¹ Ala ti mulumo Amosi, ari makamputji a Muluku nttetthe w'oTekowa, ahumoniherya molohani mutthaka ola onahimya atthu a Israyeli mahuku a Oziya mwene oYuda, ni mahuku a Yorobowamu, mwana a Yowasi, mwene a wIsrayeli, wa iyakha pinli ehinatthi okhumelela etetere. ² Amosi ahihimya wira: APWIYA annopa murukulu omwako Siyoni, ntju naya ninnikhuwela oYerusalemu; mmathalani munlya inama muhuma, munyepu wa mwako Karmelo wonyala. ³ APWIYA anihimya wira: Atthu oDamasiko atepa ottheka, tivo , miyo kinamwahukhumu; tthiri awo ahapottola ni mwithi atthu oGaladi. ⁴ Vano miyo kinamorihela moro enupa ya mwene Hazayeli, kinupaha inupa tjolipihiya tja mwene Beni-Hadadi. ⁵ Kinupwexakatsa mikhora tja oDamasiko, kinuwinvakatja makhulupale oBikeyathi-Aveni, kinumpwetexa ole onrumaoBedi-Edeni; atthu oSiriya anurwaniya elapo y'oKiri, anihimya t'APWIYA, ⁶ APWIYA anihimya wira: atthu oGaza atepa ottheka, votthikela, miyo kinamwahukhumu; awo ahatthuka atthu otene a maloko makinaku, khwatumiherya ntoko ipottha atthu a wEdomi. ⁷ Vano miyo kinumorihela moro makokoro oGaza, kinupaha inupa tjaya tjolipihiya. ⁸ Kinuwinvakatja makhulupale a w'Axidodi, kinumpwetexa ole onruma w'Axidodi; kinutuphela nttetthe wa Wekironi, aFilisti anrwaa ohala, anihimya t'APWIYA. ⁹ APWIYA anihimya wira: Atthu oTiro, atepa ottheka, miyo kinamwahukhumu; awo ahalupattha atthu a Israyeli, khuhamorela ikharari khiyathokoreryale watana wapakalyaka n'amutji aya. ¹⁰ Tivo kinumorihela moro makokoro oTiro, kinupaha inupa tjaya tjolipihiya. ¹¹ APWIYA anihimya wira: Atthu a wEdomi atepa ottheka, vottharelana, miyo kinamwahukhumu; awo ahalupattha atthi a Israyeli, ari amutji aya khuhamorela ikharari; awo atepa wahaxa nuviruwa waya athipelela wakhalela nrima ni nthiti. ¹² Vano miyo kinumorihela moro nttetthe w'oTemani, kinupaha inupa tjolipihiyatja oBosira. ¹³ APWIYA anihimya wira: Atthu a wAmoni atepa ottheka, ni vottharelana, miyo kinamwahukhu; awo ahatuphela athiyana oGaladi, yari n'ehamela wira yintjererye elapo aya. ¹⁴ Tivo miyo kinumorihela moro makokoro oRaba, kinupaha inupa tjaya tjolipihiya nihuku nenno ninrwaa okhala nihuku n'ekhotto ni nokhuwela, nihuku n'eyupuru ni naphuvu mulupale. ¹⁵ Mwene aya onarwaaniya okhalihiya epottha wamotja ni makhulupale aya, anihimya t'APWIYA.