1 Yahanle mahiku maili ophiya nira na Pasika nna iphau vyohiheliwa miropo. Alupale a anamukhuttho n`anamahuvyiha a ikano yaniramela okathi w`onphara Yesu mwitiho,wira emwiphe. 2 Nvyo yanillana wira: Nihinphare nihiku na nira,wira ohikhumelele onyakulihana w`atthu. 3 Yesu ari o Bethania,owannye Simoni,aithaniwa Namakuttula. Atthaka n`atthu akina,ahivolowa mpani muthiyana mmovya,akunsye murinki wa mwala,withaniwa ``alabastro``. Murinki uwo wavyalamo makhura awunkhela orikarika,yairiwa ``nardo``. Muthiyan`owo ahittula murinki ule,aitthela makhur`ale vamuru wa Yesu. 4 W`atthu yari-mo, akina yahinanariwa,ekelela olelana, wira: Makhur`ala anhononeliwa-ni? 5 Warerenle otumihiwa ni musurukhu wawatha,ekaweliwa alipa-ohawa. Vyivyo,yaninruwana nthiyan`owo. 6 Nvyo Yesu ahalela wira: Mkanhiyeni. Nninhukhumelani nthiyan`ola? Ola okirela miyo etthu yorera. 7 Alipa-ohawa anokhalaka eriyari nnyu mahiku othene: nnowerya owirela vyorera okathi wothene muntthunannyu. Nvyo miyo nkinkhala ni nyuwo mahiku othene. 8 Nthiyan`ola irale onweryaiye: ohottiha makhura erutthu aka ohakunve ovithiwa waka. 9 Kinolelani exariya wira: mapuro othene anrowawa olaleiwa Ehapari Yorera,nlaponi mothene,yelo-tho nthiyan`ola yiraleiye enrowa olaleiwa,upuweliwaka yola. 10 Nvyo Yuda Isikaryoti,mmovya w`ale muloko naili,ahirowa w`alupale a anamukuttho,wira avaherere Yesu. 11 Awo yamwiwalawa,yahitteliwa murima, enlela wira anonvaha musurukhu. Nvyo Yuda aniryamela okathi wokhweya,wira anpharihe Yesu. 12 Nihiku nopajerya vyakhuriwawa iphau vyohiheliwa mirop, nenno-tho n`ohitiwa ipwittipwitthi vya Pasika,anamahuvya a Yesu yahinkoha wira: Munthuna wira nokottihereni vai yotta ya Pasika? 13 Yesu aharuma anamahuvya ye aili,alelaka wira: Murowe onttettheni: nnokumana ni nlopwana mmovya oireiye mwapu wa mavyi. Mwantthare yowo: 14 mpani onrowaiye ovolowa-mo,mwanlele mwanene emp`elo wira: ``Apwiya annokohani wira: Nri vai nipuro kinrowaka otta-vo nira na Pasika vamovya n`anamahuvyih`aka?`` 15 Mwanene owo onawothonyerani mpani mwe w`ovyulo esala yorerihiwene: mwenmo mwatthukumanye yott`ahu. 16 Anamahuvya ale yahirowa,yahiphiya omuttettheni,yahipwanya nkhama alenleiye Yesu,ethukumanyera yotta ya Pasika. 17 Nvyuwa niputuwenle,ahura owo ni vamovya n`ale muloko nili. 18 Ekilanthi va mesa ettaka, Yesu ahilotha wira: Kinolelani exariya wira: mmovya a nyuwo,ontta ni miyo,onokiphariha. 19 Awo yahiripiwa murima,epajerya,mmovya-mmovya,onkoha wira: Khama ti miyo? 20 Yesu ahakhula wira: Ti mmovya a nyuwo,muluko naili: mmovya onrerya ni miyo etijela emovya. 21 Exariya: Mwana a Mutthu onokwa ti vyivyo,nkhama vyatikhinwawa mwaha wa yowo: nano,otakhaliwa nlopwan`ole onrowa onphariha Mwana a Mutthu. Fatari mutth`uwo ahayariwe. 22 Okathi attaiye,Yesu ahikusya ephau,ahinxukhuru Muluku,ahikawa ephau elo,avaha anamahuvya ye ahimaka wira: Mukuce: ela teri erutthu aka. 23 Vyivyo-tho ahikusa ekalisi ya evinyu,ahinxukhuru-tho Muluku,evaha yawo: othene yahiwurya. 24 Yesu ahalela wira: Ela teri ephome aka: ephome ya watana wa Muluku,yela enawitheleliwa atthu othene. 25 Kinolelani exariya wira: nkinwurya-tho evinyu mpaka nihiku kinrowaka owurya evinyu epheya momweneni mwa Muluku. 26 Nvyo,yahipa isipo vya Pasika,numala yahivenya,ekarowa o mwako Olivera. 27 Yesu ahalela anamahuvyiha ye wira: Nyuwo othene nnokihiya,okhala wira ehatikiwa wira: ``Kinomwipha makampusi: nvyo ipwittipwitthi vyinomwareya`` 28 Masi kahihimuwa mokwani,kinawoholelani orowa o Galileya. 29 Pedru ahinlela wira: Othene yohiyakani,miyo nkinolevani. 30 Yesu ahimwakhula iraka: Kinolelani exariya wira olelo,ohiyu yola,mthupi ohinakuve wipa vaili,nyuwo nyuwo nnokiruna imara ttharu. 31 Pedru ahilipiherya,ahimaka wira: Nari! Nkinorunani,mpakha okhwa ni nyuwo! Vyivyo akina othene yanilotha etthu emovyaru yelo. 32 Nvyo,yahiphiya nipuro naitthaniwa Jesemani. Yesu ahalela anamahuvyiha ye wira: Nkilathi vava; miyo kinrowa olompa. 33 Nvyo ahinkusya Pedru ni Yakobo ni Yohani. Okathi yowo,ahipajerya winiwa murima ni wova, 34 alela anamahuvya awo araru wira: Murim`aka woripiwa mpakha okhwa. Muhale vava,nhirupe. 35 Ettaka vakhani,ahikokhora omaithoni mpakha vathi,akanlompa Mulukuwira,vaweryaneyaka,okathi uwo w`ohawa ohimphwanye. 36 Alompaka,anilotha wira: Abba,Tithi! Nyuwo munniwerya vyothene: nkakihere ohawa nno. Nvyo ehireye nkhama kintthunaka miyo: yireye nkhama muntthunannyu nyuwo. 37 Numala,ahitthikela wari anamahuvyiha ye,aphwanya erupaka. Nvyo ahimwirela Pedru wira: Simoni,nyuwo morupa? Nhojela okilipelela okathi vakhani mano? 38 Nlipelele,nlompe,wira nhimore mwehereriwaka. Eroho ya mutthu ehilipiha: masi erutthu khiyilipinhe. 39 Yesu ahivenya-vo,arowa-tho olompa,ahimaka itthu vyeivye alonttheiye emara yopajerya. 40 Numala,ahithikela-tho yariwo anahuvya ye,aphwanya-tho erupaka. Ikhove vyahavelalaveliha,ehikona y`omwakhula. 41 Athikelaka wa yawo emara yanararu,Yesu ahakoha iraka: Nenlelo nnorupa? Mnomumula? Pahi! Okathi aka wophiya. Mwana a Mutthu onovahereriwa mmatatani mw`alipa-ottheka. 42 Nvenye nirowe. Ole onrwa okiphariha,ophiya. 43 Nanlelo alottaka vyivyale,ahiphiya Yuda,mmovya a muloko naili. Ari n`atthu awattha,ekunce ikatana n`ikopo,yarummwe n`alupale a anamukuttho n`anamahuvyiha ikano ni mahumu. 44 Yud`owo,arowa onphariha Yesu,ahavaha atthu awo ethonyeryo y`ovyuweliha,iraka: ``Ole kinrowaka onvaha ebejo,tori yowo. Mwanphare,mmulipihe syana,mmuronhe```. 45 Aphiyakaru weiwo,Yuda ahimwattamela Yesu,amwirela: Pwiya! Anvaha ebejo. 46 Nananoru,atthu ale yahinphara Yesu,entthuka. 47 Nvyo mmovya atthu yari ni Yesu,ahitholola ektan`aye,ahinthikilana nrumeyi a mulupale a anamukuttho,athikila naru. 48 Yesu ahalela atthu ale wira: Nkirelaka okiphara,nrule n`ikatana n`ikopo,nkhama wira miyo ka nawiye! 49 Khula nihiku miyo kakhala ni nyuwo, kihuvyihaka mpani mwa Muluku,nhikiphara. Nna,vyothene ivya vyinnikhumelela wira vyimaliheriwe Vyawatikiwa vya Muluku. 50 Okathi ule,anamahuvya ye othene yahinhiya,etthyawa. 51 Mmiravo mmovya,awanre nkhumi pahi,anintthara Yesu,aphariwa. 52 Owo ahihiya nkhumi ye, atthawa ahiwanre etthu. 53 Yesu ahironhiwa wa mulupale a anamukuttho. Weiwo yahithukumana alupale otthene a anamukuttho,ni mahumu n`anamahuvyiha a ikano. 54 Pedru aninttharela Yesu,etthaka ottaiwene,mpakha vate ve mulupale a anamukuttho,akilathi vamovya n`arumeyi,oraka moro. 55 Alupale a anamukuttho n`alipa-ophuka milattu,othene,yaniramela nlattu w`omwiphiha Yesu: ehiphwanya etthu. 56 Atthu awatta yanimothera Yesu itheru,okhala wira yanivanyihana. 57 Nvyo, atthu akina yahemela,emothera ehimaka 58 wira: Nomwiwa mutth`ula ahimaka wira: Miyo kinokomola empa ela ya Muluku etekiwe n`atthu: muhina wa mahiku mararu pahi kinoteka ekina ehitekiwe n`atthu``. 59 Nvyo yanlottaru vyivyo,molumo ya khiyalikana. 60 Okathi ule mulupale a anamukuttho ahemela eriyari y`atthu othene,ankoha Yesu,iraka: Nyuwo khannakhula etthu? Atthu ala anolothelani esyeni? 61 Nvyo Yesu khakhunle etthu,arumala. Mulupale a anamukuttho ahinkoha-tho iraka: Ti nyuwo Kristu Mopoli,Mwana a Muluku ottottopeliwa? 62 Yesu ahakhula wira: Ayo,ti miyo! Nvyo nyuwo nnomona Mwana a Mutthu akilanthi mono wolopwana wa Òle oweryasa ni araka mmekuni wirimu. 63 Vavo,mulupale a anamukuttho ahakhula ahiperya malay`aye,iraka: Nnaramelela-ni-tho anamona? 64 Nyuwo nhiwa olovyowa we. Nnona vyai? Othene yahakhula wiraophwanenle wiphiwa. 65 Akina yari weiwo yahipajerya onsenyera Yesu,yahinkhunela omaithoni,emmanaka yiraka: Kristu munlothe omanne! Atthu yanlipelela yaninpwakula-tho. 66 Okathi Pedru ar`iye vate,ahiphiya nthiyana mmovya,ari nrumeyi mulupale a anamukuttho. 67 Owo,amonakaru Pedru araka,ahinlipelasa,anlela wira: Nyuwo-tho mwari ni Yesu muNazarethi? 68 Nvyo Pedru ahiruna iraka: Nkiniwa,nta nkinvyuwela munlothannyu. Numala,ahivenya vavale,arowa mpithela. Okathi uwo muthupi wahipa. 69 Nthiyana yowo ahimona-tho Pedru,apajerya walela atthu yari vavale,wira: Ola mmovya a yale. 70 Pedru ahiruna ekwaha yanaili. Ovinre okathi vakhani,atthu yari vavale yantepa omwirela Pedru: Tthiri nyuwo mwa mmovya a yawo: ni nyuwo-tho munkhuma o Galileya. 71 Nvyo Pedru ahipajerya wilaphela vyotakhala,ahimaka wira: Nkinvyuwenle nlophwan`owo nninlothannyu. 72 Okathi yowo,nthupi wahipa vanaili. Nvyo Pedru ahupuwela molumu aleliweiye ni Yesu wira: `` Nthupi ohinapajere wipa imara pili,nyuwo nnokiruna imara ttharu``. Apajerya wunla.