¹ Mafilisteu yaahowana ni Israel, i atthu oIsrael yaahotthawatja ni yaahorakalatja omwaako Gilboa. ² Ni mafilisteu yaahomoomolatja Saul naassaanaawe ni mafilisteu yaahomwiivwtja Jonata, Abinadabe ni Malquisua assaana a Saul. ³ Ni ekhotto yaahonrikarikela Saul, anamatheere yahonvara ni yaahonrakalihatja. ⁴ Vano Saul aahomwiirela nonkhuluvelaawe: Okumihe ekataneeyo okiive, wiira ahikiphwanhatje akihon'natjaka. Vano yena khatthunale kontha aanawoova ventji, Saul aahokussa ecatana ni aahiitjiiva. ⁵ Nonkhuluvelaawoole wamoonalyaawe Saul wiira hokhwaa niyena aahiitjiiva. ⁶ Saul naasaanaawe araru yaahokhwatja niinupaawe yooteene. ⁷ Atthu o Wisrael watjuwenlyaaya wiira anakhotto yaahotthawa ni Saul naassaanaawe ahokhwatja, yaahohiya epoomatjaya ni yaahotthawatthawatja ni mafilisteu yaahowaatja nookhalatja mon'mo. ⁸ Nihuku nikhwaawe mafilisteu warwaaya wariha atthu ookhwa yaahonphwanhatja Saul naassaanaawe anaanyaatjiye omwaako Gilboa. ⁹ Yaahokussatja murwaawe niikaputthitjaya ni yaahothoonhatja elapo yooteene yomafilisteu wiira yaalalyeere attonttwaaya naatthu ooteene. ¹⁰ Ni yaahohelatja ekaputthijaya nkapela mwaamulukwaaya, yaahohela murwaawe nkapela mwa Dagom. ¹¹ Atthu ooteene oJabes-Gileade wiiwalyaaya tjooteene mafilisteu tjanpankalyaawe Saul. ¹² Alopwana ooteene ootjuwanyaa yaahovuwa okussatja nrutthu na Saul niirutthu tjaassaanaawe, ni yaahaarweehatja oJabes ni yaahossiikhatja makhuvaaya oJabes ni yaahotthukatja mahuku saapa. ¹³ Saul khwale ohiiwelelawawe wahiiwelenlyaawe Apwiya mwaha onuulumo na Pwiya mwaha woorweela yonttehatteha. ¹⁴ Woohinrweela Pwiya, phimaana yena wamwiivalyaawe ni hovira muumweneni mwa Davi mwaana a Jesse.