¹ Davidi ahaakoha mahooleli yaale yaahoolela athu ekonto emotja ni mahooleli athu eminya emotja, ni wokhula n'hooleli. ² Yena ahohimeerya n'thukumano wooteene wIsrael: "Yakhala wiira piyooreera wa nyu, yakhala wiira enkhuma waa Pwiya, Mulukuiihu, ninawaaruma athu wo mapuro ooteene wassulupaleehu ankhala wo mapuro ooteene owIsrael ni wanamukutho ni malevita ari mpoomawaya, wo wiira ethukumane ni hiivano. ³ Niwaane nivuku naa Mulukuiihu, kontha khanirweelale Othunawawe owakathi wa Saul". ⁴ Nthukumano wooteene waahothuna wophela opanka yeeyo, kontha yaahaatjivela athu ooteene. ⁵ Vano, David ahathukumaniha athu ooteene Wisrael, okhuma muro woo Sior, Wegipto, mpaka Oleo-Hamate, wiira awaane nivuku naa Muluku oo Quiritiate-Jearim. ⁶ Davidi Nuwisrael oteene yaahoruaatja O Obaala, okhanle Quiriate-Jearim, oo Juda, wiira awaane won'wo nivuku naa Muluku, wonwo orweeliyaaya ntjina naa Pwiya, waaryaaya wahitjeni, onkhalenliyaaya ni Maquerubim. ⁷ Vano, aletje yaahelatjale nivuku naa Muluku nkaaroni yophiyaaru ni yaahowaanatja ekhumanaka ethoko ya Binadabe; Uza ni pheettiha ekaaroeele. ⁸ David nan'na Israel ooteene yuupuwelelaka nihuku naa Muluku niikurutjaya tjooteene. Aletje yaakhala yiipaka tjowiipelatja tjonkhoyi, ekoma, ecimbalo ni mapenka. ⁹ Waphiyalyaaya mapuro yapankiya essukuhulu o Quidom, Uza aahotaphula matataawe wiira alipihe nivuku, kontha ekaroeele yaanookuathuliya. ¹⁰ Wowaakuviaatjeene, oviruwa wa Muluku waahowa wa Uza, ni Muluku aahomwinva, kontha yena anootaphulela matataawe wa nivukuni. Ni yena kwelale vaavale, ohoolo wa Muluku. ¹¹ David ahokhala ootikinihiya konth essiyani Pwiya wakhanliaay onttarussa Uza. Nen'ne nipuron'ne ninkhala nowiihaniya Perez-Uza, mapaka nihuku nolelo. ¹² David ahomoova Muluku nen'ne nihuukun'ne, ahiira: "Manan'nani tjin'hala okussa nivuku naa Muluku? ¹³ Vano, David khaakussale niviku owan'nyawe, massi ahooruma wiira erwaaniye enupa yoo Obede-Edom, waari oo geteu. ¹⁴ Nivuku naa Muluku yaahokhala owan'yawe Obede- Edom mweeri miraru. Vano, aa Pwiya yaahottakattifiha enupa ya Obede-Edom niithu tjooteene tjaarinaawe.