¹ Paulo, namwazimiya ni Yesu Kristo wira akhale apostolo wa otthuna wan'Luku, ne Sostenes mulupalihu, ² wirary ekerexa yan'Luku mwa Kristo, yazimiye wira ekhale n'loko nowarya. Hiyano tho nolepa waale otene yazimiye mwanzina na Pwiya Yesu Kristo mapuro otene, Pwiyaaya ayena hata nihiyano. ³ Wira mahala nin'rethele okhale ninyuwo wan'phanthe wan'Luku Papehu ni Apwiya Yesu Kristo. ⁴ Wakhula okathi kinaxukhurela wan'Luku mwaha wanyuwano, mwaha wa mahala An'Luku Yesu Kristo yuvahalyaweni. ⁵ Yena on'nukhalihani mathatjiri wetthu zotene, wamolumo otene ni ozuwela wotene, ⁶ hata zizan'mo wa namoa a Kristo okhaleliyawe oxahiti mwana ehakhi varinyuvo. ⁷ Wira ohikhale wuhalwlakani n'thonyero wan'teko wan'munepani, hata n'natheliyene roho n'lipelelaka woniherya wa Pwiya Yesu Kristo. ⁸ Niyena tho onawulipihani wumalelani, wira n'khale atthu ohiwuliya nihiku naPwiya Yesu Kristo. ⁹ N'Luku ta Xariya, yowo owazimaleni ni watana wamwanawe , Yesu Kristo, Pwiyehu. ¹⁰ Vano kinawuvekelani axulupalyaka mwan'zina na Pwiyehu Yesu Kristo, wira n'khale nutthunana n'moza nin'khwawe, ni ehikhale okawanaza varizinyu. Kinawuvekelani wira n'khale owatana ni wupuwela omoza ni otthuna etthu emoza. ¹¹ Okhala wira kozuwelexa miyano, axulupalyaka, wa etthu zin'walyaka wamuzi a Kloe, wira ohavo okawanaza warizinyu. ¹² Kin'himya mon'kone omota wakhula n'moza wa nyu en'himyawe. "Miyano kan'naPaulo", walani "Miyano kan'Napolo", Miyano kan'NaCefa", walani akina "Miyano kan'naKristo". ¹³ Kristo ori okawanyeya? walani Paulo takhomeliye? N'patiziye mwan'zina na Paulo? ¹⁴ Kin'nixukhurela wan'Luku ohin'patizari n'tthu variyari vinyu, on'hiya Krispo ni Kaiyu. ¹⁵ Wira ahikhale n'tthu onira n'patiziye mwan'zinanaka. ¹⁶ Vano kopatizari etthoko ya Estefanas. Wahiya ala, miyano n'kin'zuwela wira kon'patizari n'kina. ¹⁷ Okhala wira Kristo khakirumale wira kapatizari, masii wira kalaleye molumo. Ohiya molumo ozuwelaxa a pinatamo, wira mwikimanyo wa Kristo ohikhale ohinamana. ¹⁸ Okhala wira molumo mwaha wa mwikimanyo ovahuwa wale opweteya. Masii wale N'Luku oniwopolawe, ekuru zan'Luku. ¹⁹ Okhala wira yolepiya: "Kinakwanyulaza ozuwela wanamazuwela ni kinawakapakapiha maru akhili wale owixutha". ²⁰ Orivaini n'zuweli? Orivaini namassoma? Ori vaini nakano olumwen'ku? N'Luku khakhalihale ovahuwa ozuwela wolumwen'ku? ²¹ Mana yele olumwen'ku, nuzuwela waya, khun'zuwelale N'Luku, wozuwela wawe N'Luku mwaha wa zowoneliya ovahuwa molumo an'Luku khiwopolale yale an'khupali. ²² Mana Mayuta an'vekela mitikinioho ni Makreko an'rowela ozuwela. ²³ Masii hiyano ninin'laleya Kristo okhomeliye, n'nyoho wamayuta ni ovahuwa wamalapo. ²⁴ Masii wale N'Luku owazimalyawe, okhuma Mayuteu hata Makreko, hiyano ninin'laleya Kristo, owerya ni ozuwela wan'Luku. ²⁵ Okhala wira ovahuwa wan'Luku tiwozuwelaxa ovikana wapinatamo, ni wolowa wan'Luku tiyotepa olipa ovikana yapinatamo. ²⁶ wehani wazimiya winyu, axulupalyaka. Wohikhala intjene wa nyu mwin'rowa okhala ozuwela othariha ekethelo zolumwen'ku, hata intjene yari owerya, walani intjene yari anamapuha wuyariyani waya. ²⁷ Masii N'Luku othan'lale etthu zohizuwanyeia wira awulihihe muru anamazuwela; ni othan'lale etthu yowolowa mulumwen'kuni wira ulihihe muru ele yokhomala. ²⁸ N'Luku othan'lale yele yawiyeviha ni yonyokhiya n'laponi, ni oothan'la etthu zin'khala mwana kinafaita, wira zivukule okhala etthu faita etthu zirina faita. ²⁹ Yena ovarale zoo wira ahikhale n'tthu on'tthuna okhalana yohimya ekhutupulaka variyari wawe. ³⁰ Masii nyuwano n'ri mwa Kristo mwaha wan'yele N'luku opakalyawe. Yena okhala wahinyano ozuwela wan'Luku, xariya, warya ni ovuwa. ³¹ Tivo zolepiya zin'himyaya: "Yole onikumiherya, ekumiherye Mwapwiya".