¹ Muluku aka, Muluku aka, nkinyanyalelneni? Kihukhuwelelani n'uxanka waka n'hnkakhulelani. ² Muluku aka, miyo kinnikhuwela othana,ni nyuwo khannakhula; kinnukhuwelelani-tho ohiyu, ni khuhiphwanya omumula. ³ Vano nyuwo m'owarya ni roromeleya, munkhala n'atthu a Israyeli. ⁴ Axitith'inyu yahuroromelani nyuwo; awo yahuroromelani, ni nyuwo khuwopola. ⁵ Awo yanukhuwelelani nyuwo, ni nyuwo mwaniwakiherya tj'owopiha; awo yanuroromelani nyuwo, ni khuhuliya muru. ⁶ Nto miyo ka munku, nkihiyo ntthu; kothanyiya n'atthu, konyokhiya n'atthu otene. ⁷ Otene ale anikiweha annikitheya miyo; annikinyemula ni annittikinya muru, yiraka: ⁸ Owo aroromelale ''APWIYA'' ; vano awo emopole ni antthukule; vano annuntjiveliha owo. ⁹ Nyuwo nkikumihale mmirimani mw'amayaka; ni nkipwehale molumwenkuni mu, nkipwehaka mmatatani mw'amayaka. ¹⁰ Miyo kiyareliye nyuwo kiyariyakaru; okhuma mmirimani mw'amayaka nyuwo mwa Muluku aka. ¹¹ N'hikikhalele ottayi miyo, okhala wira ovelavela waka ori vakhiviru; vano khuvo onikikhaliherya. ¹² Awanani entji annikirukurerya; awo anlikana n'inari tjinkirukurerya. ¹³ Akathamela, elikanaka ntoko akharamu anopa murukulu. ¹⁴ Ekuru tjaka tjokimalela ntoko matji, ni makhuv'aka ahiya hiyana ; nrim'aka wotothowa mmurimani mwaka. ¹⁵ Vammilo vokuma ntoko nivali, ni nlumi naka nophara mwano; ni nyuwo mokipweha muntthupini m'okhwa; ¹⁶ Okhala wira nikoto n'alapwa nokirukurerya; muloko w'alavilavi wokituphela; wothorola matat'aka ni inawu tjaka. ¹⁷ Miyo kinniwerya walikela makhuvaka otene; awanani aka annikiweha, ni annikilipelela miyo. ¹⁸ Awo akawelana yaworu ekuwo tjaka; ni malay'aka ahavererya eparakha. ¹⁹ Vano nyuwo APWIYA, n'hikihiye; nyuwo ekuru tjaka, nkakuvele wira nkikhaliherye. ²⁰ Mwakihe n'nepaaka mwa ikatana; ni ekumi aka mwa tjotakhala. ²¹ Nkakiherye mwano mw'akharamu; ni nkakiherye inyaka tja inari tja ntakhwani. ²² Nave miyo kinamwipela ntjina ninyu oholo wa axunnaka; kinamuttottopelani mwinthukumanoni. ²³ Nyuwo nniwova APWIYA, mwattottopele yawo! Ni nyuwo, otjulu wa Yakobo, mwavuwihe yawo! Mwakokhorele yawo, nyuwo otjulu wa Israyeli. ²⁴ Okhala wira awo khiyathanyale atthu ohawa nnakhala khiyanyanyalale, nnakhal khiyavithelale ekhove aya; nto anniwakhulela vankhuwelelaaya okhaliheriya, awo anniwinwa. ²⁵ Kinamuvuwihani mwinthukumanoni mulupale; miyo kinamummaliha natiri aka oholo w'atthu animova Muluku. ²⁶ Alipa ohawa anamolya, ni anarupala; ale animphavela Muluku ananttottopela; nrimen'nyu onakhala mahuku otene. ²⁷ Atthu a ilapo tjotene tja vathi anamupuwelela yeyo, ni anamwivahererya w'APWIYA; ni maloko otene a malapo anamuramela oholo wawe. ²⁸ Okhala wira omwene ti w'APWIYA; ni owo tonaruma atthu a maloko otene. ²⁹ Athatjiri otene a vathi-va anamolya ni anankokhorela, hata ale ankhuruwela mmahiye anamuramela yowo, ni n'nepa aya khunkhala-tho nkumi. ³⁰ Asanaka n'otjulu aka ononrumela; awo anukhala nloko n'APWIYA, wa maloko otene. ³¹ Atthu anwa oholo, anulaleya ikhweli tjawe w'atthu antthuna oyariya, okhala wira APWIYA awo awopola atthu aya.