¹ Pata yetthunya, Paawulu ahikhuma Watena ni khuroa Ocorintu. ² Ahimphunha wenwe n'yuta m'moza azimiya Akila ayareliye Opontu, ira onawalene nan'nano okhuma Witaliya ni muaarawe Pirisila, maana Calautiyu anuhimia wira mayuta otene akhume oRoma. Paawulu ahiroa khutakanela nayenaze ³ ni, okhala wira ayena yarinaza n'teko m'moza, Paawulu ahikhala ni avaraka n'teko nayenaze, okhala wira yapankaza ihema. ⁴ Paawulu analalera n'xilopiya esaapatu zotene, arukunuxaka mayuta hata ni makereku. ⁵ Vano, Sila ni Timotiyu yahikhuruwela Omasetoniya, Paawulu ahivenhihiya niN'nepa wira azuwelihe mayuta wira Yesu ari Mopoli. ⁶ Vano mayuta vankhotthaliaya yena ni anruwunaka, Paawulu ahitatha ikuwozawe ni khuwirela: ''Ephomen'nhu yumuareeleni vamuruwenhu; my inkinanlatthu. Okhuma elelo m'pakha oholo, kinroa wamalapo''. ⁷ Nuukhuma vale, ahiroa owan'nhawe Titu Naxariya, n'lopuana m'moza antthitthimiha N'luku. Enupawe yanumuatthamela n'xilopiya. ⁸ Kirispu, n'holeli anxilopiya, ni etthokoawe yotene yahimuamini Pwiya. Makoritu injene yamuinwelelale Paawulu naayena yahikupali ni yahipatizariya. ⁹ APwiya yahin'himeria Paawulu nuuhiyu n'tthorani: ''Ohoove, masi olavule ni ohimaale. ¹⁰ Maana kiri niwee, ni khaavo n;tthuna wuvara, okhala wira kiha atthu injene epomela''. ¹¹ Paawulu ahikhala wenwe eyakha ni mieri misita, asomihaka Molumo aN'luku wayenaze. ¹² Vano, paata Galiyu yokhala kuvernatoro aWacaya, mayuta yahikuxa Paawulu khunroana onphukiya milatthu; ¹³ ni yiraka: ''Ola n'lopuanoola onalalera atthu wira anvuwiheke N'luku, avirikanihaka ekano. ¹⁴ Paawulu apheelaka olavula, Galiyu ahiwirela mayuta: ''Ekhueli,mayuta, yarivo yotakhala walani n'latthu wotepexa, yanirerela wuxikhaxikhani. ¹⁵ Masi okhala wira etthu zamolumo ni mazina ni aketthelozinhu, m'phukazeke inyo muaxinene, inkimphela okhala namaphuka etthuyonyo!'' ¹⁶ Galiyu ahiruma wira okhumiye n'tiripunale. ¹⁷ Wazotene, yahinvara Sostene, n'holeli ansinakoka, nunweriawaya, ni yahim;manakaza otiripunale wenwe. Nizizam'mo, Galiyu khakalihale etthu ele yiraliaya. ¹⁸ Onavirihalene mahuku wenwe, Paawulu ahahiya axinna ni khalapuwela oSiriya, ni Pirisila ni Akila. Ahinatthi okhuma opantri, OCekereya, yena ahimettha muroawe okhala wira amuirale natiri ohimetthiya m'muru. ¹⁹ Vaphiyazaliaya wEfesu, Paawulu Pirisila ni Akila wenwe; masi, yena ahoroa n'sinakoka ni anasomiha mayuta. ²⁰ Vano avekeliya Paawulu wira apize, masi yena ahikhottha. ²¹ Masi, aleeha ayenaze, ahira: ''Kinahokolela n'kuaha n'kina wakhala otthuna waN'luku''. Vano ahikhuma Wefesu. ²² Vano Paawulu vapakhuwaliawe oCesareya, ahiwelela oJerusalemu, ni, nuuxeleliha ekereja, ahikhuruwela wAtiyokiya. ²³ Nuumaliha okathi wakhalaliawe wenwe, ahikhuma ni khuvira mitthitthe zoGalasiya ni oFirijiya, ni khualipihera awixutthi otene. ²⁴ Ahavo n'yuta m'moza azimiya Apolu, ayareliye wAlexantriya, awale wEfesu. Yena ari namalavula sana ni ozuwela zolepiya. ²⁵ Apolu ahixutthiya zoosomiya zaaPwiya. Khukhala olipa mun'nepani, anilavula nuusomiha vorerela itthu azmphantthe waYesu; masi, yena azuwelale epatizimu yayohani paahi. ²⁶ Apolu ahipajera olavula niwilipiha n'sinskoka. Tivoo, pata Pirisila ni Akila vinwaliaya, yahinkuxa ni khumuinxutthiha ephiro yaN'luku veekhueli. ²⁷ Aphelaka ovira wAcaya, axinna yahimopereria ni khualepela awixutthi awAcaya wira amuakhelele. Vano yena vaphiyaliawe, ahakalihera vinjene ale yakupalale wamahala. ²⁸ Apolu vowonaneia anaaweria mayuta nuuweria wawe ni ozuwelawawe, atonhiheraka zoolepiya wira Yesu tari Mopoli.