¹ Numala ittu ivya, Yesu ahakumelela imara ikina awixuthi olimani wa Tiberiades. Tivyivya owo akhumelenlawe: ² Simoni Pedro ari vamovya ni Tome, aithaniwa Didimo, Natanael a Okana wa Okalileiya, ana a Zebedeu, nvyo akinaku anli awixuthi a Yesu. ³ Simoni Pedro ahimwirela: "kinrowa emevya". Nvyo yahimwakula: "Ni hiyo ninorowa ni nyuwo", Awo yahirowa kuwela n'mwatiyani, masi ohiyu yole kiyaiphale ettu. ⁴ Ojaka, Yesu ari n'kithe wa n'lima, masi awuxuthi kiyavyuwela wira ari Yesu. ⁵ Numala, Yesu ahalela wira: "Amiravo, mukhalano ettu yotha?". Awo yahimwakula: "Nari". Ahahimerya: "murihele mathavi anyu mono wolopwana wa mwatiya anyu, munopwanya". ⁶ Nvyo awo yahirihela mathavi, m'pwakha ohiwerya opurula mwaha wa watha wa ihopa. ⁷ Numala, awixuthi Yesu aphentawe yahimulela Pedro: "Ti Apwiya!", Okathi Simoni Pedro aiwalawe wira yari Apwiya, ahiwara ikuwo sawe, okhala wira kawanre ekuwo, nvyo ahirihela n'limani. ⁸ Nvyo awixuthi akinaku yahurya vamwatiyani (Okhala wira kiyari othaiweni ni ota, n'nakhala imiya pili sa metru yorakamela), epurulaka mathavi osareya ihopa. ⁹ Okathi yakurunwaya, yahona vavale ipau ni ihopa vaikho. ¹⁰ Ahiwirela Yesu: "mukiruhele ihopa m'malinhanyu opwanya". ¹¹ Simoni Pedro ahiwela m'mwatiyani ahipurula n'thavi, nasanre imiya emovya ni miloko mithanu ni tharu sulupale ihopa; pothi ikhalaka sulupale n'thavi kinathanle. ¹² Ahimulela Yesu: "murye ni muthe". Kavo mwixuthi awenrye omukoha: "nyuwo mwani?", avyuwelaka wira owo ari Pwiya. ¹³ Yesu ahiwathamela, ahikusa ephau nvyo ahavaha, nvyo ahipaka vyivyo ni ehopa. ¹⁴ Owo wari emara yaneraru Yesu akumelenlawe awixuthi numala ohihimuwa wa alipa okwa. ¹⁵ Numala otha, Yesu ahimulela Simoni Pedro: "Simoni, mwana a Yohani, nyuwo munnikiphenta vanthene wavikana athu ala?". Pedro ahakhula: Ayo Pwiya; nyuwo movyuwela wira miyo kinnophentani. Yesu ahimulela: " Muthihe ipwithipwithi saka". ¹⁶ Ahithikela omukoha emara yanaili: "Simoni, mwana a Yohani, nyuwo munnikiphenta?". Pedro ahimwakula: "Ayo Apwiya; nyuwo movyuwela wira miyo kinnophentani". Yesu ahimwirela wira: Muthihe ipwithipwithi saka. ¹⁷ Owo ahimulela emara yaneraru: Simoni, mwana a Yohani, nyuwo munnikiphenta?, Pedro ahiripiwa murima okhala wira Yesu ahimukoha emara yaneraru: "Nyuwo munnikiphenta?. Owo ahimwakula: "Pwiya, nyuwo munnivyuwela ittu sothene; nyuwo movyuwela wira kinnophentani". Yesu ahimulela: "Muthihe ipwithipwithi saka". ¹⁸ Vekekhayi, vekekhayi, kinnolelani wira okathi mwaryanyu m'miravo; nyuwo mwaniwara ni mwanetha n'kama mwathunanyu; masi okathi muluvanlanyu, munovensa matata anyu nvyo mukina onimowarihani, nvyo onimoroihani weiwe nyuwo muhinthunanyu orowawo. ¹⁹ Yesu ahilotha ittu ivya wira amuvyuwelihe makhalelo okwa Pedro arowawe onvuwiha Muluku, numala olotha ittu ivyo owo ahimulela Pedro: "Mukithare". ²⁰ Pedro ahirukunuwa nvyo ahimona mwixuthi yole Yesu amphetawe muholaka, yole amwimpathenle vathirima wa Yesu ewora ya ceiya nvyo ahimukoha: Pwiya, tani yowo onrowa wovarihani?. ²¹ Pedro amonakaru ahimulela Yesu: Pwiya, nvyo mwaha wa ola? ²² Yesu ahakhula: "n'to miyo kathuna wira owo akhale m'pwakha miyo othika, eseni munrowanyu opwanya? numala nyuwo mukithareke. ²³ Numala ahilaleiwa noticia variyari wa asinna, wira mwixuthi kharowa okwa. Numala, Yesu kanlenle Pedro wira mwixuthi yole kharowa okwa, masi arolotha: n'to miyo kathina wira owo akhale m'pwakha miyo othika, eseni munrowanyu opwanya?. ²⁴ Yola mwixuthi onirela onamona mwaha wa ittu ivya, nvyo kwatikha, nvyo niyo novyuwela wia onamonawe ti wajariya. ²⁵ Sokhala-tho ittu ikina Yesu opankawe. sarokhala wira sothene ihatikiwa, kinupuwela wira elapo kiyawerya opweha ilivuru sarowa watikiwa.