyo muulupale. Kontha etemploiiyo khinakhala yaathu, ya Muluku Pwiya. ² Phimaana, kihopanka wooreerela wo wiira kivahenre enupa yaa Mulukuaaka. Kinaavaha ewooru wiira tjipankiye tjithu tjowooru, eprata wiira tjipankiye tjithu tjooprata, ebronze wiira tjipankiye tjithu tjoobronze, efeerru wiira tjipankiye tjithu tjoofeerru, ni ethaapwa wiira tjipankiye tjithu tjoothaapwa. Ni kinaavatho maluku oniix, ni maluku wiira ephiteerihiye, maluku wiira evareliye nteko ni ekhalanaka ekoore tjintji, ni wakuta etiipo yo maluku owaarya ni maluku omaarmore meentji. ³ Vano, mwaha ootteeliya waka nlatto weenupa ya Mulukuaaka, mi kineera kivahaka mihakhutjaka tjowooru ni eprata. Kimpankelaaka tjoo wiiraka kihothenkatja paara enupa yeela Yeetakattiifu: ⁴ Ekonto thaaru tjowooru tjoofir, ni ekonto saapa tjooprata tjotjenkiya, wo wiira tjiheliye nsirini. ⁵ Kinvahera ewooru wiira tjipankiye tjithu tjoowooru, niipraata wiira tjipankiye tjithu tjopraata, ni tjithu tjooteene tjomiteko tjimpankiya ni yaale ampakatja. Tipani nopheela otjanka, wowiivahenra, paara Pwiya ni wiira areerihiye, elelo? ⁶ Vano, waahopankiya ntjanko naahooleli anamutjini an'naapaapeehu okhalai, ahooleeli oonikhoto naaIsrael, macomantante ekonto ekontotjene ni eminhatjene, ni mooficial wa miteko tjaamwene. ⁷ Ayena yaahova, paara nteko weenupa ya Muluku, ekonto thanu niikonto khuumi tjowooru, ekonto khuumi tjoprata, ekonto khuumi nanaane tjobronze ni ekonto eminha tjofeeru. ⁸ Yaale yaarina maluku owaariayaahovaha paara mihakhu tjoonupa yaa Pwiya, wawehawehaawe Jeiel nikhoto naa Gerson. ⁹ Athu yaahokhala otteeliya nlatto tjovahatjaya wa yaale yiivahenra. ¹⁰ Davidi ahoonttittimiha Pwiiya eriyari waanthukumano wooteene. Yena hiira: "Attittimihiye aa Pwiya, Muluku an'napaapeehu Israel, mahuku oteene. ¹¹ Yaawinhu Pwiya eyuulupale, ekuru, waaria, othema ni nttittimiho, kontha yeele eri wiirimu ni vathi vaa yawinhu. Omwene waawinhu, Pwiya, ni Nhuu n'naattittimihiya ntoko nkulupale otjithu tjooteene. ¹² Okhuma mihakhu mpaka nttittimiho om'mwa wanyuuva, ni Nyuuva n'na waakhwitiri athu oteene. M'matatani winhu, ohaavo ekuru ni khikitjero. Nhuuva n'haana ekuru nuuweria wowun'nuwiha athu ni waavaha ekuru wa yoole nonthuneen'nhu. ¹³ Vano vaa, Mulukueehu, Ninaauussukhuruni ni nittittimihiye ntjinaninyu. ¹⁴ Mi kimpani, athuaaka mi paavi, wo wiira nivahe woothunawuhu n'nya tjithun'nya? Weekhueeli, tjithu tjooteene tjinkuma m'matataniwinyu, ni hiivano nin'hokolossa yeele eri yawinyu. ¹⁵ Kontha hiivano niri athu oowa ni oweetteetta eriyariwinyu, ntoko tjaariaaya an'naapaapeehu okhalayi. Mahukuiihu ntuniyanimu ari ntoko nthuutji, ni khuuvo owehenra ni okhala ntuniyanimu. ¹⁶ Pwiya, Mulukuiihu, mihakhu tjitakanihaleehu wiira netekele enupeen'nyu, woottittimiha Ntjinaninyu nowaaria tjinkuma M'matataniwinhyu ni tjinkhala tjawinyu. ¹⁷ Ni mi kinaatjuwela, Mulukuaaka, n'noweha nrima waanthu ni nrina oweria woolevenla. wa ntoko mii, kihoovahenrani nrimaaka, wothunawaka, tjithun'nya tjooteene, n'navaa kinamoona nuutteeliya wiira Athuin'nyu ari vaava, woothunaaya, anaawaana tjoovahatja eriyari winyu. ¹⁸ Pwiya, Muluku Abrahamu, Isaque ni Israel an'napaapeehu okhalai nsunke mahuku oteene m'mupuweleloni waathuinyu. N'hoolele mirimatjaya n'weettihere mphironi winhyu. ¹⁹ Muinvahe Salomao, mwaamwanaka, othuna wamirima tjooteene wiira tjisunke Ekettelotjinyu, ekettelo tjowataanawinyu, ni wiira nimalihere epalanu yo wiira niteke epalacio woyeele etjenkaliaaka. ²⁰ David hiirela nthukuman'no wooteene: "Vanovaa, mwaattittimihe aa Pwiya, Mulukueenyu". Nthukumano wooteene waattittimihe aa Pwiya, Muluku an'napaapeen'nyu; yaahooromihela murutjaya vathi ni yahonkokhorela Pwiya ni yaahokokhora ohoolo waamwene. ²¹ Nihuku nikina, ayena yaahaavaha nkutho aa Pwiya ni yaahaavahenra ofertaaya woopahiya. Ayena yaahovaha etooru ekontotjene, nii karneero ekonto, nii pwittipwithi ekonto, ni tjovahatjaya tjoo viinhu ni mukutho mwiintji waa Israel ooteene. ²² Nihuku nen'ne, ayena yaaholya ni yaahovurya eriyari yaa Pwiya, nuutteliya wooteene. Ni yaahompankela Salomao, mwaana aa Davidi, mwene wonayeeli tho, ni yaahontuphela niikuru tjaa Pwiya wiira ahoolele. Ayenatja yaahontuphela Zadoque wiira akhale namukutho. ²³ Vano, Salomao ahonkoma wahitjeni waa Pwiya, ntoko mwene wa nipuroni waapaapaawe, Davidi. Yena ahothatjiri, ni Israel yanomwin'welela. ²⁴ Ahooleli oteene, atoropa, ni assaana aa Davidi yahonttittimiha Salomao. ²⁵ Ni aa Pwiya yahomun'nuwiha Salomao ohoolo wa Israel ni ahonvahatjera ekuru tjaariaawe hinaaya onvaha mwene eriyariaawe wiisarel. ²⁶ Davidi, mwana aa Jesse ahon'hoolela Israel ooteene. ²⁷ Davidi aari mwene ooIsrael mwaakha arupaini. Yena hohoolela muaakha saapa weHebrom ni talaathiini nararu ooJerusalem. ²⁸ Yena khuale nuuwuuluvala wooreera, nuukumi mwiintji wooreera, nimihakhu ni nttittimiho. Salomao, mwaamwanawe, ahonttiya. ²⁹ Miteko tja mwene Davidi tjiri tjowantikhiya mwa livuru yaa Kronica ya Samuel, namilohi, wa ottonkatja wa namilohi Nata, ni ottonkatja wa namilohi Gade. ³⁰ Won'wo phantikhiyaaya miteko tjuumeneaawe, mitekotjawe, ni tjithu tjipankaliaawe, Israel ni mamwene eelapo tjikina.