Ekapitulu 1
1
APWIYA yahunlavuliha Yona, mwana a Amitayi, yiraka:
2
Nvenye, nrwee oNinive nttetthe mulupale, mwalalerye atthu a wonwo mutthaka w'owopola; tthiri otakhala waya nrima ti wulupale miyo kotjuwela orattene.
3
Yona ahuvenya nto ahupuwelela otthyawela ottayi n'APWIYA oTarisi, ni ahuphiya oYopi; khuphwanya wonwo ekalawa yarwaa oTarisi. Yona ahuliva ntjurukhu w'ekwah'eyo khukela nkalawani, wira apakhiriye mpakha oTarisi ottayi n'APWIYA.
4
Nto APWIYA yahinkumiha mpahari mwemmo epheyo yulupale; khukhumelela naphuvu mulupale mpahari mwemmo, ekalawa yahalale vakhani ophweya.
5
Anahota yahova ventji khupatjerya khula ntthu onromola muluku awe anlapelaka wopoliya; nimala yahuttikhela mpahari miritti tjotene yakusale aya, wira yopowe. Vano, Yona, ahikhuruwela vathi va ekalawa, khurupathi khiyarupa ekhove tjulupale.
6
Vano mulupale anahota ahumwattama, khumwirala: Khwa, nyuwo nnarupa? Nvenye, mwinlompeke muluku'inyu; atthuna muluku owo onononela othunku nihikhwe.
7
Numala anahota yahuhimeryana yaworu wira: Nithukumane va navererye nimone onikumiheryale ovalavela nno ni nlattu awe. Awo yahavererya, khukhumelela ntjina na Yona.
8
Tivo anahota yahumwirela: Nantso, nnihimerye, nlattu'inyu. Nteko'inyu tuvi? Nyuwo mwinkhuma vayi? Elapo'inyu tivi? Nloko ninyu ti nivi?
9
Yona ahuwakhula wira : Miyo ki muheberi, kinakokhorela APWIYA Muluku
a wirimu, yawo apakale epahari ni elapo.
10
Tjitjo ahalikelela tjotene, khwahimerya wira : Aphavela otthyawela ottayi n'APWIYA, vano alopwana ale yahutepa wova khun'himerya Yona wira: Epankalinyu ti yotakhala tthiri.
11
Anahota yahunkoha yona wira: Niwiriheni exeni wira epahari yikhalele nopowe? Vano epahari yantepa ottikinyeya.
12
Yona ahuwakhula wira: Nkivarele va, nkittikhele mpahari, wira ehiye wulupatthani; tthiri miyo kotjuwela orattene wira naphuvu ola mulupale ohutuphelani nlattu wa miyo.
13
Nto alopwana ale yahuphavela wettiha ekalawa n'ipoto, wira ephwanye etthaya; nto khotjela, okhala wira epahari yanitepa wupa etuphelaka ekalawa.
14
Tivo awo yahikhuwelela w'APWIYA, yalapelaka wira: Xontte APWIYA, hiyo khanirina nlattu mwaha wa ekumi ya nlopwana ola, nyuwo muhinihukhumu mwaha w;omwinva ntthu ola; ti nyuwo, APWIYA, mwimpanka ntoko tjintthuninyu.
15
Vano yahunvara Yona, khunttikhela mpahari; epahari yahikhalela ehiyaka owali aya.
16
Tivo alopwana ale yahuwova APWIYA ventji khwahelela nkuttho yamanela natiri.
17
Nto APWIYA yahureherya ehopa yulupale wira emmirye Yona; Yona ahukhala othana miraru ni ohiyu miraru anri mmirimani mw'ehopa.