¹ ''Axulupaliaka ni axipapaka, n'kinwe wisakiha, onuhimeriakani vaa''. ² Vano n'tthitthi wotene womuinwa Paawulu alavalaka ni luka heprayika, khuhala anatikinihiye omaleleia. Ni yena irale: ³ ''Kamyuta, oyareliya oTarsu oCilisiya, masi kileliye epomayela m'matatani muaGamaliyele. Kileliye ni vottharelela ni ketthelo zan'napapazihu. Kin'nintthitthimiha N'luku, muanaa ziizo nyu otene elelo zirin'nhu. ⁴ Kihomola ephironya m'pakha okusini; katthukaka otene, athiyana naalopuana, ni kahelaka m'khattheia. ⁵ Anamkuttho nimahumu annikikhumela oxahiti wira kihakhelela ipaphelozaya karoanelaka axinna oTamasku, wira kiroe wonwo. Wira my kahana kaawanaka oJerusalem otene yatthunaka waaphuanha ephiroene yela, wira ahukhumuiye. ⁶ Yahikhumelela wira, my ketthaka, katthamelaka oTamasku, othana namaakala, vowakaveia muenke wookhuma ozulu wahikirukureria. ⁷ Kahimorela vathi ni khuinwa esoti yakirela: 'Sawulu, Sawulu, n'kittharattharela exeni'? ⁸ Kahakhula: 'Nyu muapani, Pwiya'? Yena ahikirela: 'My kaYesu oNazare, we oninttharattharao'. ⁹ Ale yari nimii yahiweha muenke , masi khayinwale esoti yalavula nimy. ¹⁰ My kahira: 'Kiire exeni Pwiya'? APwiya khukirela: 'Ovenhe, ni oroe oTamasku; wonwo onaroa ohimeriya entthunao wira'. ¹¹ My n'kaweria woona ekisua yanthukoole, vano kahiroa oTamasku, kivareleliyaka nimatata naale yarinaka. ¹² N'we kahimpuanha n'lopuana m'moza azimiya Ananiya, m'lopuana ekhueli onttharihela ikano ni orina n'thonhero worera eriyari yamayuta otene yakhala wenwe. ¹³ Oyo ahiwa khukiphuanha, khuemela oholowaka, ni kuira: 'Munna Sawulu, ohokolele woona'. Okathi yole kahipajera woona. ¹⁴ Vano yena khuira: 'N'luku axipapenhu ohuthanla wira ozuwele otthunawawe, wira omone orerela, ni wira winwelele esoti enkhuma vamalakuniwaWe. ¹⁵ Okhala wira onroa okhala xahitiaWe waatthu otene wa inye zinoonao ni zininwaao. ¹⁶ Ni vano onalitthihani? Ovenhe ni orapihe etampizao, oromolaka n'zinanaWe'. ¹⁷ Patiya yohokolela oJerusalem, kilompaka m'pani waN'luku, kahoniheriya etthora emoza. ¹⁸ My kahinuinWa akirelaka: 'Wakuveke ni okhume n'Jerusalem, okhala wira khunroa wakheleliya oxahitiao wanzinanaKa'. ¹⁹ My kahakhula: 'Pwiya, ayena anizuwelaza wira kihatthuka ni kihamana m'pani waN'luku otene yaale yawaminiNi. ²⁰ Okathi ephome yaEstevawu, xahitin'Nhu, vamuarexiyaya nimiyano kahikhalela, kanikhalihera ni kinxathiki ekuwozawe waale yamuinva'. ²¹ Masi, Yena ahikirela: 'Oroe, okhala wira Kinuroanela otthiawene wamalapo'''. ²² Atthu yahintthunihera olavula m'pakha nipuron'no voo ni, vano, khukhuwela yiraka: ''Muinkumihe ntuniyani m'tthuyo, okhal wira khanrerela yena okhala''. ²³ Okathi wakhuwelaya, yatthikhelaza ekuwozaya nintthupi ozulu, ²⁴ n'holeli anamasunkera ahiruma wira akuxiye Paawulu aroaniye enupa yolipa, arumakatho wira akohiye niwuputthaziya, wira azuwele exeeni okhuweleliyaka enamunayeela. ²⁵ Vano ayena vantthukelelaliaya vakuathuloni, Paawulu ahimuirela namalipelela arinawe vavale: ''Okhaleke wira n'haana oleveliya on'mana n'tthu oRoma oyo ahiphukiye khutthukeliya? ²⁶ Vano supayi vinwaliawe eyo, ahiroa wankhulupale, ni khuira: ''Muimphela wiira exeni? Okhala wira ola n'lopuanoola n'tthu oRoma''. ²⁷ Supayi n'khulupale ahiwa ni khumuirela: ''Kihimerie, we ontthu oRoma? ''Paawulu ahira: ''Ayoni!'' ²⁸ Supayi nkhulupale ahakhula: ''Kilivale n'zurukhu muinjene, wira kikhale n'tthu eelapo yoRoma''. ²⁹ Vano atthu yapheela onkohakoha Paawulu nan'nanoru yahintthukula. Hata ni khulupale amasupayi ahova, vinwaliawe wira Paawulu ari n'tthu oRoma, okhala wira ahintthuka. ³⁰ Nihuku nikina, n'khulupale apheela ozuwela ekhueeli yetthu amayuta yamootheriaya Paawulu. Vano, ahitthukuliya muatthukiyawe ni khurumiya wira aholeli anamkuttho otene nimahumu aniira m'phantthe wamayuta athukumane. Vano anwanaka Paawulu ahatonhihera.