¹ Ni kahinwa n tju nulupale nakhuma mpani mwa mavekelo, ahimeriyaka malaikha mathanu napili: ''Nrowe elapo ya vathi ni mwamwaraxe ikopho thanu napili tja onanariya wa Muluku''. ² Nlaikha nopatjerya nahirowa khumwaraxa ekopho awe vathi, ni marupo ootakhala yahawela atthu ale yarina ethonyeryo ya nsena, ale yakokhorela elatarato aya. ³ Nlaikha na enenli nahimwaraxela ekopho aya m'matjini, yahipakeya ephome, ntoko ya ntthu okhwa, ni wakhula etthu ekumi yakhala m'matjini yahikhwa. ⁴ Nlaikha na nattharu nahimwaraxela ekopho aya m'muro ni muniphattuwa miro, ni yahipakeya ephome. ⁵ Kahinwa nlaikha na m'matjini niiraka: ''Nyuwano mwa Ekekhayi, Ole ori ni aari, Owarya, vano molamula itthu in'ya. ⁶ Vano awo amwaraxa ephome ya atthu owarya ni maprofeta, ni Nyuwano n'havaha ephome wira awurye, ntoko awo anrerelaya''. ⁷ Miyano kahimwinwa altari akhulaka: ''Ayo, Apwiya Muluku Owerya Tjotene, olamula Winyu titjekekhayi ni tjekhweli''. ⁸ Nlaikha na enetjese nahimwaraxela ekopho aya vantjuwani, ni yahitthunihiya wira yaapahe atthu ni moro. ⁹ Awo ahinviya ni oviha wuntji, ni yahiven'ha ntjina na Muluku, orina owerya tja itthu iya tjotakhala, ni khiyaituthuwale wira Anvuwihe. ¹⁰ Nlaikha na nethanu nahimwaraxa ekopho aya oholo wa ehitje ya nsena, ni epiphi yahikhunela omwene aya, ni alopwana aya yaniluma men'no aya mwaha wa owereya. ¹¹ Awo yahinveha Muluku a wirimu mwaha wa marupo aya, ni khiyaituthuwale mwa yopakaya. ¹² Nlaikha na nethanu namotja nahimwaraxela ekopho aya muro mulupale, Eufrati, ni matji aya yahum'ma wira areherye ephiro ya mamwene anwa mphantti onikhuma ntjuwa. ¹³ Kahiweha minepa ttharu tjalikana ni anaphulu, akhumaka mwano mwa dragao, mwano mwa nsena ni mwano mwa profeta owootha. ¹⁴ Vano iyo minepa tja axotwani ampaka ithonyeryo tja mirirya. Awo anrowa okumana ni mamwene a ilapo tjotene, wira yatakanihe wira awane ekhotto ya nihiku nulupale ya Muluku Owerya Tjotene. ¹⁵ (''Miyano kin'niwa ntoko nawiye! Orelihiya tuule omkhala owehawehaka, arinene ikuwo tjawe ni yowo, wira ahikhume vohiwara etthu ni wira yoniye yowuliha awe muru''.) ¹⁶ Awo athukumana nipuro n'nihaniya ni hebraiku Armagedom. ¹⁷ Nlaikha na nethanu napili ahimwaraxa ekopho awe vaphumuni. Vano ntju nokhuwela nahikhuma mpani mwa mavekelo ni vehitjeni niiraka: ''Ehiraneya!'' . ¹⁸ Tjahikhala itari, okukutteya, ni overunya, ni etetere yowopiha; etetere yowopiha ni yulupale yahatonko wonaneya okhuma khalayi atthu akhanlyaya nlaponi, kharere otepa wun'nuwa. ¹⁹ Epoma yulupale yahikawaneya iphantti ttharu, ni ipoma tja ilapo tjahimora. Vano Muluku ahupuwela Ebabiloniya yulupale ni khunvaha ekopho yulupale yotjareya evinyu epakiye ni onanariya wawe. ²⁰ Itjitjiro tjotene tjahirimela ni miyako hitjaphwanyaneya. ²¹ Maluku malupale a igranizu, olelo wophiyerya ekilu, tjahamorela atthu, ni awo yahintakhaliha Muluku mwaha wa yotakhala ya egranizu, vano eyo yari yowopiha.