¹ Miyo kinnulipiheryani nrokorihu Febe , nrumeyi a ookereja on'khala Ocesareya, ² mwa mukhalelo worera wa Atthu oowarya, ni wira mwin'khaliheryeke wa khula etthu oyo omphelawe wa nyuwo. Waholo oyo okhala ankhaliheryo a atthu entji, ni miyo. ³ Mwinkohe ehali Pricila ni Akila, axipatthani aka a nteko wa Yesu Kristu, ⁴ wira mwaha wa okumi aka ahukhula okumi aya. Ni kin'naxukhurela, ni khahiyo miyo pahi, numala ikereja tjotene tja amalapo. ⁵ Nkohe ehali ekereja eri owan'nyeya. Mwinkohe ehali mun'na aka Epeneto, n'hokorokho woopatjerya Wasiya wa Kristu. ⁶ Mwinkohe ehali Mariya, uvarelaleni nteko ventji nyuwo. ⁷ Mwinkohe ehali Andoroniku ni Yuniya, amutji aka ni apatthani aka a nkhatteya, ari atthu akhalayi eriyari ya arumeyi, yari mwa Kristu mi kihinatthi. ⁸ Mwinkohe ehali Ampliyatu, mun'na ophentiya mwa Apwiya. ⁹ Mwinkohe ehali Urubanu, ampatthanihu a nteko mwa Kristu, ni mun'na aka Estaki. ¹⁰ Mwinkohe ehali Apele, olawihiye mwa Apwiya. Mwakohe ehali ale amutji a Aristobulu. ¹¹ Mwinkohe ehali m'mutji aka Erodiyawu. Mwakohe ehali ale ari amutji a Naricisu, ari mwa Apwiya. ¹² Mwakohe ehali Trifona ni Trifosa, avarale nteko ventji mwa Apwiya. Mwinkohe ehali mun'na Persidi, ovarale nteko mwa Apwiya. ¹³ Mwinkohe ehali Rufu, othanliya ni Apwiya, amiya - awe ni amama. ¹⁴ Mwinkohe ehali Ansikritu, Flegonti, Hermi, Patroba, Herma, ni axin'na arinawe. ¹⁵ Mwinkohe ehali Filologu ni Juliya, Nerewu ni mun'nawe, Olimpa ni owarya otene arinaya. ¹⁶ Nkohaneke ehali nkina ni mukhwawe ni ebeju yowarya. Ikereja tjotene tja Kristu tjin'nokohani ehali. ¹⁷ Vano, kin'nukhanyererihani, axin'na aka, wira nwupuwele ale aniwana wawanyana ni ekwakwathulo, anvikaniha yitthutjale - nyu. Mwavalakanane. ¹⁸ Waholo atthu ntoko awo khamphwanelela onrumenla Yesu Kristu, numala irukulu tjaya. Ni molumo aya otjiva ni orera, awo an'nototha mirima tja anaxariya. ¹⁹ Waholo ethonyeruinyu yowiwelela an'nitthara atthu otene. Miyo kin'nitteliya murima, vano, mwa nyuwo, vano kintthuna wira nkhale atjuweli a murettele, muhiraka yonanara. ²⁰ Muluku a murettele nananoru onankhwanyula sotakhala vathi wa inyawu tjinyu. Mahala Apwiya Yesu Kristu akhale ni nyuwo. ²¹ Timotiyo, mpatthani aka a nteko, nkohaneke ehali; tjitjo ntoko amutji aka Luciyu, Yasawu ni Sosipatru. ²² Miyo, Terciyo, kinilepa epaphelo ela, kin'nokohani ehali mwa Apwiya. ²³ Gaiyo, kiri nletto awe ni ekereja yotene, on'nokohani ehali. Erastu, namasuka ntjurukhu a mpoma, ni tho mun'na Kwartu, on'nokohani ehali. ²⁴ ''Mahala a Awiya Yesu Kristu akhale ni nyuwo otene.'' Amem. ²⁵ Vano, Ole onwerya owemexani, mwaha wa Ehapari aka ni mataphulelo a Pwiya Yesu Kristu, yoottharelana wooniheriya yavithiye okhuma wupatjeryani, ²⁶ vano yoniheriye, ni etjuweliya wa atthu otene mwa Tjolempwa, ottharelaka tjoruma tja Muluku ohimala, wowiwelelawa nroromelo. ²⁷ M'motjaru ni otjuwela Muluku, mwaha wa Yesu Kristu, avuwihiye wohimala. Amem.