Capitulo 1

1 Miyo Paulo,kithanli n`utthuna wa Muluku okhala namarummwa a Yesu Kristu, ni Sostene, mmuvy`` inhu, 2 ninnasyeliha aKristu a ekereja ya Muluku, eri o Korinto. Nyuwo morerihiwa wa Yesu Kristu, nhithaneliwa okhala a warya, vamovya n`ale othene anromola khula nipuro nvyina n`Apwiya Yesu Kristu, ori Pwiy`aya ni Pwiy`anhu. 3 Muluku, Tith`inhu, ni Yesu Kristu Pwiy`anhu, ovaheni mahala ni nretthele. 4 Kinninxukhuru Muluku aka mahiku othene mwahawa mahala ovanheiyeni wa Yesu Kristu. 5 Xariya, nkhalaka mwa Kristu, Muluku ohovahani vyorera vyothene wawatta, wotepasa ovyuwela ni masu. 6 Epakha Yorera ya Kristu yolaleiwa yomalela ni yolipihiwa wa nyuwo. 7 Vyivyo, khiyavo yovaha ya Muluku enohalelani nyuwo, munlipelela ora wovuwa w`Apwiy`anhu Yesu Kristu. 8 Owo-tho onawolipihani nrima mpakha opontha, wira nhiphwanyiwena nlatthu nihiku onraiye Yesu Kristu, Pwiy`anhu. 9 Muluku, othanlaleni wira mwatane n`uphetana ni Yesu Kristu, Mwane ni Pwiy`anhu, Muluku yowo onomalihera alontheiye. 10 Amuvyi aka! Kinnokhanyererani ni nvyina na Yesu Kristu, Pwiy`anhu, wira nkaiwanana. Ohikhale okaneya eriyar`innyu. Nkaiwanana yomalela ni nrima mmovya ni wupuwela omovya. 11 Amuvyi aka! Xariya, kowiwa atthu a etthoko ya Klowe elothaka wira watthuvena wokhala ovanyihana. 12 Etthu kinlothaka t`ila: khula ntthu a nyuwo onnilotha yovirikana, iraka: ``Miyo kinninttara Paulo``. Mkina onnilotha wira: `` Nvyo miyo kininthara Apolo```, ou: `` Miyo kinninthara Pedru``. Mkina-tho onira: `` Nari, miyo kininthara Kristu``. 13 Nnona wira Kristu t`okaweya? Ou Paulo t`okhomeliwe va mwikimanyo mwahawa nyuwo? Ou nbatiziwe ni nvyina na Paulo? 14 Kinninxukhuru Muluku, okhala wira khavo a nyuwo kinbatizalaka, onhiya Kristu ni Gaio. 15 Vyivyo, khavo a nyuwo onwerya olotha wira obatiziwe ni nvyina naka. 16 Vyivyo, kihabatiza-tho atthu a ethoko ya Sitefano: wahila ala, nkinvyuwela kanbatinze ntthu nkina. 17 Nvyo Kristu khakirunme obatiza: owo okirumme olaleya Ehapari Yorera. Nna, khilaleye ni molumo ovyuwelasya, wira okhwa wa Yesu Kristu va mwikimanyo ohikhale etheru. 18 Olaleya okwa wa Kristu va mwikimanyo etthu y`ololo w`ale amkwa; nvyo etthu y`owrerya wa Muluku w`ale anopoliwa: atthu ala ti hiyo . 19 Vyawatikhiwa vya Muluku vyinlotha wira: ``Kinawipha miruku vya avyuweli, kinomaliha ovyuwela w`atthu a ankhili``. 20 Nna, omphiyera-ni okhala nvyuweli? Omphiyera-ni okhala namahuvyiha? Omphiyera-ni okhala ntthu onlotha syana? Tthiri Muluku ohonihera wira ovyuwela w`atthu, ololo. 21 Xariya, atthu a vathin`va, n`uvyuwela wa, khawenrye onvyuwela Muluku, woniheriwawa ovyuwela we: tivo, Muluku othunne owopola ale animwamini mwahawa olaleya wihu, wenno ononiwa okhala ololo. 22 AYuda anniveka isyinale wira ekamini: aGresia annikhupali miruku vya pahi. 23 Nna, hiyo nininlaleya Kristu akhomeliwe va mwikimanyo: ela esyinale yonanara va maithoni v`aYuda, etthu y`ololo v`amaithoni w`amalapo . 24 Masi, va maithoni wa ale athanliwe ni Muluku, ekhale aYuda ou amalapo, Kristu ti owerya ni miruku vya Muluku. 25 Xariya, ele enoniwa okhala ololo wa Muluku enixira miruku vy`atthu: ele enoniwa okhala yolipalipa wa Muluku ennixira ikuru vy`atthu. 26 Amuvyi aka! Mwikottihere nrinnyu, nyuwo nthanliwe ni Mululu: nonaka makhalelonnyu, khinnaphwanya avyuweli awatha, ata atthu owerya, ou makhulupale awatha. 27 Masi Muluku ohathanla atthu anakanyeriwa okhala alolo, wira awulihe muru atthu ovyuwela: Muluku ohathanla ale yahoneliwa vathu, wira awulihe muru atthu owerya. 28 Owo othanla itthu vyohivyuweleya n`ivye vyihana nteko, vyeivyo vyithanyiwe n`atthu, wira amalihe itthu vyeivye vyakanyeriwa okhala vyulupale. 29 Vyivyo, khavo ntthu onwerya wivyinnuwiha va maiothoni wa Muluku. 30 Nna nyuwo, Muluku ohovahani ekumi wa Kristu yowo, ninnakheleliwa ni Muluku, ninnimnkhjalela yowo, nopoliwaka wa vyotteka. 31 Vyivyo annireya masu yatikhiwe wira: `` Ole onramela wivyinnuwiha, aivyinnuwihe anvuwihaka Muluku``.