¹ Nihiku nopatjera na sumana, nñan'lelo vanaripelale, Maria Makdala ahirowa omahiye ni ahona n'luku ninapithikuxiyene. ² Vano, yena ahithimakaza wira akumanane Simoni Peturu ni n'rumei n'kina, yole Yesu an'phentawe, khwira: "Apwiya akumihiya n'mahiye, ni hiyano khinizuwelane nipuro oheliyawe". ^{3 4 5} Vano Peturu nin'rumei n'kina yahirowa omahiye, Opili yanithimakaza, ni n'rumei n'kina anitepa othimaka on'vikana Peturu, ni tapatjerale ophiya omahiye. vathurumelalyawe oramelaka n'khapurini, ahiweha santaawe enahinýalene vavale, masii khakelale. ⁶ Vano, ahiwa Simoni Peturu numala ophiya n'khwawe olee, ni ahikela n'khapurini, ni ahiweha esanta enahin'yalene vavale, ⁷ ni essuli yawarihiyawe n'muruni, yele yahahalale ni santa, masii yaputaputeriyawe yohitakanela ni santa. ⁸ Vano, n'rumei n'kina, apatjerale ophiya, niyena ahikela n'mahiye; yena ahona ni ahikupali. ⁹ Okhala wira m'paka okathi yole, ayenaze khiyakupali zolepiya yahimyaya, Wira Yesu ahana ahihimuwaka mukhwani. ¹⁰ Vano, arumei yahihokolowela owani. ¹¹ Zizan'mo, Maria ahipiza omahiye m'laka. M'laka zizan'mo, ahemela khinaweha m'pani mwa khapuri, ¹² ni ahaweha malaikha men'li enawarale zothela enakilathalene, nipuro n'ruuthu WaYesu waryaya omumulaka, n'moza wamuru ni n'kina wametho. ¹³ Awo yahin'himerya: "N'thiyana, onun'lelani?". Yena ahiwakhula: "Onukuxiya Pwiyaka, nimiyano akin'zuwela opuro Opwehiyawe". ¹⁴ Okathi olavulalyawe zoo, ahiweya othuli ni ahimona Yesu anemelalene; masii yena khazuwelale wira ole ari Yesu. ¹⁵ Yesu ahimwirela: "N'thiyana, onun'lelani? Onin'phela pani?". Yena anyihera wira ari nanteko omahiye, vao Yena ahin'himerya: "Pwiya, yakhala wira Nyu mon'kumiha vaa, kihimeryeni nipuro xeni Mwin'helalinyu, ni miyano kinarowa On'kuxa". ¹⁶ Yesu ahira: "Mariya!". Yena, varukunuwalyawe, ahira ni aramaiku: "Raponi!" (en'himya wira: "Funti"). ¹⁷ Yesu ahimwirela: "Wikivareni, n'nan'lelo n'kinathi owela waapapa. Masii orowe waxin'naka, ni wahimerye wira Miyano kinawela wapapa ni apapen'nyu, ni N'lukwaka ni n'lukwinyu". ¹⁸ Maria Makdala ahirowa, ni khuwirela arumei: "Komona Pwiya". ni ahahimerya etthu zenýe ahimeriyawe. ¹⁹ Vanaphiyalene n'zuwa nothekuwa, nihiku nen'ne nopatjera na sumana, enathukumanalene arumei mikhora zinatthukiyene, mwaha wowova mayuta, Yesu ahiwa khwemela variyari vaya, ni khwuwirela: "n'rethele okhale ninyu". ²⁰ Vamalalyawe ohimya eyo, ahiwoniherya matatawe ni niparari Nawe. Ni okathi arumei vamonalyaya Pwiya, yahitheliya roho. ²¹ Oholowaya, Yesu ahiratho: N'rethele okhale ninyu. Mana Apapa vakirumalyaya, zizan'mo Miyano kinawurumani". ²² Yesu vamalalyawe n'yo, ahiwun'zela khwuwirel: "Akhelani n'nepa wowarya. ²³ Mwan'levelela etam'pizawe n'tthu, onaleveleliya; vano mwan'hiyeravale, zin'rowa on'pharelela". ²⁴ Tomas, n'moza wan'loko neli, azimiya Titimo, khari naayena okathi Yesu vaawalyawe. ²⁵ Arumei akina numala yahin'himerya: "Nihaweha Apwiya". Yena ahiwirela: Miyano kahiweheru matatawe essinalo yapereku, ni khuhela ekatrhaka Mapuro yale avirale pereku, ni matataka n'pararini mwawe, miyano akin'khupali". ²⁶ Mahiku vaviralyaya mathanu na tharu, arumei yahikhalatho vavale enathukumanale, Yesu ahikela variyari vaya, ni khuwirela: "N'rethele okhale ninyuwano". ²⁷ Vano yena khwmwirela Tomas: "Ohele vaa ekatha zaoo, ni owehe matataka, hela vaa matatao, ni opwehe vanipararini vaka, wikhaleni n'tthu ohamini masii mwamini". ²⁸ Tomas ahiMwakhula ni khwira: "Apwiyaka ni N'lukwaka". ²⁹ Yesu ahimwirela: "Okhala wira wokona tun'khupalyao? Oreriya tale ahiwehale ni khukupali". ³⁰ Wekhweli, Yesu ahivara mitikiniho, variyari varumeiyawe, mithonyero zintjene, zenýo zihilepiye N'livuruni muu. ³¹ N'ya, tho zilepiye wira n'khupali wira Yesu ti Kristu, Mwana Anluku, ni n'khupaliki, n'khalane okumi mwan'zinanawe.