¹ Vano nlaikha na nethanu nahirumiha mpetta, ni kahona etheneri ya wirimu yamorelale vathi. Ni nahivahiya etthukulelo ya wephini. ² Ni nahitthukula wephini, ni wahiwela mwixi ntoko mwixi wa moro ni, ni mwixi wa moro, ntjuwa nahiripa ni iphumu. ³ Ni vamwixini tjahikhuma itjope tjirowaka vatthayani, ni yahivahiya owerya ntoko orina makharanatje tja vatthayani. ⁴ Wa awo yahirumiya wira ahikwakwanyule malaxi, n'nakhala etthu yoripelela wala miri, vano pahi atthu yaharina ethonyero ya Muluku vayutji vaya. ⁵ Ni khiyatthuniheriye owinva atthu ala, vano wanyakula n'hina wa miyeri mithanu. Onyakuliya waya warowa okhala ntoko olumiya wa nikharanatje okathi oninlumaya ntthu. ⁶ Mahiku ale, atthu anarowela okhwa ni khanrowa ophwanya ni anaphela okhwa, vano okhwa onarowa watthyawa. ⁷ Okhala waya itjope tjalikana ntoko inyompe tjireheriye wira tjirowe okhottoni. Otjulu wa miru tjaya, yahikhala etthu ntoko ikhara tja ewero, ni owitho waya wakhala ntoko owitho wa atthu. ⁸ Ni awo yahikhala maihi ntoko a athiyana, ni men'no yari ntoko a akharamu; ⁹ yahikhalana itthu ntoko akapwitthi a iyuma, ni ntju a mapupha aya yakhala ntoko onyakula wa ikaruwagi tjintthimaka tjirowa okhottoni. ¹⁰ Yahikhalana miyila tja iyuma ntoko tja makharanatje. M'miyilani mwaya wahikhala owera wooruhela tjotakhala n'hina wa atthu eriyari ya miyeri mithanu. ¹¹ Ni yahikhala mwene aya nlaikha na wephini, ntjina nawe ni ebaraiku aari Abadom ni, ni ekerek, aari Apoliom. ¹² Oopatjerya ahivira; ni numala eyo tjanirwa itthu pinli. ¹³ Nlaikha na nethanu namotja ahirumiha mpetta, ni kahinwa ntju niwaka iphantti tja enetjese tja waltari a ewero emphanyaneya oholo wa Muluku. ¹⁴ Ntju nahin'himerya nlaikha nle na nethanu namotja navarela mpetta: ''Ntaphule malaikha ale matjese atthukiye vamotja ni muro Eufrate''. ¹⁵ Malaikha ale matjese yairehenrye, nihiku, mweri ni mwakha, yahitaphuliya wira awinve mphantti m'motja wa atthu. ¹⁶ Numuru na anakhavalo na anakhotto naari nophiyerya ikonto imiya pili. ¹⁷ Tjitjo, owena n'no, ikhavalo ni ale yeettiha ikhavlo yahiwara itthu tjoxerya ntoko moro, tjoripelela ntoko maluku owarya ni amarela ntoko enxofre. Miru tjaya ikhavalo tjaari ntoko miru tja kharamu ni, mwano mwaya wanikhuma moro, mwixi ni enxofre. ¹⁸ Mphantti m'motja wa atthu yahikhwa mwaha wa irfetta in'ya: moro, mwixi ni enxofre tjakhuma mwano mwaya, ¹⁹ vano owerya wa ikhavalo wari mwano mwaya ni miyila tjaya, vano miyila tjaya tjalikana ni tja inowa; ni yahikhalana miru ni tjen'yo yaniwana tjitakhala eriyari ya atthu. ²⁰ Atthu akinaku, ale yahakhwale ni itthu in'ya tjotakhala, khiyaituthuwale tjottheka tjaya, n'nakhala khiyahiyale wakokhorela axotwani ni amuku a ethiru a ewero, a eparatha, ebronze, a maluku ni a miri, ahinwerya woona, n'nakhala winwa ni n'nakhala weetta. ²¹ Ni khiyaituthuwale winva waya, n'nakhala olowa waya, n'nakhala tjovara tjaya tjohiloka ni n'nakhala winya waya.