Ekapitulo 15
1
Vano kahoweha wirimu ethonyeryo ekinaku ni yotikiniha. Yaari maikha mathanu napili ni tjotakhala thanu napili, tjiri tjokhitjerya, vano ni tjen'yo onanariya wa Muluku onamala.
2
Kahoweha etthu ntoko ntthiya na evidru nootakanihiya ni moro. Yemenlene waattamela vantthiyani, yaari ale ooxintta nsena ni elatarato aya, ni numuro na ntjina naya. Awo yavarela mapetta yavahiyaya ni Muluku.
3
Awo yiipa ntjipo na Moise, nrumeyi awe Muluku, ni ntjipo na Mwapwittipwitthi: ''Tjulupale ni tjootikiniha Miteko Tjinyu, Apwiya Muluku, Owerya Tjotene. Tjekhweli iphiro Tjinyu, Mwene a ilapo.
4
Tipani ohinrowa Owovani, Apwiya, ni tipani ohinrowa ovuwiha Ntjina Ninyu? Vano Nyuwo pahi Timuri owarya. Ilapo tjotene tjinawa ni tjinakokhorela oholo Winyu, vano miteko Tjinyu tja ekhweli tjihonaneya''.
5
Numala itthu in'ya kahoweha, ni yahitthukuwa wirimu empa ya mavekelo ya anamona.
6
Yahikhuma nipuro nowarya malaikha mathanu napili ni tjotakhala, awaren'ne ikuwo tjorera ni tjowarya ni itthu tjoripa vapeto waya.
7
Wa m'motja a ale okumi ahavaha malikha ale mathanu napili ikopho tjoripa tjotjareya onanariya wa Muluku, onkhala vohima.
8
Ni empa ele yahitjareya mwixi wowarya wa Muluku ni wa Owerya Wawe. Khuvo aakela m'me mpakha in'ye tjotakhala thanu napili tja malaikha mathanu napili omala.