¹ Muaha wa ettuvo za Nluku, axuulupale, miyano khunkizivela wiira nkhale otikhinaza. ² Nyuwaano muin'nizuwela wiira n'nari akaafiri, muaaweettela amiluku ahinlavula. ³ Vano kimpheela wiira nzuwele wiira khaavo onlavula ni N'nepa wa Nluku khuniira: ''Yesu nantakhaliya''. Ni khaavo onttuna wiira: ''Yesu ti Pwiya", ohikhalanale N'nepa woWaaria. ⁴ Vano, zihaavo ettuvo zoovirikana, massi N'nepa m'mozaaru. ⁵ Ni zihaavo mikhalelo za miteko zoovirikana, masii Pwiya m'mozaaru. ⁶ Ni zihaavo enamuna zoovirikana za miteko, masii Nluku m'mozaaru onaalipihera oteene. ⁷ Wakula m'moza onvahiya nthonyero wa wooneya wa N'nepa wiira waakhalihere oteene. ⁸ Maana m'moza on'nivahiya nin'Nepa nuulumo noozuwelaza, ni nkinaku nuulumo nowinxutta wa N'nepa yooyo. ⁹ Akinaku an'nivahiya nroromelo ninNepa yooyo, ni akinaku, ettuvo yoovoniha nin'Nepa yooyo, ¹⁰ ni akinaku, ettuvo zooweria, ni akinaku, olohera, akinaku oweria ozuwela mattaava, ni akinaku, mithinto zoovirikana za mattaava, ni akinaku, otaphulela mattaava. ¹¹ Masii N'nepa m'moza tunvara waattu oteene, okawaka ettuvo wakula m'moza veekhaawe, muanaa Yena zinttunaaya. ¹² Vano, ziizo muanaa eruttu ziriaaya emoza ni khukhalanaka mirintta zintjeene ni zoteene khukhalaka mirintta za eruttu emoza, tiziriaawe Cristu. ¹³ Maana, wa N'nepa m'moza paahi, oteene nopatizariya wa eruttu emoza: akhale n'yuta, akhale n'kereku; akhale namattukiya, akhale ohittukiya; ni oteene apankeliye wiira awurieke N'nepa m'moza yooyo. ¹⁴ Okhala wiira euttu kahi nrintta m'moza paahi, masii zintjeene. ¹⁵ Yakhala wiira enyawu zin'niira: ''Exeeni miyano ohikhala ntata, walaa miyaano nkiniira mphantte waruttu'', inyo khazinhiya okhala mphantte wa eruttu. ¹⁶ Ni niyaru niira: ''Exeeni ohikhala nintho, miyaano kahi mphante waruttu'', inyo khazin'hiya okhala mphantte waruttu. ¹⁷ Oteene yakhalale mentho, winwa waroa okhala vai? Oteene yari maaru ephula yaaroa okhala vai? ¹⁸ Masii Nluku oreerihale eruuttu muanaa Yena zithanlaliaawe. ¹⁹ Ni, inya zaari ettu emozaaru, eruttu yaaroa okhala vai? ²⁰ Tivoo zihaavo mirintta zintjeene, masi eruttu emoza. ²¹ Nintho nihiirele ntata: ''miyano nkinuupheela wee'', wala muru ohiirele enyawu: ''miyano nkinuuphelani nyu''. ²² Masii mirintta za eruttu zinkhala muanaa zohilokaza ti zinrerelexa. ²³ Ni mphantte wa eruttu hiyano ohinttittimihehu, hiyaano nin'nivaha inyo nttittimiho, ni miphantte zihinxikhehun ye ti zinkhala zoozuwaneya. Vano miphantte za eruttuehu zoowoneya khaninxikhaxikha waxukhuli, maana inyo zihaana. ²⁴ Vano Nluku onuulikaniha mirintta zoteene vamozaaru, ni Yena khutepexa ottittimiha inye eyo zihirinaaya. ²⁵ Yena opankale zoo wiira ohikhale okawaniaza wa eruttu, masii wiira mirintta inyo zikhaliheraneke m'moza ninkhuaaya nimphento. ²⁶ Ni, nrintta m'moza waawerenyaka, zikinakun ye zoteene zin'niwerenya. Walaa, wattittimihiyaka nrintta m'moza zoteene zin'nittapa vamozaaru. ²⁷ Tivoo nyuwano muamphantte wa eruttu ya Cristu ni wakhula nttu nrintta wa Yena. ²⁸ Ni Nluku othanlela ekereja opatjera awixutti, yaneeli anamiririmo, yaneeraru anaminxuttiha, ohoolo waya anamapanka miirira, vano ettuvo zoovoniha, ale anweria waakihera, ale anweria ottenkeza, ni ale arina ettuvo ya mattaava ovirikana. ²⁹ Oteene na wixutti? Oteene na'namiririmo? Oteene na'namuixuttiha? Oteene anamapanka miirira? ³⁰ Oteene nirina ettuvo yoovoniha? Oteene anlavula? Oteene antaphulela mattaava? ³¹ M'pheele saana nimphento ettuvo zoorerela. Ni miyaano kinamuutonyiherani ephiro yootepa oreera.