¹ Ninlelo Apolu onari oCorintu, Paawulu ahivira mitthetthe zoozulu ni khuroa yaWefesu ni ahaphuanha awixutthi akinaku wenwe. ² Paawulu ahakoha: ''N'hakhelela N'nepa Wowaria okathi waminialen'nhu?'' Ayenaze yahakhula: ''N'nari, khanakhelelale. Walani khanihimeriye wira owavo N'nepa Wowaria''. ³ Paawulu ahira: ''M'patizariye ni epatizimu xeni vano?''. Ayena yahakhula: Epatizimu ya Yohani. ⁴ Paawulu ahira: ''Yohani apatizar ni patizimu yowintuthuwa, ahimeriaka atthu wira yahana akupaliki Ole atthua owa pata yayena, eyo phiyo, Yesu''. ⁵ Vinwaliaya eyo, yahipatizariya wanzina na Yesu. ⁶ Vano Paawulu, ahahela matata, ni N'nepa Wowaria wahaweela, ni khuyalavula eluka zikina ni khuyalohera. ⁷ Oteneiaya, yaphuanhaniaza alopuana n'loko nenli. ⁸ Paawulu ahiroa n'sinakoka ni ahilavula vinjene m'pakha mieri mararu. Yena aholela inhakunhaku ni khuyahimeria atthu m'monkoni weetthu za wumueneni waN'luku. ⁹ Vano mayuta akina olipa eroho ni ohinwelela yahipajera olavula anhoholaka ephiro ya kiristtu eriyari yaatthu. Paawulu ahahiya ni khuahola awixutthiawe aroanelaka otthiawene nayena. Yena khupajera wasomiha wakula mahuku m'sikola watiranu. ¹⁰ Eyo yahiroana m'pakha iyakha piinli, ni ziizo otene yaale yakhala oWasiya yahinwa Molumo aPwiya, okhuma mayuta hata ni makereku. ¹¹ N'luku ira avaraka miteko zuulupale m'matatani mua Paawulu, ¹² ni m'pakha marettha yanivonihiya, ni minepa zootakhala zaanakhuma, yavara n'lesonawe ni zowara zamuirutthuni muaPaawulu. ¹³ Masi yahavo ayuta owikompela yetthakaza mitthetthe zenye, ayo yanirumeela n'zina na Yesu waale okhaliya ni minepa zootakhala, yiraka: ''My kin'niwomolani wanzina na Yesu, ole oninlaleyawe Paawulu''. ¹⁴ Yapankale eyo yari athan'nenli axaana a Ceva, m'holeli anankuttho. ¹⁵ Tivoo m'nepa wotakhala wahakhula: ''Kin'ninzuwela Yesu ni kin'ninzuwela Paawulu tipani, masi nyu, muapanize?'' ¹⁶ N'lopuana awariye nin'nepa wotakhala ahatuphela anamuikompela ni, amorihelaka vathi, khuaxatthakaza, m'pakha otthiawaza vapuwanivale, puitipuiti ni orakalaza. ¹⁷ Eyo yahizuweliya naatthu otene okhuma mayuta hata ni makereku yakhala wEfesu Woova wahawela oteneiale, ni n'zina naYesu niira nitthotthopeliyaka. ¹⁸ Amuamini injene yaaniwa, khuyalokoha ni alaphulelaka mitekozaya zoonanara. ¹⁹ Injene yapankazaka majittha yanikhupa ipaphelozaya ni khuyawana wira zipawiye oholo waatthu otene. Ni, niwalakeliya ehisapu zapaphelonye, n'zurukhuaya waniphiyera ikonto miloko mithanu wan'nkhalelo waparatha. ²⁰ Ziizo Molumo aPwiya yanin'nuwa vinjeneru wamithinto zoovirikana. ²¹ Patiya Paawulu yomaliha n'tekoawe wEfesu, ahilakela muin'nepani oroa oJerusalem, yupuwelexawe yari oroa waweha muamini mitthetthe zo Masetoniya ni wAcaya. Ayira Paawulu: Pata yoroa oJerusalem, kinaroa hata oRoma''. ²² Yena ahaaruma akhaliheriawe, Timotiyu ni Erastu, oMasetoniya. Nivoo Paawulu ahikhala epoma ya wEfesu, eprovensiya yowAsiya. ²³ Okathi yoole, nahikhuma nuutupo nulupale wEfesu eriyari yaphiro. ²⁴ N'lopuana m'moza namaphita eworo walani eparatha azimiya Temetriyu, apankaza elataratozawe alikanihaka ni Tiyana, yanaavaha n'zurukhu muinjene ananteko. ²⁵ Vano, ahathukumaniha otene yaale yavaranawe n,teko m'moza, khuira: ''Alopuana, nyu muin'nizuwela wira nin'niphuanha n'zurukhu muinjene ninakosoola. ²⁶ Ni muin'nona ni muinninwa sana wira kahi wEfesu paahi, m'pakha wAsiya wotene, oyo Paawuluyo on'naweria ni wahapuxa atthu injene. Yena on'himia wira khaavo amiluku opankiya nimatata atthu. ²⁷ Khinopiha onikhuela n'tekoehum paahi, masi hata niinupa yan'lukuihum mulupale Tiyana ljinroatho okhalihiya etthu. zammo enaroa ohiya winnuwawaya, ele ekhalale pinkokhoreliya wAsiya ni olumuenku woteene''. ²⁸ Nuwinwaza zam'mo, yahinanariya ni khukhuwela yiraka: ²⁹ ''N'khulupale Tiyana awEfesu''. Epoma yoteene yahizala enhakunhaku, ni atthu otene yatthimakela ora otakanela wenwe. Ayena yahapurulaza ale yarinawe Paawulu, Gayu ni Aristarku, yakhumale oMasetoniya . ³⁰ Paawulu apheela otuphela eriyari yaatthu, masi awixutthi yahinkotthiha. ³¹ Hata ni makhulupale oporovensiya yo wAsiya , yari axipatthanizawe, yahinrumihela n'hupi an'himeriaka wiira ahikele n'nutuponi. ³² Akinaku yakhuwela enamuna ekina , ni akinaku enamuna ekina, maana atthuaale khayazuwaniaza. Anjeniaya hata khayazuwela yathukumanelaya. ³³ Mayuta yahinkumihera Alixentera ota onuutuponi, khunwanela watthuni. Alixentere, ahivenhiha n'tata,apheelaka wahimeria etthu atthuaale. ³⁴ Nivoo, vazuwelaliaya wira yena ari n'yuta, yahikhuwelaza vinjene hata vophiyeraka iwora piili: ''Mulupale Tiyana awEfesu''. ³⁵ Vano namalepalepa ampoma, amalihaka atthu ahira: ''Atthu awEfesu, n'lopuana xeni ohinzuwela wira epoma ya wEfesu tiri yomalihera niinupaya ya Tiyana mulupale ni elataratoawe emorale wirimu? ³⁶ Mona wira, vano, etthunyo tizawopiha, vannirerela nyuwano omaala ni khuhivara etthu. ³⁷ Vano muawanale ala atthuala ohanova, naala kahi anawinye am'panimu, walani khanvehale n'lukuihum. ³⁸ Vano, yakhala wira Timetriyu ni ananteko ari niyena ahaana ekisua nintthu, ehavo ehano naanamaphuka. Ahimie wakula n'tthu etthekaliawe. ³⁹ Masi khukhala wira muawanelale muaha zikinaku, zihana ziroaka owehawehiya mapuro anrerelaya. ⁴⁰ Vekhueli, hata ennopihaza hiyano ottheka muaha wenhakunhakuila. khuvo n'latthu va worerela ohinwananean'no, ohintthunehun wona yohimia''. ⁴¹ Numala ohimia zam'mo, yena ahimuarexaza n'thukumanoole.