¹ Erimu annilaleya ovuwa wa Muluku; ni itheneri tjinnivuwiha miteko tja matat'awe. ² Othana onnitjuweliha othana okhwaya; ni ohiyu onnihimerya ohiyu okhwaya. ³ Nyuwo khamuninwa ntju naya, nnakhala mulumo, tjitthu tjenye khatjinlavula nnakhala khatjinruma. ⁴ Vakhalaleru tjitjo n'hupi aya wophiya elapo yotene, ni ehapari enlaleyaya yophiya mpakha womalani w'elapo; Muluku ahitekela ntjuwa empa wirimu. ⁵ Ni ntjuwa nlo ninkhuma vasisu ntoko mmirvo otupha, aphavelaka onxintta nkhwawe. ⁶ Ntjuwa n'no ninnikhuma vampatjerya erimu, ni khuvira nettaka mpakha vankits'aya elapo; ni khivo etthu enwerya wipitha oviha waya. ⁷ Tjoruma tj'APWIYA ti tjorera, ni tjinnivaha ekumi ya nanano; mulumo A'PWIYA t'ororomeleya, ni annavaha miruku atthu owiyeviha. ⁸ Tjoruma tj'APWIYA ti tjoloka, ni tjinnettiha nrim'ehu; tjoruma tj'APWIYA ti tjorera, ni tjinnimwalela mmethoni. ⁹ Wattittimiha APWIYA ti worera, ni onnikhala wohimala-tho; tjolamula tj'APWIYA ti tj'ekhweli; tjotene n'ya ti tja tjariya. ¹⁰ Tjoruma tja Muluku ti tjophaveleya ovikana ewero, ovikana ewero yorerexa; ni ti tjonayexa ovikana enuyi, enivuva munikulani mwaya. ¹¹ Tivo miyo nrumey'inyu vamphavelaka winwelela, wokhala otthuveliya wuntji. ¹² Tani onwerya wona tjottheka tjawe tjotene? Nkilevelele tjottheka tjaka tjotene tjihintjuwelaka. ¹³ Ventji ntjuke nrimaka ohitjoneke, etamp'ila ehikiwerye, kikhale ohulumeleya kihuluwe ottheka nno wulupale. ¹⁴ APWIYA mwakhele mulumo a mwano mwaka, ni mupuwelo wa mmurimani mwaka, oholo winyu, APWIYA mopoli aka ni olipa waka.