¹ APWIYA t'anikimwalela ni t'anikopola; Tani orinaka omova? APWIYA tari ekuru tja ekumi aka; Ti pani orinaka omova? ² Atakhali annikivirikanya, ephavelaka okinva ni awanani aka alikanela okirukunuwela, wira ekipwetexe okumi aka; nto annikwakwathuliya yaworu khiyamora. ³ Yatta akhotto ankivenyerya, nrim'aka khunkiripa; awanani aka yakituphela ninlelo ninnunroromela Muluku aka. ⁴ Kihalapela APWIYA etthu emotja, ni yawo kinamwarweela: wira kikhaleke mumpani mw'APWIYA mahuku otene, kipuheke mwaha w'0rera waya nrima, kitjukiyaka mumpani mwaya. ⁵ Movelavelani mwaka Muluku onakakhelela vapuwani vawe; owo onakitsunka mumpani mwawe onakakiha n'ekuru tjawe. ⁶ Vano miyo kinnivenyiha muru kihawerya awanani aka yakirukunuwela; kinuhela nkuttho mumpani mwa Muluku; kinuwipela APWIYA ntjipo norera. ⁷ APWIYA, iwani, ntju, nokhuwela waka; nkimorele ikharari, ni nkakhule. ⁸ Nrim'aka onninkheliya, ni nyuwo: awo ahimya wira: mphavele ekhove aka. Miyo kinniphavela ekhov'inyu, APWIYA. ⁹ N'hikivithele ekhov'innyu, n'hithanye nrumey'innyu ola nuviruwa; nyuwo mwa nkhaliheryo aka; n'hikinyanyale, ¹⁰ Muluku aka nyuwo mwa mopoli aka. Okhala wira atithi aka n'amayaka akinyanyala, nto APWIYA nnakakhelela. ¹¹ APWIYA, nkoniherye, iphiro tjinyu; tjinkiwana wa nyuwo, mwaha wa awanani aka. ¹² N'hikivelele mmatatani mw'atthu ankilupattha, okhala wira anikihimyana tjitthu tjintji tjowotha, ni annikivirikanya n'owitho wowali. ¹³ kinniroromera wira kinarwa wona oreriya APWIYA antthun'aya okiphwanyiha nlaponi-mu m'watthu akumi, vekhweli kahipweteya. ¹⁴ Mwaroromele APWIYA, mwilipihe, ni awo anamulipihani nrima; mwaroromele vano APWIYA.