¹ Pata yomualanaza nayenaze, nahilapuwa nilukamaka epoma yoCosi ni, vaxaliaya nihuku nikina nahiroa oRote, ni m'pakha epoma yo Patara. ² Vamphuanhalehu paketi akhuma aroaka oFenisiya, nahimwela yoyo ni khuroaka. ³ Natthamelaka ekisurua yo Chipere, nakakhelale moono n'thiyana, khulapuwelaka oSiriya ni nasolale epoma yo Tiru, okhala wira paketi aroa opakhuliya. ⁴ Patiya yowaphuanha awixutthi, nahikhala ninyayo m'pakha mahuku mathan'nameli. Awixutthi, orumiya niN'nepa, yahimuirela Paawulu wira ahiweleleni oJerusalem. ⁵ Patiya yomalihera mahuku, nahikhuma nipuron'ne ni nahiroa n'khuahehu. Otenewayaze ahinivelela m'pakha okhuma m'poma vamoza natthuaya ni naxanaya. Vano nahikokhora ophareia, khulompa ni khulehana n'kina ninkhuawe. ⁶ Nahiwela m'paketi ni ayena khuhokoliazaka aroaka owaani. ⁷ Vamalaliaya n'tekoehu oTiru, nahiphiya oPatolemita; ni, khuaxelelihaza axinna, nahivira nihuku nimoza ninari nayena. ⁸ Nihuku nikina, nahikhuma ni khuroa oCesareya. Nahiphiya owan'nhawe Filipe, namalaleia, ari waiyale athan'neli, ni nahikhala niyena. ⁹ Oyo n'lopuanoyo ahana axanaawe ajexe axinunmuari yalohera. ¹⁰ Nahikhala wenwe mahuku vakani ni yahikhumelela n'lopuana m'moza akhumale Oyuteya, namalohera m'moza azimiya Akabu. ¹¹ Yena ahiwa khuniphuanha, khukuxa n'zako wa Paawulu, khuiitthuka enhawuzawe nimatatawe, ni khuira: ''Ziizo on'himia N'nepa Wowaria: 'Ziizo mayuta tizinroaya omuiriha muanene n'zakoola oJerusalem anroa ontthuka ni anvaherere m'matatani wamalapo'''. ¹² Vinwalehu etthunya, okhuma huyano naale yakhala nipuro nen'ne, nahinvekela Paawulu wira ahiweleleni oJerusalem. ¹³ Masi, Paawulu ahakhula: ''N'nirilani zam'mo wunla ni m'werehaka erohoaka? Kolikanana vohikhala otthukiya paahi masi hata oroa okhua oJerusalem wanzina naPwiya''. ¹⁴ Ni okhala wira khananweriale Paawulu, nahimaalaza ni khuira: ''Wiraneye otthuna waaPwiya''. ¹⁵ Numalamahukayo, nahikuxa mipaxazihu ni khuroa oJerusalem. ¹⁶ Ni vamozaru nihiyano awixutthi oCesareya. Yahinkuxa n'lopuana m'moza azimiya Mnasom, ayareliye oChipere, muixutthi akhalayi, aroehu okhalana vamoza. ¹⁷ Ni vaphiyalehu hiyano oJerusalem, axinna yhinakhelela nuuttheliya n'rima. ¹⁸ Nihuku nikina, Paawulu ahukhuma nihiyano wira nakumanane Tiyaku ni aholeli otene yari wenwe. ¹⁹ Ni, patiya yowakhomaza, ahahimeriaza etthu zotene N'luku ziiraliwe wamalapo eriyari yantekoawe. ²⁰ Vinwaliaya inyo, yahintthotthopela Pwiya ni yahira: ''We on'noona, n'yawihu, mirira mikavi wamayuta ale anamini ni otene anikupali wixathi ekano. ²¹ Ayena ahimeriya ankhaleloen'nhu: wira muinnasomiha mayuta ankhala wotakaneela namalapo wira an'hiye Mosesi, nuhiwin'nuwiha axanaya ni ohittharelela zolamalela zakhalayi. ²² Niireke zai? Ayena vekhueli anamuinwa wira n'howa. ²³ Muire ziizo zinuhimeriehuni vaa: nihana vaa alopuana ajexe yirale enatiri. ²⁴ Wuakuxe ala alopuanaala, warerihe vamoza niweyano ni waalivele wira ametthiye m'muru. zam'mo atthu otene anaroa ozuwela wira, ehimiyeyo waziyaka, kahi ekhueli ni hata niweyano on'nixathi ekano. ²⁵ Vano, wamalapo ayo akupalale, ninaalepa ni nahimerie wira ahiye waputi etthu zohirerela, weephome zeetthu zowokotthiya ni ekhapa zihinrerelaya''. ²⁶ Vano Paawulu ahakuxa alopuanaale, ni vaxaliaya khuireriha vamoza nayenaze; khuroa m'paani, ohimia mahuku anreriho, m'pakha wira wakula n'tthu avahe yovahawe. ²⁷ Yatthamelaka omala ale mahukuaale, mayuta akina owAsiya yahimona Paawulu m'pani wamavekelo, ni yahathupereria atthu wira anvare. ²⁸ Ayena yanikhuwelaza: ''Alopuana awisrayele, n'nikhalihere. N'lopuanoola onamuasomiha atthu otene, miphantthe zootene, etthu zovirikana niketthelo ni nipuron'na. Nuumala ohawaana makereku m'panimu ni oharamuxa nipuro noreran'na''. ²⁹ Okhala wira anumooniya Torofimu awEfesu onari niyena m'poma ni khonihiyaka muanaa Paawulu ahinkeliha m'paani waN'luku. ³⁰ Epoma yotene yari yonhakuleleia ni atthu yanatthimakaza n'tthitthinene wira yanvare Paawulu. Ayena yahimpurulaza khunkumihera ota ni mikhora nan'nanoru zahitthukiya. ³¹ N'no aphela omuinva, ehapari nan'nanoro yahiphiya wan'holeli anamasunkera, wira eJerusalem yari yowuntuwanheia. ³² Nan'nanoru ahakuxa atoropa nimakhulupaliaya ni khutthimakaza m'pakha waphuanha atthuaale. Vano atthu n'khulupale atoropa, yahemela onmanakaza Paawulu. ³³ Vano yena ahimuatthamela, khunvara Paawulu ni khuruma wira yena ahana atthukuyaka nuunholo minli. Ahinkoha wira yena ari tipani walani iraleexeni. ³⁴ Akinaku waatthu yale yanikhuwelaza ahimiaka etthu ekina, ni akina ekinaku. Okhala wira n'khuupale khivo yaweriawe winwa ekisua yonhakuliya, ahiruma wira Paawulu aroaniye enupa yolipihiya. ³⁵ Vapihiyawe vasikatthani, yena ahitexiya naatoropa n'latthu woowali warinaaya atthaale. ³⁶ Okhala wira n'tthitthi wananttharelela okhuwelaka: ''Inmiye!''. ³⁷ Wazizam'mo Paawulu apheelaka oroaniya enupa yolipa, yena ahinkoha n'khulupale: ''Kuhimeriekeni etthu emoza? ''Yena ahakhula: ''On'nilavula ekereku? ³⁸ Kahi we muijipituule okathi ovirale otthuli waholelale enhakunhaku emoza ni wakuxaka anamuinva ikonto jexe waroana wuthakoni?'' ³⁹ Paawulu ahira: ''Kanyuta, epoma yo Tarsu, oSilisiya. Kan'tthu a epoma yororomeleya. kin'nuvekela wira okihiye kahimerie atthuaala'' ⁴⁰ Vano n'khulupale wanvahaliawe okathi, Paawulu ahemela vasikatthani ni khuvenhihera matataawe watthuni. Ni patiya yoomaliya, ahahimeria niiluka yaheparayika, iraka: